Ӕнусты сӕрты — рӕсугъд фидӕнмӕ

0
12

Ирыстоны рӕсугъддӕр ӕрдзон бынаты, Уӕлладжыры комы ӕрбынӕттон ис Уыналы хъӕу. Хурӕфсӕст зӕххытӕн сӕ алыварс урссӕр ӕнусон къӕдзӕхтӕ, сӕ къуылдымтыл бӕзджын хъӕдтӕ, ис дзы дыргъдӕттӕ, стӕй, 18-19 ӕнусмӕ чи хауы, ахӕм архитектурон ӕмӕ культурон цыртдзӕвӕнтӕ.

Цыппар сӕдӕ азӕй фылдӕр рацыд, ацы зӕххыл фыццаг хатт лӕг куы ӕрцард, ӕрыдоны цӕугӕдоны был йӕ бинонтӕн цӕрӕн хӕдзар куы скодта, уӕдӕй нырмӕ. Уыдис Цӕллагты мыггагӕй. Сыгъдӕг суадӕттӕ, сойджын уыгӕрдӕнтӕ, ӕлутон уӕлдӕф адӕймаджы сӕхимӕ ӕлвӕстой. Афӕдзӕй-афӕдзмӕ хъӕу рӕзыдис. Адӕм кодтой зӕххы куыст, дардтой фос, бӕрзонд хӕхбӕсты арӕзтой хӕдзӕрттӕ. Афтӕ фӕзындысты ног хъӕутӕ — Зынцъар, Быз, Донысӕр, Дагом, Холст, Инджынтӕ, Луар, Цъамад…

Ирыстоны фыццагдӕр скъолатӕй иу сарӕзтой Уыналы, адӕмы удӕнцойӕн дзы советон рӕстӕг куыстой Культурӕйы хӕдзар, амбулатори, посты хайад ӕмӕ библиотекӕ. Йӕ куысты ӕнтыстдзинӕдтӕй хъуыстгонд уыдис бынӕттон колхоз, хорз дзы задысты хор ӕмӕ халсартӕ, дардтой бирӕ стурвос. Уӕдӕ уынайлаг хӕрзад  дыргъты кой айхъуыст дӕрдтыл, куыд зӕгъынц, афтӕмӕй паддзахы фынгыл дӕр сфидыдтой. Абон дӕр цӕрджытӕй рох нӕу Цӕллагты Дженардыхъойы ном, дурджын хохаг зӕххытыл уый диссаджы дыргъдон скодта, йӕ сырхварс фӕткъуытӕн, йӕ бур кӕрдотӕн ӕмбал нӕ уыдис. 1966 азы Парижы уыдис хъӕууонхӕдзарадон равдыст, уым уынайлаг донджын кӕрдотӕн саккаг кодтой сыгъзӕрин майдан.

Абон Уыналы цӕры 42 бинонтӕ, цӕрджыты нымӕц у 250 адӕймаджы. Фӕлӕ, Уынал йӕ райгуырӕн хъӕуыл чи нымайы, йӕ рӕсугъд фынты дӕр ӕй чи уыны, уыцы адӕм тынг бирӕ сты. Уымӕн ӕвдисӕн — ивгъуыд къуыри, Уыналы 410 азы бӕрӕгбон куыд рӕсугъд ӕмӕ парахат рауад, уый.

Культурӕйы хӕдзармӕ ӕрбамбырд сты бынӕттон цӕрджытӕ. Ацы хъӕуӕй рацӕуӕг адӕм Ирыстоны алы къуымтӕй, уымӕн ӕмӕ ам сты сӕ уидӕгтӕ, ардыгӕй райдыдта сӕ бинонты истори. Хӕдахуыр нывгӕнӕг Бырциаты Жаннӕ бацӕттӕ кодта йӕ куыстыты цымыдисаг равдыст, фенӕн дзы уыдис национ сувениртӕ, бирӕтӕ бабӕрӕг кодтой Цӕллагты мыггаджы мӕсыг ӕмӕ этнографион музей.

Уынайлӕгты циныл бацин кӕнынмӕ, арфӕтӕ сын ракӕнынмӕ ӕрбацыдысты кадджын уазджытӕ: РЦИ-Аланийы Хицауады Сӕрдары хӕдивӕг Фадзайты Ӕхсарбег, республикӕйы муниципалон арӕзтӕдты Советы РЦИ-Аланийы Сӕргълӕууӕджы ӕххӕстбарджын минӕвар Геннадий Родионов, Парламенты депутат Ӕчеты Неля, Алагиры районы минӕвӕртты ӕмбырды сӕрдар Цогойты Феликс. Республикӕйы Сӕргълӕууӕг Битарты Вячеславы номӕй Фадзайы-фырт арфӕ ракодта бӕрӕгбоны архайджытӕн.

— Цӕмӕй уӕ цардӕй райгонд уат, цӕмӕй нӕ хӕхбӕстӕм цард раздӕха, ууыл архайы, ӕнӕмӕнгӕй, бынӕттон хицауад. Хъуамӕ алы хӕдзары дӕр уа рухс, дон, ӕрдзон газ ӕнцонвадат уой медицинон ӕмӕ ӕндӕр лӕггӕдтӕ. Дарддӕр дӕр республикӕйы разамынд ӕххуыс кӕндзӕн Уыналы социалон райрӕзтӕн, — загъта Фадзайты Ӕхсарбег.

Кадджын бӕрӕгбоны фӕдыл сын раарфӕ кодта Алагиры районы сӕргълӕууӕг Бутаты Арсен дӕр.

— Уыналы фидауц, йӕ фидӕн сымах стут, — йӕ цӕрджытӕ, уӕ хъӕуы администрациимӕ иумӕйагӕй уӕ къухы ӕнтыстдзинӕдтӕ ӕфты. Йӕ кары бацыд Уынал, сӕххӕст ыл 410 азы, фӕлӕ сымах фӕрцы нырма бирӕ бӕрӕгбонтӕ кӕй сбӕрӕг кӕндзӕн, адӕмӕн дзы хӕрзвадат цард кӕй уыдзӕн, уый нӕ уырны — загъта уый. Районы сӕргълӕууӕджы къухӕй Кады грамотӕтӕ райстой Черчесты Барис, Цогойты Константин. Дзоцойты Ольгӕ, Быгъуылты Маргаритӕ, Хъайттаты Валентинӕ ӕмӕ иннӕтӕ, хъӕубӕсты ӕхсӕнадон царды разӕнгардӕй кӕй архайынц ӕмӕ бирӕ азты ӕнӕзӕрдӕхудт фӕллой кӕй кӕнынц, уый тыххӕй.

Уыцы бон Кады грамотӕтӕ райстой бынӕттон администрацийы сӕрдар Мӕргъиты Тамерлан ӕмӕ администрацийы специалист Габолаты Светланӕ дӕр.

Йӕ уарзон хъӕубӕстӕм, йе ‘нгом цӕрджытӕм уарзондзинадимӕ баст уыд йӕ ныхас хъӕуыхицау Мӕргъиты Тамерланӕн. Ивгъуыд рӕстӕгӕй хатдзӕгтӕ кӕнгӕйӕ, фӕнысан кодта, Уынал кӕй архайы федералон, регионалон ӕмӕ муниципалон программӕты ӕмӕ дзы  хорзӕрдӕм ивддзинӕдтӕ кӕй цӕуы, уый. Гӕнӕнтӕ дзы фӕзындзӕн туризмы ӕмӕ дыргъцӕхӕрадӕтты райрӕзтӕн, ӕрыгон бинонтӕ здӕхынц сӕ фыдӕлты уӕзӕгмӕ, ног хӕдзӕрттӕ дзы аразынц. Уый та у рӕзты нысан. Уынайлӕгтӕ сӕрыстыр сты сӕ зындгонд ӕмзӕххонтӕй, — ахуыргонд, медицинон наукӕты доктор Цогойты Фирӕйӕ, Уӕрӕсейы ӕмӕ РЦИ-Аланийы адӕмон артисткӕ, музыкалон театры солисткӕ Цӕллагты Эмилияйӕ, РЦИ-Аланийы сгуыхт нывгӕнӕг, Уӕрӕсейы нывгӕнджыты цӕдисы уӕнг Цӕллагты Викторӕй ӕмӕ ма бирӕ ӕндӕр зындгонд адӕм кад скодтой сӕ хъӕубӕстӕн.

Уыцы бон бирӕ арфӕйы ныхӕстӕ райхъуыст, уыдис дзы лӕвӕрттӕ дӕр — республикӕйы Сӕргълӕууӕгӕй ӕмӕ районы хицауӕй, Цӕгат Ирыстоны паддзахадон Ирон академион театрӕй. Сӕ музыкалон лӕвӕрттӕй адӕмы зӕрдӕтӕ барухс кодтой нӕ республикӕйы зындгонд ӕмӕ хӕдахуыр артисттӕ. Дардмӕ хъуыст ирон фӕндырдзагъд!

Гугкаты Жаннӕ

ОСТАВЬТЕ ОТВЕТ

Please enter your comment!
Please enter your name here