Тибаг лӕппу — нӕ дуджы хъайтар

0
20

Нӕ номдзыд ӕмзӕххон Кучиты Юриимӕ базонгӕ дӕн Хуссар Ирыстоны ивгъуыд ӕнусы, 70-ӕм азты кӕрон Дзауы санаторийы йӕ фӕллад куы уагъта, уӕд. Юри бирӕ уарзта йӕ фыдӕлты уӕзӕгмӕ цӕуын, бирӕ уарзта Хуссар Ирыстонмӕ цӕуын дӕр, цалдӕр хатты йӕ фӕллад уагъта  хъуыстгонд  санатори «Дзау»-ы.

Ӕз  куыд ӕхсӕнад «Зонынад»-ы лектор, афтӕ Дзауы санаторийы ӕмӕ фӕсивӕдон лагерты  кастӕн лекцитӕ, адӕмы зонгӕ  кодтон Ирыстон ӕмӕ ирон адӕмы историимӕ. Иу бон санаторимӕ лекци кӕсынмӕ ссыдтӕн зынгӕ ирон историк Тогойты Георгиимӕ. Уый къуыри иу хатт цыд Тбилисӕй Цхинвалы пединститутмӕ лекцитӕ кӕсынмӕ, ӕмӕ уыцы-иу рӕстӕг  лекцитӕ каст куыстуӕтты ирон-гуырдзиаг ахастдзинӕдты тыххӕй рагзамантӕй фӕстӕмӕ. Иу бон раздӕр мӕм ӕрбадзырдта телефонӕй, ӕмӕ баныхас кодтам, цӕмӕй дыууӕйӕ  бакӕсӕм нӕ лекцитӕ иу бон, сахаты бӕсты фӕйнӕ 30 минуты. Залмӕ куы бахызтыстӕм, уӕд  кӕсын, ӕмӕ ӕппӕты разӕй бадынц Кучиты Юри ӕмӕ  киноныв  «Фатимӕ»-йы режиссер Уалыты  Владимир.

Лекцийы рӕстӕг Ирыстоны номдзыд адӕмы кой куы кодтон, уӕд, кӕй  зӕгъын ӕй хъӕуы, Кучиты Юрийы кой дӕр скодтон, куыд Советон Цӕдисы ихсӕттӕг атомон наутӕ «Мурманск», «Киев» ӕмӕ «Ленин»-ы капитан, афтӕ. Фенын сын кодтон, Кучийы-фырт ӕмӕ  Гагарин иумӕ цы къам систой, уый дӕр. Кучийы-фыртмӕ сын куы ацамыдтон, мӕнӕ мӕ разы бады, зӕгъгӕ, уӕд сыстад, ӕмӕ йын адӕм нымдзӕгъд кодтой.

Лекцийы фӕстӕ  Юри, Владимир ӕмӕ  Георгийы нӕхимӕ ахуыдтон, ӕмӕ  фынджы уӕлхъус фӕныхас кодтам. Бирӕ цымыдисаг хабӕрттӕ фӕкодтой, ӕмӕ сӕм хъусынӕй не ‘фсӕстӕн. Се ‘ртӕ дӕр уыдысты бынтон хуымӕтӕг адӕймӕгтӕ, фылдӕр фарстой кӕрӕдзийы, сӕхи кой та кодтой, ӕфсӕрмыгӕнгӕйӕ.

1977 азы августы мӕйы райдианы цӕйдӕр тыххӕй бауадтӕн Дзауы санаторийы директормӕ ӕмӕ йӕ кабинеты рахизӕны амбӕлдтӕн Юрийыл. Куы мӕ ауыдта, уӕд мыл атыхст ӕмӕ мын афтӕ:

— Хорз у, кӕй  дӕ федтон, уый. Ӕвӕстиатӕй мӕм Мурманскмӕ дзурынц, ӕмӕ директорӕн хӕрзбон зӕгъынмӕ ӕрбауадтӕн, дуармӕ мӕм машинӕ ӕнхъӕлмӕ кӕсы.

— Цы хабар у, цӕй тыххӕй дӕм дзурынц?

— Хъазыбег, мӕ бон  дын бӕлвырдӕй  зӕгъын ницы у, фӕлӕ, рагӕй цӕмӕ бӕллын, кӕд уый мӕ къухы бафта, уӕд ӕй тагъд фехъусдзынӕ…

Ууыл рацыдаид дыууӕ къуырийы бӕрц, афтӕ 17 августы ӕгас дунейы мыхуыры фӕрӕзтӕ фехъусын кодтой, ирон лӕг капитан цы ихсӕттӕн «Арктикӕ»-йӕн  уыд, уый дунейы историйы фыццаг хатт кӕй афсӕрста, Цӕгат полюсы зӕххы мередиантӕ кӕм иу кӕнынц, уырдӕм. Юрийӕн йӕ ном айхъуыст ӕнӕхъӕн дунейы. Ӕппӕт бӕстӕты мыхуыры фӕрӕзтӕ йӕ ӕвӕрдтой  Гагарины ӕмрӕнхъ. Уыцы балцы фӕстӕ йын  Леонид Брежнев  йӕ риуыл бакодта Социалистон Фӕллойы Хъӕбатыры стъалы.

Уый фӕстӕ дӕр ма, Юри цалдӕр хатты йӕ фӕллад уагъта  Дзауы курорты, ӕмӕ-иу кӕддӕриддӕр ӕхцондзинад истон нӕ фембӕлдтытӕй.  ӕндӕр исчи, Цӕгат полюсмӕ ахӕм ӕрдхӕрӕны балцы фӕстӕ, уымӕй дӕр ӕнӕхъӕн дунейы хъуыстгонд чи ссис, уый  сӕрбӕрзондӕй кастаид йӕ алыварс адӕммӕ, фӕлӕ  Юри ӕппындӕр нӕ аивта. Афтӕ мӕм касти, цыма  ноджы хуымӕтӕгдӕр, ӕфсӕрмдзӕстыгдӕр фӕци.

90-ӕм азты райдианты дунейы ӕрцыд бирӕ ивындзинӕдтӕ, хъыгагӕн, фылдӕр трагикон цаутӕ… Бӕстӕтӕ ӕмӕ адӕмтӕ схӕццӕ сты, ныппырх Советон Цӕдис. Нӕ фыдбоны сыхӕгтӕ ныл Хуссары дӕр ӕмӕ Цӕгаты дӕр туджы зӕйтӕ рауагътой. Ирыстоны ма ӕрцыд бирӕ ӕрдзон бӕллӕхтӕ дӕр. Стыр трагикон зӕххӕнкъуысты рӕстӕг ныппырх, Кучиты Юри улӕфын  кӕм уарзта, уыцы  санатори дӕр.

2000 азы Абайты Васойӕн йӕ 100 азы юбилей Мӕскуыйы куы бӕрӕг кодтой, уӕд ӕз дӕр уыдтӕн Хуссар Ирыстоны делегациимӕ. Уым Кучийы-фыртимӕ сӕмбӕлдыстӕм ӕмӕ кӕрӕдзиуыл фӕцин кодтам, стӕй  иумӕ лӕууыдыстӕм  залы. Дыууӕ сылгоймаджы мӕм ӕрбахастой мӕ чингуытӕ «Осетия и осетины» (уым сӕ фоэйы  уӕй кодтой) ӕмӕ мӕм бахатыдысты, цӕмӕй сын сӕ чингуытыл мӕ къух ӕрӕвӕрон. Юри мӕ мӕ къух ӕвӕргӕ куы ауыдта, уӕд мӕ дисгӕнгӕйӕ афарста:

— А почему у тебя просят автограф, ты автор этой книги? Ты же Келехсаев, а там автор — Челехсаты.

Йӕ ныхӕстӕй куыд рабӕрӕг, афтӕмӕй йын 90-ӕм азты ӕмбисы  Галазты ӕхсарбег ацы чиныг балӕвар кодта. Фыццаг чиныг рацыдис 1994 азы Бетъырбухы ӕмӕ, кӕй зӕгъын ӕй хъӕуы, чиныджы Юри дӕр ис йӕ къамимӕ, стӕй бирӕ ӕрмӕджытӕ йӕ биографийӕ. Иуныхасӕй, бирӕ дзы феппӕлыд,  Ирыстоны номдзыд адӕмӕй, дам, бирӕты дӕ чиныджы фӕрцы базыдтон.

2003 азы мӕм сӕрды Бетъырбухӕй телефонӕй ӕрдзырдта Хуссар Ирыстоны минӕвар Пухаты Алан ӕмӕ мын афтӕ зӕгъы:

—  Кучиты Юрийы фӕнды Хуссар Ирыстонмӕ ацӕуын, ӕмӕ мын дӕ кой скодта, фӕлӕ дӕ ӕфсӕрмы кӕны. Дыууӕ боны размӕ ацыд Дзӕуджыхъӕумӕ, ӕмӕ ныртӕккӕ ис йӕ хӕрӕфыртмӕ.

Ӕз ӕм уайтагъд Дзӕуджыхъӕуы балӕууыдтӕн.  Мӕ цыды сӕр ын куы  бамбарын кодтон, уӕд ныфсӕрмытӕ ис ӕмӕ ма афтӕ зӕгъын сфӕрӕзта:

— Ныр уӕ куыд батыхсын кӕнон?

— Дӕу хуызӕн лӕг, цы хӕдзары уазӕг уа, уыцы бинонтӕ сӕхи хъуамӕ амондджын хоной.

Цыдӕр зӕгъынмӕ ма хъавыд, фӕлӕ йӕ  дзурын нал суагътон. Хуссармӕ цӕугӕйӕ, фӕндагыл бирӕ рӕтты ӕрлӕууыдыстӕм, бирӕ цӕмӕдӕрты каст цымыдисӕй, ӕмӕ йын сӕ лӕмбынӕг ӕмбарын кодтон. Нары ма Къостайы хӕдзары цур къамтӕ дӕр систам. Тъунелӕй куы ахызтыстӕм, уӕд телефонӕй адзырдтон Президенты администрацийы  сӕргълӕууӕгмӕ, зӕгъын, Юриимӕ Дзаумӕ фӕцӕуын исчи  уӕ ӕрбацӕуӕд, ӕмӕ уӕ йемӕ базонгӕ кӕнон. Мӕ хӕдзары цурмӕ куы бацыдыстӕм,  уӕд  уыдон дӕр — цалдӕр бӕрнон кусӕджы — ӕрбахӕццӕ сты.

Цӕмӕдӕр гӕсгӕ, бирӕтӕ афтӕ хъуыды кӕнынц, ирон фынгыл  нуазӕн алкӕмӕ дӕр ӕмбӕлы дӕттын, алчидӕр ӕй хъуамӕ баназа. Мӕ хъуыдымӕ гӕсгӕ та, нуазӕн  алкӕмӕн  дӕттын нӕ хъӕуы.  Ирон кады нуазӕнӕн йӕ ном  йӕ уӕлӕ ис, дӕттын ӕй хъӕуы, ӕцӕгӕйдӕр нуазӕны аккаг чи у, ахӕм номдзыд, кадджын ӕмӕ нымад адӕмӕн. Цӕмӕн дзурын уый тыххӕй? Фынгыл куы ‘рбадтыстӕм, уӕд цалдӕр сидты фӕстӕ сыкъайы сӕн ӕркӕнын кодтон. Хуссар Ирыстоны нуазӕн фылдӕр сыкъайӕ фӕдӕттынц, ӕмӕ дзурын:

— Мӕ хӕдзары фыццаг хатт уынын номдзыд ӕмӕ кадджын ирон лӕг Кучиты Юрийы ӕмӕ мӕ фӕнды, цӕмӕй кады нуазӕн мӕ къухӕй айса. Юри сыстад ӕмӕ нуазӕн айста, зӕрдиагӕй мын ракуывта ӕмӕ йӕ анызта.

2005 азы октябры мӕйы Дзӕуджыхъӕуы цыд ирон адӕмы фӕндзӕм съезд ӕмӕ Юри дӕр уыд уым. Улӕфты рӕстӕг залӕй рацӕйхызт  ӕмӕ мыл дуары цур хӕрхӕмбӕлд фӕци, йӕ къухы уыди цыдӕр папкӕ. Кӕрӕдзийӕн салам куы радтам, уӕд мын афтӕ:

— Мӕнӕ ацы папкӕйы ис цыдӕр ӕрмӕджытӕ мӕ царды фӕндӕгты тыххӕй.  Зонын ӕй, ды сӕ дӕ куыстыты спайда кӕндзынӕ, ӕмӕ дын сӕ дӕттын, дӕуӕн сӕ ӕрхастон Питерӕй.

Юри дыууӕ къуырийы бӕрц фӕцис Дзауы, фыццаг мӕнмӕ цалдӕр боны, стӕй та, Хуссар Ирыстоны хицауады кадджын уазджытӕ ӕхсӕвиуат кӕм фӕкӕнынц, уым. Хуссар Ирыстоны уӕды Президент куы базыдта, Юри мӕнмӕ ис, уый, уӕд мӕм уазджыты резиденцийы директоры ӕрбарвыста, бирӕ кӕйдӕрты фӕнды йемӕ фембӕлын ӕмӕ йӕ ЦИК-ы хӕдзармӕ (афтӕ йӕ хонынц рагӕй) рауадз, зӕгъгӕ. Юри  тынг ӕфсӕрмы кодта, кӕд нӕ тыхсын нӕ кодта, уӕддӕр. Юри уыд бынтон хуымӕтӕг,  йӕ «ӕз»-ӕн бирӕтау стыр нысан нӕ лӕвӕрдта. Тынг хъыг кодта Советон Цӕдис кӕй фехӕлд, ууыл. Бирӕ  уарзта  хуымӕтӕг адӕмы,  стыр аргъ  кодта, бирӕ азты дӕргъы кӕимӕ фӕкуыста, уыдонӕн.

Йӕ царды уавӕрты тыххӕй дзы ӕрмӕстдӕр иу хатт фехъуыстон.

— Рагӕй цы францусаг стыр науы командиримӕ уыдтӕн зонгӕ, уый мӕ ӕрӕджы йӕхимӕ ахуыдта, ӕмӕ йӕм цалдӕр боны фӕдӕн, Парижы горӕтгӕрон ын цы ӕртӕуӕладзыгон стыр галуан ис, уым. Ныр уый дӕр ӕнхъӕлмӕ кӕсы мӕ хуындмӕ. Куы йӕ ‘рбахонон, уӕд мӕм  иунӕгӕй не ‘рбацӕудзӕни. Сӕ бинонтӕ, сӕ байзӕттӕгтимӕ цӕуынц уым уазӕгуаты. Куы сӕ ‘рбахонон, уӕд кӕм цӕрдзысты, мӕ фатеры? Куы йыл ахъуыды кӕнын, уӕд мӕ цӕсгом ссудзы, уый бӕсты йӕм куы нӕ уыдаин уазӕгуаты, худинаг  мӕм кӕсы, — загъта ӕнкъардӕй ӕмӕ арф ныуулӕфыди.

Юри тынг цымидис уыди куыд нӕ рагфӕдӕлты, афтӕ нырыккон ирон историйы фарстытӕм дӕр. Нӕ номдзыд адӕмы кой-иу ын куы кодтон, спортсменты кӕнӕ аивады дӕсныты сгуыхтдзинӕдты тыххӕй, уӕд-иу йӕ уадултыл цины цӕссыгтӕ фӕзынди. Иу бон мын афтӕ зӕгъы:

— Хъазыбег, фӕнды мӕ дӕуӕн стыр бузныг зӕгъын. Ӕз фыццаг дӕ чиныджы фӕрцы, стӕй та комкоммӕ дӕхицӕй бирӕ цыдӕртӕ базыдтон Ирыстон ӕмӕ ирон адӕмы номдзыд фыртты тыххӕй. Хъыгагӕн, мӕнӕн уый фадат нӕ уыди раздӕр,  мӕ царды фылдӕр бонтӕ Ирыстоны нӕ арвыстон. Уыцы номдзыд адӕмӕй кӕйдӕртимӕ ӕз дӕр зонгӕ уыдтӕн. Бирӕтӕ дзы ӕгас нал сты, фӕлӕ ам кӕй нӕ цардтӕн, уый тыххӕй сын сӕ уӕлмӕрдтыл мӕ къух дӕр никуы авӕрдтон. Худинаг мӕм кӕсы йӕ зӕгъын, фӕлӕ ныронг Къостайы уӕлмӕрдмӕ дӕр никуы бафтыдтӕн, кӕд бирӕ хӕттыты фӕнд кодтон, уӕддӕр.

Йӕ фӕстаг ныхӕстӕ загъта тынг ӕрхӕндӕгӕй, ӕмӕ йын зӕрдӕ бавӕрдтон:

—  Юри, мӕнӕ ма уӕ райсом хицауад хонынц ноджы иу фембӕлдмӕ Цхинвалы  цӕрджытимӕ, ӕмӕ уал уырдӕм ацӕуӕм. Стӕй   Дзӕуджыхъӕумӕ ацӕудзыстӕм ӕмӕ пантеонтыл фӕзилдзыстӕм. Дыккаг бон ын хицауад хорз фембӕлд сарӕзта горӕты цӕрджытимӕ. Бирӕ фарстытӕн сын ӕхсызгонӕй дзуаппытӕ фӕлӕвӕрдта. Куыстуӕтты ӕмӕ организациты разамонджытӕ йын зӕрдылдарӕн лӕвӕрттӕ дӕр ын радтой. Нымӕт ӕмӕ йын фысы цармӕй худ сценӕйы йӕ уӕлӕ  скодтой ӕмӕ йын  йӕ къамтӕ систой. Фембӕлдӕй  куы рацыдыстӕм, уӕд мын афтӕ:

— Ацы нымӕт ӕмӕ худ мын чи балӕвар кодта, уыдонӕн — бузныг. Ирон лӕгӕн зынаргъ дзаумӕттӕ сты. Фӕлӕ сӕ мӕнӕй  уӕлдай ды искуы спайда кӕндзынӕ, ӕмӕ дӕм сӕ  уадзын, хӕдтӕхӕгыл мын сӕ аласын  зын уыдзӕн…

Ныртӕккӕ уыцы нымӕт ӕмӕ худ Юрийы номыл  ауыгъд сты мӕ хӕдзары музейы Дзауы.

Иугӕр ныхас загътай,  уӕд ӕй ӕххӕст кӕнын хъӕуы. Дыууӕ боны фӕстӕ йӕм Дзауӕй Дзӕуджыхъӕумӕ ацыдтӕн, ӕмӕ  фыццаг фӕзылдыстӕм Ирон аргъуаны цур пантеоны, Къоста, Васо ӕмӕ иннӕ номдзыд адӕм кӕм ныгӕд сты, уым, сӕ цыртыты раз сын дидинджытӕ сӕвӕрдтам. Бирӕты дзы зыдта, кӕй нӕ зыдта, уыдоны тыххӕй та йын, мӕ бон цас уыд, уыйас  ӕз радзырдтон. Уый фӕстӕ та  ацыдыстӕм, Арвыкоммӕ фӕндагыл цы «Намысы аллей» ис, уырдӕм ӕмӕ уым дӕр фӕзылдыстӕм. Цы нӕ фӕцыд йӕ зӕрдӕмӕ, нӕ номдзыд адӕмы уӕлмӕрдты? Иутӕн, дам, бынтон стыр ӕмӕ зынаргъ  цыртдзӕвӕнтӕ ис, иннӕтӕн та, кӕд сӕ лӕггад Ирыстоны раз къаддӕр нӕу, уӕддӕр бынтон хуымӕтӕг. Йӕ хъуыдымӕ гӕсгӕ сын хъуыди, сӕ аргъмӕ гӕсгӕ, чысыл ӕмхуызондӕр цыртытӕ сӕвӕрын.

Иу изӕр ныхӕстӕ кӕнӕм ӕмӕ дзы фехъуыстон  уӕззау фӕнд.

— Мӕ цардӕмбал фӕзиан цалдӕр азы размӕ ӕмӕ  йӕ  кремаци скӕнын кодтон. Афтӕ мӕ фӕнды, цӕмӕй ӕз дӕр куы амӕлон, уӕд мӕн дӕр  кремаци скӕной, ӕмӕ  нын не ‘ртхутӕг Цӕгат полюсы  апырх кӕной. Ахӕм фӕндон фысгӕ дӕр ныккодтон, — загъта ӕрхуымӕй ӕмӕ   йӕ къӕхты бынӕй ныуулӕфыд.

Намысы Аллейы фӕразил-базил кодтам, стӕй йӕ хӕрӕфырты хӕдзармӕ  ацыдыстӕм,  цай цымӕм, ӕмӕ мын Юри  дзуры:

— Стыр бузныг дын, Ирыстоны номдзыд адӕмӕй чи фӕхъуыд, уыдоны уӕлмӕрдтӕ мын кӕй фенын кодтай, уый тыххӕй. Рагӕй бӕллыдтӕн сӕ фенынмӕ.

Кучиты  Юрийы райгуырдыл  сӕххӕст сӕдӕ азы. Уырны мӕ, йӕ ном ын бирӕ ӕнусты дӕргъы хистӕрӕй кӕстӕрмӕ кӕй дӕтдзысты, ӕмӕ дзы сомбоны ирон фӕлтӕртӕ сӕрыстыр кӕй уыдзысты, уый.

Челӕхсаты Хъазыбег

ОСТАВЬТЕ ОТВЕТ

Please enter your comment!
Please enter your name here