Цӕрӕнуӕтты-коммуналон хӕдзарад: федералон министр разыйӕ баззад

0
18

Цӕгат Ирыстонмӕ кусӕг балцы ссыд Уӕрӕсейы Федерацийы арӕзтады ӕмӕ цӕрӕнуӕтты-коммуналон хӕдзарады министр Владимир Якушев. Фыццагдӕр мӕскуыйаг уазджытӕ бабӕрӕг кодтой Беслӕны мемориалон уӕлмӕрд. Республикӕйы Сӕргълӕууӕг Битарты Вячеславимӕ, стӕй иннӕ бӕрнон кусджытимӕ ссардтой теракты амӕттӕгты рухс нӕмттӕ.

Фӕстӕдӕр министры базонгӕ кодтой Реданты донхъахъхъӕнӕн арӕзтадимӕ, стӕй  Беслӕны ӕмӕ Ногиры донсыгъдӕггӕнӕнты уавӕримӕ. Федералон министр йе ‘ргом аздӕхта, нӕ республикӕйы кӕлӕддзаг хӕдзӕртты ныхмӕ ног арӕзтад куыд цӕуы, уыимӕ, стӕй горӕты хӕрзвадатдзинадимӕ.

Фылдӕр ӕргом Владимир Якушев аздӕхта ног скъолатӕм. Бабӕрӕг кодта, 18-ӕм микрорайоны кӕй аразынц ӕмӕ 500 скъоладзауы кӕм ахуыр кӕндзӕн, уыцы арӕзтад, ӕхсызгонӕй сӕмбӕлд гимназ «Интеллекты» ахуырдзаутимӕ. Сывӕллӕттӕ йын бакастысты ӕмдзӕвгӕтӕ ӕмӕ иумӕ ӕрзылдысты ӕртӕуӕладзыгон бӕстыхайыл. Ӕппӕт гӕнӕнтӕ дзы кӕй ис рӕзгӕ фӕлтӕры хъомыладӕн, уый федта министр.

— Ахӕм скъолайы мӕхӕдӕг дӕр ацахуыр кӕнин. Зӕрдӕмӕдзӕугӕ, уӕрӕх ӕмӕ цъӕхвӕлыст у скъолайы кӕрт. Ӕнтыстджын ут, — загъта министр.

Ӕрдӕгарӕзтӕй цы бирӕуӕладзыгон хӕдзӕрттӕ баззад, се ‘хцатӕ чи сӕвӕрдта арӕзтады, уыцы адӕмы фарстытӕм дӕр ӕркӕсдзӕн. Аст ахӕм арӕзтадон объекты ис республикӕйы.

Хетӕгкаты Къостайы номыл культурӕ ӕмӕ фӕлладуадзӕн парк ацы бонты цӕуы цалцӕггонд, фӕзынд дзы ног къахвӕндӕгтӕ, бандӕттӕ, хъазӕн фӕзтӕ. Уымӕй фылдӕр та ма дзы конд ӕрцӕудзӕн. Уый тыххӕй Владимир Якушевӕн радзырдтой паркмӕ бацӕугӕйӕ. Дисы йӕ бафтыдтой ӕнусон цъӕх бӕлӕстӕ. Стӕй куыд уарзонӕй, куыд арӕхстгай ӕмӕ хӕдзардзинӕй хъахъхъӕнынц ирыстойнӕгтӕ сӕ историон архитектурӕ.

— Цы федтон, цы фехъуыстон, уыдонӕй се ‘ппӕтӕй дӕр разыйӕ баззадтӕн, — загъта журналисттимӕ фембӕлды рӕстӕг Владимир Якушев. — ӕнӕмӕнг, ногӕй рацараздзыстӕм Беслӕны донсыгъдӕггӕнӕнтӕ, ныридӕгӕн цӕттӕ сты проектон-сметон гӕххӕттытӕ, пайдагонд дзы цӕудзӕн ног технологитӕй. Федералон министрад алывӕрсыг ӕххуыс бакӕндзӕн республикӕйӕн. Цӕмӕй ацы ӕхсызгон хъӕугӕ арӕзтад кусын райдайа, уый тыххӕй радих кӕндзыстӕм 126 милуан сомы.

Ӕнӕбафиппайгӕ нӕй, республикӕйы  разамынд кӕй кусы социалон-транспортон инфраструктурӕйыл, ног микрорайонты цӕрӕн хӕдзӕрттӕм ӕввахс рӕзынц скъолатӕ, рӕвдауӕндӕттӕ, конд цӕуынц ног фӕндӕгтӕ. Ӕнӕ федералон ӕххуысӕй республикӕ йӕхи бюджетӕй нӕ сарӕхсдзӕн.

Федералон программӕтӕ республикӕйы ӕнтыстджынӕй ӕххӕстгонд кӕй цӕуынц, уый дӕр фӕнысан кодта министр.

— Ӕхсызгон мын у, Ирыстоны арӕзтадон объектты иууылдӕр бынӕттон тыхджын компанитӕ кӕй кусы, уый. Проекттӕ сты цымыдисаг, горӕты иумӕйаг архитектурӕйы хорз сфидыдтой. Бирӕ регионты нӕ фаг кӕны специалисттӕ, нӕй дзы хъӕугӕ кусджытӕ, ӕмӕ ис ӕхцайӕ къуылымпытӕ ӕййафынц. Республикӕйы разамынд фӕстауӕрцгӕнгӕ, хӕдзардзинӕй кӕй пайда кӕнынц бюджетон фӕрӕзтӕй, уый бӕлвырд  у, — бахахх кодта федералон министр.

Битарты Вячеслав арфӕ ракодта мӕскуыйаг уазӕгӕн, ӕнӕвдӕлон уӕвгӕйӕ рӕстӕг кӕй ссардта ӕмӕ Ирыстон кӕй бабӕрӕг кодта, уый тыххӕй.

— Бирӕ лыггӕнинаг фарстытӕ ис республикӕйы, архайӕм бирӕ федералон программӕты, аразӕм скъолатӕ, рӕвдауӕндӕттӕ, зилӕм нӕ фӕндӕгтӕм, хӕдзӕртты кӕртытӕ ӕнцонвадат кӕнӕм. Ацы хъуыддаджы  стыр ӕххуыс исӕм федералон бюджетӕй. Дарддӕр дӕр иумӕйаг хъарутӕй архайдзыстӕм республикӕйы райрӕзтыл, —зӕрдӕ йын бавӕрдта Битарты Вячеслав.

Уыцы бон Хицауады хӕдзары уыд уӕрӕх ӕмбырд. Ныхас дзы цыд Цӕгат Ирыстоны  национ проект «Жилье и городская среда» царды куыд ӕххӕстгонд цӕуы, ууыл.

Гугкаты Жаннӕ

Къамтӕ систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here