Сывӕллӕтты хъомыладӕн — ӕппӕт фадӕттӕ дӕр

0
19

Знон Цӕгат Ирыстоны Сӕргълӕууӕг Битарты Вячеслав кусӕг балцы уыд Мӕздӕджы. Республикӕйы разамонӕг кадджын уавӕры байгом кодта ног рӕвдауӕндон, стӕй сарӕзта районы социалон-экономикон райрӕзты фарстыты фӕдыл ӕмбырд.

Мӕздӕджы Юбилейоны уынджы цы бирӕфатерон цӕрӕн хӕдзӕрттӕ ис, уыдоны фарсмӕ ныр ӕрбынӕттон ног рӕвдауӕндон. Нырӕй фӕстӕмӕ ам хъомыл кӕндзысты 230 сывӕллоны. Аразджытӕ бацархайдтой, цӕмӕй сывӕллӕтты ахуырадон ӕмӕ хъомыладон рӕзтӕн ӕппӕт фадӕттӕ дӕр уа.

Рӕвдауӕндон байгом кӕныны фӕдыл кадджын ӕмбырды архайдтой Битарты Вячеслав, республикӕйы Хицауады Сӕрдары хӕдивӕг Иринӕ Азимова, ахуырад ӕмӕ наукӕйы министр Людмилӕ Башарина, арӕзтад ӕмӕ архитектурӕйы министр Касаты Таймураз, Мӕздӕджы районы сӕргълӕууӕг Гугиты Геннади, районы администрацийы сӕргълӕууӕг Олег Яровой ӕмӕ ӕндӕр уазджытӕ.

Битарты Вячеслав разыйӕ баззад ног хъомыладон кусӕндоны уавӕрӕй, йӕ ныхасмӕ гӕсгӕ, рӕвдауӕндон арӕзт у ӕппӕт нырыккон домӕнты бындурыл, бӕстон дзы хыгъд ӕрцыдысты зынгсирвӕзтӕй ӕдасдзинады уагӕвӕрдтӕ, стӕй ӕндӕр хъуыддӕгтӕ.

— Абон ма Мӕзджӕджы горӕты картӕйыл фӕзынд иу хъомыладон кусӕндон. Ӕмӕ ахӕм, стӕй ӕндӕр ахсджиаг социалон объекттӕ дарддӕр дӕр арӕзт цӕудзысты районы. Зӕгъӕм, ахӕм рӕвдауӕндон арӕзт цӕуы Луковскы станицӕйы, ног скъола та — Мӕздӕджы. Архайд цӕуы Мӕздӕг ӕмӕ Дзӕуджыхъӕуы ӕхсӕн комкоммӕ фӕндаг банывыл кӕныныл дӕр. Ӕппӕт уыцы мадзӕлтты сӕйрагдӕр нысан у районы адӕмы цард хуыздӕр кӕнын, — йӕ раныхасы бафиппайдта Цӕгат Ирыстоны разамонӕг.

Мӕздӕджы районы цы рӕвдауӕндӕттӕ ис, уыдоны хъомылгӕнинӕгты нымӕцыл ацы аз бафтыд 560 сывӕллоны. Уыцы бӕрӕггӕнӕн къухы бафтыд, 2-ӕм ӕмӕ 34-ӕм рӕвдауӕндӕтты ног бӕстыхӕйттӕ кӕй байгом сты, уый фӕрцы. Тагъд рӕстӕджы уӕлӕмхасӕн бӕстыхӕйттӕ аразын райдайдзысты 5-ӕм  ӕмӕ 12-ӕм рӕвдауӕндӕтты дӕр. Уыцы ӕмӕ ӕндӕр мадзӕлтты фӕрцы Мӕздӕджы районы кӕронмӕ лыггонд ӕрцӕудзӕн сабитӕн рӕвдауӕндӕтты бынӕттӕ дӕттыны фарст.

Юбилейоны уынджы цы рӕвдауӕндон фӕзынд, уый та арӕзт ӕрцыд паддзахадон программӕ «Ахуырады рӕзт»-ы фӕлгӕты. Объектты арӕзтадыл хардзгонд ӕрцыд 226,7 милуан сомы (уыдонӕй 210 милуаны — федералон бюджеты ӕххуыс, иннӕ хай та радих кодтой республикон бюджетӕй).

Рӕвдауӕндоны сывӕллӕттӕн байгом кодтой 12 къорды, уыдонӕй 2 къорды уыдзысты логопедон. Районы разамонджытӕ куыд радзырдтой, афтӕмӕй коллективы кусджыты нымӕц у 40 адӕймаджы.

Фӕстӕдӕр Битарты Вячеслав цы уӕрӕх ӕмбырд сарӕзта, уым бӕстон ныхас рауад Мӕздӕджы районы абоны уавӕр ӕмӕ дарддӕры социалон-экономикон райрӕзты нысантыл.

Ӕмбырды райдайӕны профилон министрадтӕ ӕмӕ ведомствӕты разамонджытӕ радзырдтой, амӕй размӕ ӕмбырдты районы лыггӕнинаг фарстыты фӕдыл цы уынаффӕтӕ хаст ӕрцыд, уыдоныл куыд бакуыстой, уый тыххӕй.

Районы цӕрӕн бынӕттӕ донивылдтытӕй хъахъхъӕнын, бынӕттон цӕрджытӕн хӕрзхъӕд медицинон лӕггӕдтӕ кӕнын, цыбыркъух бинонтӕн уӕлӕмхасӕн ӕххуысы мадзӕлттӕ саразын — ацы ӕмӕ иннӕ ахсджиаг фарстыты фӕдыл Битарты Вячеслав сӕрмагонд амынддзинӕдтӕ радта профилон министрадтӕ ӕмӕ ведомствӕты сӕргълӕуджытӕн ӕмӕ муниципалитеты разамонджытӕн.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here