Республикӕйы боны кадӕн

0
34

Знон Дзӕуджыхъӕуы администрацийы культурӕйы управленийы сӕргълӕууӕг Мӕрзойты Руслан сарӕзта пресс-конференци нӕ республикӕйы дзыллон хабархӕссӕг фӕрӕзты минӕвӕрттимӕ. Ныхас дзы цыд, РЦИ-Аланийы бӕрӕгбонмӕ цавӕр мадзӕлттӕ арӕзт цӕуы, уый тыххӕй.

21 ӕмӕ 22 сентябры нӕ республикӕйы цӕрджытӕ сбӕрӕг кӕндзысты ӕртӕ бӕрӕгбоны: Цӕгат Ирыстон Уӕрӕсеимӕ баиуы 245 азы, Цӕгат Ирыстоны автономон республикӕйы равзӕрды 95 азы ӕмӕ Дзӕуджыхъӕуыл 235 азы  сӕххӕсты бӕрӕгбонтӕ. Ацы аз фыццаг хатт бӕрӕгбоны мадзӕлттӕ арӕзт ӕрцӕудзысты канд Дзӕуджыхъӕуы нӕ, фӕлӕ ма районты центрты ӕмӕ алы хъӕуы дӕр. Ахӕм бон хъуамӕ ӕппӕт республикӕйы дӕр бӕрӕггонд ӕрцӕуа, бӕрӕгбоны цины ӕнкъарӕнтӕ хъуамӕ йе ‘ппӕт цӕрджытыл дӕр аххӕссой. Районты администрацитӕ сӕхимӕ райстой уыцы хӕс, зӕрдиагӕй ӕмӕ стыр хъӕппӕрисӕй архайынц ацы хъуыддагыл.

Бӕрӕгбоны мадзӕлттӕ бирӕ сты, адӕмӕн сӕ бон нӕ вӕййы горӕты иу кӕронӕй иннӕмӕ афойнадыл бахӕццӕ уӕвын, уымӕ гӕсгӕ цӕрджыты удӕнцойӕн бӕрӕгбоны мадзӕлттӕ цӕудзысты дыууӕ боны.

Ӕхсӕзӕм аз ирон чъириты фестивал ацӕудзӕн Хъесайы-фырты уынджы, Терчы былгӕрон фӕзуаты. Уымӕй уӕлдай ма уыцы ран ацӕудзысты ирон цыхт ӕмӕ бӕгӕныйы, хъӕууон хӕдзарӕдты продукцийы армукъатӕ, бынӕттон фӕллойгӕнджытӕ ӕвдисдзысты сӕ дӕсныйӕдтӕ.

Уӕлдай ӕргом здӕхт ӕрцӕудзӕн нӕ республикӕйы уазджытӕм ӕмӕ туристтӕм. Уый тыххӕй уазӕгуӕтты алы номыры дӕр ссарӕн уыдзӕн буклеттӕ, бӕрӕгбоны мадзӕлттӕ фыст кӕм уыдзысты, ахӕмтӕ. Афтӕмӕй уазджытӕн ӕмӕ туристтӕн сӕ бон уыдзӕн алцыдӕр сӕхи цӕстӕй фенын ӕмӕ ма суанг бӕрӕгбоны  архайын дӕр.

Бӕрӕгбоны мадзӕлтты сӕ бон архайын уыдзӕн куыд хистӕр адӕмӕн, афтӕ сывӕллӕттӕн дӕр. Уый тыххӕй  цӕттӕгонд цӕуы бирӕ алыхуызон программӕтӕ. Се ‘ппӕт нырма организацион комитет ӕргом нӕма кӕны, фӕлӕ цымыдисаг кӕй уыдзысты, уый дызӕрдыггаг нӕу.

Бӕрӕгбон сӕ аив зард ӕмӕ кафтӕй срӕсугъд кӕндзысты нӕ республикӕйы зындгонд ӕмӕ адӕмӕн уарзон зарӕггӕнджытӕ ӕмӕ кафджыты къордтӕ. Ацы концерт ацӕудзӕн национ хуызы, зӕлдзысты дзы ӕрмӕстдӕр ирон зарджытӕ. Терчы был арӕзт ӕрцӕудзӕн дыккаг концертон бынат. Уым 58 ӕфсады службӕгӕнӕг  ӕфсӕддонтӕ акӕндзысты патриотон зарджытӕ. Алы ран дӕр уыдзӕн бадӕн бынӕттӕ. Ӕфсӕддонты хъӕппӕрисӕй арӕзт ӕрцӕудзӕн егъау хӕстон-спортивон равдыст, фенӕн дзы уыдзӕн хӕстон техникӕйы алы хуызтӕ. Ам бӕрӕгбоны уазджытӕн сӕ бон саходын уыдзӕн хӕстон-быдырон хӕринӕгтӕй.

Спортивон фӕзты сывӕллӕттӕ равдисдзысты сӕ арӕхстдзинӕдтӕ спорты алы хуызтӕй. Хуыздӕртӕ хорзӕхгонд ӕрцӕудзысты алыхуызон зӕрдылдарӕн лӕвӕрттӕй ӕмӕ ӕхцайы премитӕй.

Дыккаг бон бӕрӕгбоны мадзӕлттӕ ацӕудзысты Сабырдзинады проспекты. Цӕмӕй адӕмӕн ӕнцондӕр уа ӕмӕ иу ран ма сдзыгуыр уой, уый тыххӕй бӕрӕгбоны мадзӕлттӕ цӕудзысты проспектӕн йӕ  райдайӕнӕй йӕ кӕронмӕ. Алыхуызон музыкалон фестивалтӕ, анимацион хъӕзтытӕ сабитӕн, армукъатӕ ӕмӕ равдыстытӕ бацӕттӕ кодтой нӕ горӕты цӕрджытӕн ӕмӕ йӕ уазджытӕн.

Уый фӕстӕ нӕ горӕты сӕрмӕ суадздзысты цӕхӕркалгӕ салют.

Хъойбайты Галинӕ

ОСТАВЬТЕ ОТВЕТ

Please enter your comment!
Please enter your name here