Нӕ фарны куырой

0
21

Кӕддӕр астрономийы корифей Энштейн фыста, йӕ кой дардыл кӕмӕн айхъуыст, уыцы актер-клоун Чарли Чаплинмӕ: «Вас понял народ… Вы бессмертны». Чаплин ын дзуапп радта: «Хотя Вас никто не понимает… но Вы — бессмертны». Мӕ ныхас ам фыстӕджыты дуэтӕн йӕ фыццаг хайыл у: Энштейн Чаплинмӕ цы фыста, уый, зӕгъӕн ис, ӕмӕ хауы поэт Къадзаты Станиславмӕ дӕр. Адӕм ӕй, ӕцӕгӕйдӕр, хорз бамбӕрстой. Стыр аргъ ын кӕнынц йе сфӕлдыстадӕн. Уый уымӕй бӕрӕг у, ӕмӕ йын бирӕтӕ ӕнхъӕлмӕ кӕй фӕкӕсынц йӕ уацмысты радон рауагъдмӕ. «Рӕстдзинад» ӕмӕ ирон журналтӕ чи нӕ исы, мӕ уыцы сыхӕгтӕ мӕ афӕрс-афӕрс фӕкӕнынц, Камал ӕмӕ, дам, дзы Станиславӕн ницы ис, ома газеты, кӕнӕ журналты. Мӕнӕн уый ӕхсызгон вӕййы. Цӕвиттон, поэтӕн иугӕр фӕзынди йӕхи кӕсджытӕ, уӕд уымӕн уый у йӕ фыццаг сгуыхт, йӕ сӕйрагдӕр уӕлахиз.

Ацы сӕрзилӕн дуджы тынг зын у, хъысмӕтӕй дын цы бынат нывгонд ис, уым ӕрфидар, ӕрбиноныг уӕвын. Фӕлӕ дзы Къадзайы-фырт ссардта йӕ бынат, ӕмӕ размӕ тындзы йӕ равзӕрст фӕндагыл, ӕнӕ фӕстӕмӕ фӕкӕс-фӕкӕс кӕнгӕйӕ.

Поэты ӕз нӕ зыдтон, хъӕуы ма куы уыдтӕн, уӕд. Ӕмӕ йӕ зонгӕ дӕр куыд кодтаин, уый мӕнӕй фынддӕс азы кӕстӕр у. Куы зӕгъын, ӕз лӕгӕй-лӕгмӕ бирӕ поэтты нӕ зыдтон, уыимӕ Дзаболаты Хазбийы, стӕй Калоты Хазбийы дӕр. Фӕлӕ мӕм фехъуыстысты се ‘мбисонды зарджытӕ. Уыдон дыууӕйӕ дӕр уыдысты поэзийы булӕмӕргътӕ ӕмӕ цӕргӕстӕ… Ӕппӕты фыццаг мын хуызӕй базонын кодта Станиславы Хаджеты Таймураз. Загъта ма мын Къадзайы-фыртӕй: «Фидар поэт у. Мӕн уырны, йӕ фидӕн ноджы ирддӕр ӕмӕ фӕрнджындӕр кӕй уыдзӕн, уый». Ӕз ӕй тынгдӕр зонын йе сфӕлдыстады ‘рдыгӕй. Куы-иу газеты фӕзындысты йе ‘мдзӕвгӕтӕ, куы — журналты, куы та-иу ын сӕ телеуынынады ӕмӕ радиойы бакастысты.

Поэзийы хъавгӕ ӕмӕ ныгъуылдтытӕ кӕнгӕйӕ нӕ фӕзынд, фӕлӕ рухсмӕ — фидар къахдзӕфтӕй. Суанг йӕ фыццаг ӕмдзӕвгӕтӕй дӕр бӕрӕг уыд, цавӕр курдиаты хицау у, уый.

Зындгонд зарӕггӕнӕг Хворостовскийӕ афтӕ дзырдтой йӕ рӕстӕджы: «Он, буквально, ворвался в столичную оперную аудиторию». Раст уыйау уыд Станиславы фӕзынд дӕр поэзийы. Уайтагъддӕр ӕй бафиппайдтой, канд литературӕйы дӕснытӕ нӕ, фӕлӕ аивады цӕхӕр кӕй ӕндавы, уӕлмонц мырты зӕлтӕ кӕй зӕрдӕ бацагайынц, уыдонӕй дӕр бирӕтӕ.

Иу рӕстӕджы ӕрыдоны районы газет «Рухс»-ы раздӕры сӕйраг редактор Боситы Ирбеджы баййӕфтон йӕ кусӕн уаты. Къадзайы-фырты ӕмдзӕвгӕтӕ ӕвзаргӕйӕ, ӕмӕ мын афтӕ зӕгъы, ацы лӕппуйӕн, дам, бирӕ бантысдзӕн аивады. Ис дам ын йӕхи ӕрмдзӕф, йӕхи фыссынады уаг, никӕимӕ, дам, ӕй фӕивддзаг кӕндзынӕ. Йӕ фыссӕн стъолы авджы быны йын ауыдтон Станиславы егъаугомау хуызист. Уый уыд, Ирбег уымӕн цы аргъ кодта, уый нысан.

Поэтӕн йӕ фыстытӕ хызт сты хус. Ӕнӕуд, ихсыд риторикӕйы зӕрдӕцъӕхгӕнӕн хъӕрныхасӕй. Ифтонггонд ын цӕуынц цардхъомыс тыхджын фӕлгонцтӕй. Нӕ йын рахатдзынӕ йе ‘мдзӕвгӕты ахӕм дзырдтӕ дӕр, дыууӕрдӕм ӕмбарӕн кӕмӕн уа. Уӕдӕ, анталогимӕ дӕр хаст ӕрцӕуынц тӕккӕ хуыздӕр уацмыстӕ. Рафӕлдахӕм ма Хъодзаты ӕхсары арӕзт, анталоги «Ирыстоны поэзи». Уыцы чиныгмӕ Станиславӕн хаст ӕрцыдис цыппӕрдӕс ӕмдзӕвгӕйы ӕмӕ аст миниатюрӕйы: Цӕуылфӕнды ма фысса поэт, йӕ ныхас иудадзыгдӕр вӕййы ӕргом, комкоммӕ ӕмӕ уӕндон:

Лӕгдзинад мах нӕма исӕм ӕфстау,

Йӕ фарны куырой ма бауадзӕм ривад,

Ӕрыссӕд-иу нын не стджытӕ фӕлтау!..

Къадзайы-фырты сфӕлдыстады тематикӕ уӕрӕх у, йӕ авналӕнтӕ сты алыхуызон. Уый арӕхстджын фыст кӕны цардыл, адӕмы уавӕрыл, райгуырӕн бӕстӕйыл, сӕрибардзинадыл, лӕгдзинадыл. Рӕстдзинады сӕраппонд цӕттӕ у суанг…

Хуыцау куы уа рӕстдзинадӕн йӕ ныхмӕ,

Хуыцауыл дӕр уӕд сисдзынӕн мӕ къух.

Уарзондзинадыл, дзындзфӕрдгуыты халау, снывӕзта иттӕг рӕсугъд,  сыгъдӕг лирикӕйы рухсӕй тыбар-тыбур чи кӕны, ахӕм ӕмдзӕвгӕты цикл:

Куы ма мын уаид ноджыдӕр зӕрдӕтӕ,

Уӕддӕр сӕ раттин иууылдӕр дӕуӕн.

Куыд ма ис цымӕ рӕсугъддӕр зӕгъӕн ацы рӕнхъытӕй?!

Ницы аирвӕздзӕн поэты уынаг цӕстӕй.  ӕппӕт дӕр хынцы, ӕппӕт дӕр хаты. Ӕнӕрхъуыдыйӕ нӕ ахиздзӕни суанг хӕлуарӕджы тынты рӕзты дӕр:

Хӕлуарӕджы хӕрдгӕ Дымгӕйӕ-ӕлхынцъ:

Катай кӕны, риссы  сыфтӕрты згъӕлдыл:

«Ацыдтӕн бӕлӕстӕй дарддӕр, —

Ма уынон сыфтӕн сӕ хауд.

Мӕт кӕны цӕвӕджы коммӕ чи бахауы уыцы дидинджытыл ӕмӕ кӕрдӕгыл:

Цъӕхдзаст дидинтӕ, курын уӕ хатыр»,

Дӕ мӕлӕт мын ныббар, фӕлмӕнрус кӕрдӕг…

Йе ‘мдзӕвгӕтӕй хъус ацахсы мӕргъты зарджытӕ, бӕлӕсты сыфтӕрты сыбар-сыбур, дӕтты хъӕлӕс, зиууӕтты цӕвджыты ӕхситт — иумӕйагӕй — ӕрдзон дунейы гармони.

— Станиславмӕ ис ахӕм уацмыстӕ дӕр, кӕцытӕ хинымӕры, кӕнӕ ӕрдӕгхъӕлӕсӕй нӕ бакӕсдзынӕ, коммӕ дӕр дын нӕ бакӕсдзысты. Уыдонӕй иу у «Цӕхджын сайд». Ӕмдзӕвгӕ мӕм кӕсы манифестон. Поэт абоны царды уавӕрӕн йӕ сӕйрагдӕр аххосӕгтӕ хурмӕ ракалдта. Хыгъд дӕтты ацы ӕнӕхъола сӕрзилӕджджын дугӕн:

Нӕ дам-думтӕ хӕлуарӕг тынтӕ не сты —

Ӕндон рӕхыстӕ — атонӕн сын нӕй,

Фӕныкзӕйау дзӕнгадайы бын фестӕм,

Нӕ зонд ӕмӕ нӕ зӕрдӕ сты фынӕй.

Ӕмдзӕвгӕ, раст цыма абоны ӕдзӕллаг царды хуызист у. Поэты сфӕлдыстады хъару, йе стыр курдиат тынгдӕр рабӕрӕг сты йӕ дырӕнхъонты, цыппаррӕнхъонты ӕмӕ, кӕй зӕгъын ӕй хъӕуы, йӕ сонетты. Акӕс-ма, йӕ иу сонеты цы диссаджы хъуыды бавӕрдта:

Мӕ цӕссыгтӕй мӕ сау рӕхыстӕ фехсын,

Цӕмӕй сӕ тагъддӕр бахӕра ызгӕ!..

Йӕ цыбыр миниатюрӕты Къадзайы-фырт схызти афоризмты ӕмвӕзадмӕ:

«Ӕгӕр хорз дӕр. Куыд нӕ у хорз, гъе афтӕ

Ӕгӕр ӕвзӕр куы нӕ уаид ӕвзӕр»…

«Йӕ усы афтӕ бирӕ уарзта,

Йӕ сӕрыл ын ӕнгузтӕ саста»…

Ныры хицӕуттӕй зӕгъы:

«Цӕхх нын ныууагътой аслам, —

Стигъын ӕнцондӕр нӕ царм».

Ацы чысыл пьесӕтӕн, (Белинский  афтӕ хуыдта ӕмдзӕвгӕ) сӕ ас цы нӕ у, уый бӕрц сӕ поэзи ӕмынхъызт кӕны, сӕ былтӕй кӕлы. Поэт йӕ хъус тынг дары ирон адӕмы фольклормӕ, стӕй адӕмы ныхасыздӕхтытӕм. Зонгӕтӕн, хӕстӕджытӕн, ӕмбӕлттӕн, сгуыхт адӕймӕгтӕн сӕ ном ссары аив дзырдӕй. Зарджытӕ дӕр иу ӕмӕ дыууӕ нӕ ныффыста. Йӕ райгуырӕн хъӕу Кировыл дӕр скодта зӕрдӕбын зарӕг. Ныййарӕг мадыл фыст мотивтӕ дӕр стыр бынат ахсынц йе сфӕлдыстады. Ӕмдзӕвгӕтӕ «Дыууӕ мады», йӕхи мад «Баринӕйӕн», «Нӕ фӕтчы уӕлмӕрдтӕй хӕссын» — адӕймаджы ныккӕрзын кӕнынц.

Ацы ӕмдзӕвгӕтӕ бирӕтӕн ӕрымысын кӕнынц сӕхи мадӕлты.

Мӕ хо мӕм куы ‘рбацӕуы, уӕд сӕ цалдӕр хатты бакӕсы йӕ цӕссыгтӕ ныхъуыргӕйӕ.

Къадзаты Станиславӕн йӕ бон баци адӕмы йӕхимӕ ӕрыхъусын кӕнын. Уымӕн ис абон дӕр, ӕмӕ йын уыдзӕн райсом дӕр. Ахӕм поэттыл хур нӕ ныгуылы. Рӕстӕг сын ницы хъомыс у.

Бырнацты Барон,

поэт, Михайловскыхъӕу

ОСТАВЬТЕ ОТВЕТ

Please enter your comment!
Please enter your name here