Равдисдзысты арӕхстдзинад, сӕрӕндзинад

0
30

Къуырийы кӕрон, 21 ӕмӕ 22 сентябры, Цӕгат Ирыстоны цӕрджытӕ сбӕрӕг кӕндзысты Республикӕйы ӕмӕ Дзӕуджыхъӕуы бонтӕ.

Сабаты, Терчы былгӕрон, Хъесайы-фырты уынджы, байгом уыдзӕн ирон чъиритӕ, цыхт ӕмӕ бӕгӕныйы фестивал-ерыс. Уымӕй дарддӕр ма ам уыдзӕн дзыллон физкультурон-спортивон бӕрӕгбон дӕр. Уӕдӕ 58-ӕм ӕфсад дӕр ахсджиагӕй бацархайдзӕн бӕрӕгбоны.

Ирон чъириты фестивал алы аз дӕр ӕрӕмбырд кӕны мингай адӕймӕгты, уыдонӕй иутӕ февдисынц сӕ арӕхстдзинад, иннӕтӕ та дзы райсынц ӕхсызгондзинад. Ацы аз дзы архайдзысты сыхаг регионты минӕвӕрттӕ дӕр. Кӕй бафӕнда, уыдонӕн дӕр уыдзӕн чъиритӕ кӕныны бацархайыны фадат. Ацы рӕсугъд хъуыддагыл Дзӕуджыхъӕуы бынӕттон хиуынаффӕйады администрацийӕ уӕлдай бакуыстой Базарадон-экономикон техникумы специалисттӕ дӕр.

Фестивалы фӕлгӕты сӕ продукци рӕгъмӕ рахӕсдзысты ирон цыхтуадзӕг бынӕттон амалхъомтӕ. Бӕрӕгбоны уазджытӕн сӕрмагонд равдыст-армукъайы уыдзӕн цыхт балхӕныны фадат. Уымӕй дарддӕр, ирон бӕгӕны кӕнынмӕ чи арӕхсы, уыдоны бон уыдзӕн Ирон бӕгӕныйы IV-ӕм дунеон фестивалы ӕвзарӕн хайы бацархайын. Уӕдӕ спорт ӕмӕ физкультурӕмӕ ӕмхиц чи у, уыдон дӕр сӕхицӕн ссардзысты ирхӕфсӕн хъуыддӕгтӕ. Уыдзӕн дзы футболӕй, баскетболӕй, нырыккон цирхътӕй хӕцынӕй ерыстӕ, ӕндӕр цымыдисаг хъӕзтытӕ. Уазджытӕн ӕхсызгон уыдзӕн, 58-ӕм ӕфсад цы хӕстон равдыст бацӕттӕ кодта, уый фенын дӕр. Уыдзӕн дзы хӕстон техникӕ, уӕлӕдарӕс, быдырон хӕринаггӕнӕн ӕмӕ ӕндӕртӕ.

Дзӕуджыхъӕуы бынӕттон хиуынаффӕйад пресс-службӕ

ОСТАВЬТЕ ОТВЕТ

Please enter your comment!
Please enter your name here