Скъодтаты Эльбрусы «Уодигага»

0
16

Сабитӕ нӕ фидӕн, нӕ сомбон сты. Хӕдзарӕй сывӕллоны худт куы райхъуысы, уӕд уымӕй хуыздӕр ницы ис. Ахӕм хӕдзары бинонтӕ амондджын ӕмӕ фӕрнджын сты. Куыд адджын, куыд зынаргъ сты ныййарӕгӕн йӕ хъӕбулы фыццаг мидбылбахудт, йӕ фыццаг къахдзӕфтӕ…

Дарддӕр бинонтӕн свӕййы сӕ «цума». Ам сахуыр вӕййы хистӕртӕн лӕггад кӕныныл, ӕгъдау ӕмӕ ӕфсармыл. Сывӕллон бӕласӕй уӕлдай нӕу. Бӕлас ӕрвылаз хъӕуы ӕхсӕдын, цӕмӕй йӕ къалиутӕ, куыд ӕмбӕлы, афтӕ рӕзой. Хъӕуы йыл дон кӕнын, йӕ уидӕгты алыварс цы зӕхх ис, уый фӕхъӕуы афӕлмӕн кӕнын. Афтӕ у сывӕллоны хъуыддаг дӕр. Йӕ фыццаг къахдзӕфтӕй фӕстӕмӕ райдайы йӕ алфамбылай дунеимӕ зонгӕ кӕнын. Ӕмӕ уыцы хъуыддаджы ныййарджытӕй бирӕ аразгӕ у. Хъуамӕ ӕмбарын кӕной сӕ кӕстӕртӕн, иннӕ сабитимӕ хӕларӕй цӕрын кӕй хъӕуы, фосы ӕмӕ сырдты уарзын, ӕрдз та хъахъхъӕнын кӕй хъӕуы, уый. Уӕд сырӕздзысты зӕрдӕхӕлар ӕмӕ фидӕны хорз адӕймӕгтӕй.

Хъомыладон фӕрӕзӕн ныййарджытӕн ахъаз у аивадон ӕмӕ методикон литературӕ. Ӕрӕджы рухс федта Скъодтаты Эльбрусы чиныг «Уодигага». Фыст у дыгурон ӕвзагыл. Арӕзт у дыууӕ хайӕ: фыццаг хайы сты авторӕн йӕхи поэтикон уацмыстӕ, дыккаджы та — тӕлмацтӕ. Авторы поэтикон уацмыстӕм хауынц ӕмдзӕвгӕтӕ, уыци-уыцитӕ ӕмӕ тагъддзуринӕгтӕ. Тӕлмацты хайы та ис ӕмдзӕвгӕтӕ, уыци-уыцитӕ ӕмӕ зарджытӕ. Ацы поэтикон ӕмбырдгонд пайда уыдзӕн рӕвдауӕндоны кары сывӕллӕттӕн, скъолайы райдайӕн кълӕсты ахуырдзаутӕн ӕмӕ, дыгурон ӕвзаг чи ахуыр кӕны, уыцы астӕуккаг ӕмӕ хистӕр кълӕсты ахуырдзаутӕн. Чиныджы ӕрмӕг хорз ӕххуыс фӕуыдзӕн, скъолатӕн ахуыргӕнӕн чингуытӕ чи аразы, уыдонӕн дӕр. Уымӕй уӕлдай ма «Уодигага»-йы ссарӕн ис, хицӕн предметтӕм чи хауы: математикӕ, нӕ алфамбылай дунейы тыххӕй, нывкӕнынады аивад, музыкӕ ӕмӕ ӕндӕр ӕрмӕджытӕ. Зӕгъӕм, райдайӕн кълӕсты математикӕйы чингуытӕ аразджытӕн сӕ бон у спайда кӕнын ӕнгуылдзтӕй хъазт ӕмӕ нымайыны ӕмдзӕвгӕтӕй, музыкӕйы чингуытӕм та — нотӕтыл, музыкалон инструменттыл фыст ӕмдзӕвгӕтӕ, нӕ алфамбылай дунейы тыххӕй чингуытӕм бахӕссӕн ис ӕрдзыл ӕмӕ Фыдыбӕстӕйыл фыст ӕмдзӕвгӕтӕ.

Фӕлӕ уӕддӕр чиныджы сӕйраг бынат ахсынц, фыццаг хайы цы лирикон ӕмдзӕвгӕтӕ ис, уыдон. Уымӕ гӕсгӕ канд сывӕллӕттӕн не сты, фӕлӕ йӕ зӕрдӕмӕ поэзийы ӕнкъарӕнтӕ кӕмӕн хӕццӕ кӕнынц, уыдонӕн се ‘ппӕтӕн дӕр.

Чиныджы дыккаг хайы ӕмдзӕвгӕтӕ сты уырыссаг ӕвзагӕй  тӕлмацгонд. Сӕ автортӕ дӕр сты бӕрӕггонд.

«Уодигага»-йы ис зындгонд уырыссаг зарджыты тӕлмацтӕ, музыкӕйыл куыд бадой, афтӕмӕй. Уый у ахсджиаг хъуыддаг, уымӕн ӕмӕ сывӕллӕтты бон уыдзӕн сӕхи мадӕлон ӕвзагыл зарын. Нӕ кӕстӕртӕн мадӕлон ӕвзагмӕ уарзондзинад хъуамӕ сӕ туджы, сӕ сӕрызонды ӕмӕ се ‘уӕнгты ахъара. Уӕд ӕвзаг нӕ рох кӕны ӕмӕ нӕ сӕфы.

Авторы бафӕндыд, сывӕллӕттӕн сӕхи ӕвзагмӕ хӕстӕг чи у, ӕнцонӕмбарӕн сын куыд уа, ахӕм ӕвзагыл ныффыссын. Хъазты хуызы сын амынд цӕуы математикӕ, нывкӕнынад ӕмӕ музыкӕ. Афтӕмӕй сывӕллӕттӕ сӕ алфамбылай цардмӕ кӕнынц цымыдисдӕр. Чиныджы цы алыхуызон ӕрмӕджытӕ ис, уыдон сын сӕ зӕрдӕты райгуырын кӕндзысты рӕсугъд ӕнкъарӕнтӕ, мадӕлон ӕвзагмӕ уарзондзинад, рӕзын сын кӕндзӕн сӕ логикон хъуыдыкӕнынад, цыргъзонддзинад, разӕнгард сӕ кӕндзӕн ахуырмӕ, сӕ рӕзгӕ удтӕ сын рухс кӕндзӕн царды хорздзинӕдтӕй.

Чиныг «Уодигага»-йы рӕвдауӕндоны кусджытӕ ӕмӕ райдайӕн кълӕсты ахуыргӕнджытӕ ссардзысты хъӕугӕ ӕрмӕджытӕ, цӕмӕй сабитӕ ахуыр кӕной сӕ ныййарджытӕн кад кӕныныл, ӕмгарыл ӕнувыд уӕвыныл, кӕстӕрыл аудыныл.

Хъойбайты Галинӕ

ОСТАВЬТЕ ОТВЕТ

Please enter your comment!
Please enter your name here