«Хӕхты сывӕллӕттӕ» — Тайваны

0
27

Бирӕ дунеон фестивалты лауреат, Сочийы горӕты 22-ӕм Зымӕгон Олимпаг хъӕзтыты архайӕг, ансамбл «Хӕхты сывӕллӕттӕ», сӕрды фӕлладуадзӕн бонты, архайдта Тайваны горӕт Иланы сывӕллӕтты фольклорон фестивалы. Йӕ архайджытӕ уыдысты дунейы 25 бӕстӕйы минӕвӕрттӕ, Уӕрӕсейӕ дзы уыдис ӕрмӕстдӕр ансамбл «Хӕхты сывӕллӕттӕ». Уыцы балц рауад УФ-йы Культурӕйы министрады ӕххуысӕй, сфӕлдыстадон проект «Культурӕйы цӕдис»-ы фӕлгӕты.

Фестивалы сӕйраг нысан уыд, цӕмӕй, сывӕллӕтты сфӕлдыстадон фембӕлдтыты фӕрцы, адӕмты хӕлардзинад фидардӕр кӕна. Уый тыххӕй та, йӕ аразджыты хъуыдымӕ гӕсгӕ, фестивалы архайджытӕ адӕмы размӕ хъуамӕ канд сӕ хӕдхуыз национ аивад ма хӕссой, фӕлӕ архайой кӕрӕдзи хуыздӕр базоныныл, дунейы алы бӕстӕты адӕмты традицион культурӕйы рӕсугъддзинад ӕмӕ куырыхон зондыл ахуыр кӕной.

— Европӕйаг ӕмвӕзадыл ахӕм фестивал мах нырма нӕма федтам. Уый хъӕздыг уыд концерттӕй ӕмӕ культурӕйы  ӕндӕр программӕтӕй, — зӕгъы УФ-йы Хицауады преми «Уӕрӕсейы уд»-ы лауреат, РЦИ-Аланийы адӕмон артист, ансамбл «Хӕхты сывӕллӕттӕ»-йы аивадон разамонӕг Къозаты Станислав. — Кӕй зӕгъын ӕй хъӕуы, Тайван нӕ дисы бафтыдта йӕ алӕмӕты ӕрдзыхъӕдӕй, культурӕйӕ, уазӕгуарзондзинадӕй. Фестивалы ӕппӕт архайджытӕ дӕр ӕрбынат кодтой Иланы Национ университеты базӕйы. Уыдон концерттӕ лӕвӕрдтой горӕты стыр парк «Чин-Шуй»-ы стыр сценикон фӕзты. Кӕронбӕттӕны-иу сценӕмӕ рахызтысты «Хӕхты сывӕллӕттӕ»-йы архайджытӕ. Афтӕ арӕзт уыд программӕ.

РЦИ-Аланийы ӕрыгон артисттӕ-иу сӕ концерт райдыдтой «Симд»-ӕй ӕмӕ-иу фесты «Ирон сюитӕ» ӕмӕ уырыссаг кафт  «Калинкӕ»-йӕ. Сӕ алы рацыд дӕр аивадуарзджытӕн уыд бӕрӕгбоны хуызӕн, къухӕмдзӕгъд-иу нал ӕмӕ нал ӕнцад. Ансамблӕн фӕзындис йӕхи хӕлӕрттӕ. Уыдон-иу концерты размӕ сӕрмагондӕй ӕрбацыдысты ирон кафджытӕм, ӕрбахастой-иу сын дыргътӕ ӕмӕ адджинӕгтӕ, дзырдтой-иу, сӕ концертмӕ сӕ ногӕй бакӕсын кӕй фӕнды, уый. Тайваны журналисттӕ сӕ интервьютӕ дӕр райстой.

Фестивалы фӕлгӕты уыд тайванаг кафджыты мастер-класс. Уыдон ирон артистты ахуыр кодтой сӕ кӕфтыты сусӕгдзинӕдтыл.

Нӕ фӕсивӕд дӕр сӕ кафт, «Кӕфхъуындарты кафт», зӕгъгӕ, базыдтой. Арӕзт ӕрцыд семинар ирон национ кӕфтыты миниуджыты тыххӕй, «Симд» ӕмӕ «Тымбыл кафт»-ы бындурыл. Архайдтой дзы Японы, Турчы, Панамӕйы ӕмӕ Тайваны ӕвзонг артисттӕ. Ахуыр сӕ кодта Къозаты Станислав йӕхӕдӕг. «Хӕхты сывӕллӕтты» ансамблы  оркестры разамонӕг Гаглойты Фатимӕ ӕмӕ ансамблы рауагъдон Дзылыхты Георгийӕн та уыд мастер-класстӕ ирон фӕндыр ӕмӕ гуымсӕгыл цӕгъдынӕй. Уымӕй уӕлдай, фестивалы алы архайӕг къордӕн дӕр уыд «Национ бон»-ы изӕр. Ирыстоны «Хӕхты сывӕллӕттӕ» аивадуарзджыты зонгӕ кодтой ирон адӕмы культурӕимӕ. «Нӕ ансамбл-иу кӕронбӕттӕны акафыд «Симд».

— Ансамбл «Хӕхты сывӕллӕттӕн» ӕдзухдӕр циндзинад хӕссы, ирон адӕмы кафты культурӕ фӕсарӕнтӕм куы ахӕссынц, уӕд уый», — загъта Къозаты Станислав.  — Райгуырӕн уӕзӕгӕй дард ран ахӕм фембӕлдтытӕ махӕн дӕттынц ног тыхтӕ ӕмӕ сфӕлдыстадон уӕлтӕмӕн, нӕ адӕмы культурӕ дунейы алы рӕтты равдисыны тыххӕй. Уыдон та рӕзын кӕнынц культурон ӕмгуыстад, фидардӕр кӕны адӕмты ‘хсӕн хӕлардзинад, уӕлдайдӕр та фӕсивӕды ‘хсӕн.

Абайты Зӕлинӕ

ОСТАВЬТЕ ОТВЕТ

Please enter your comment!
Please enter your name here