Сӕ гуымбылтӕ — сойджын

0
17

Црайуаг Дзанӕгаты Георги йӕхи куы хъуыды кӕны, уӕдӕй нырмӕ сӕ бинонтӕ фосдарӕг сты. Йӕ фыд Петр сӕ кӕрты змӕлын уарзы. Ӕнӕбӕркад никуы вӕййынц. Ӕхсыр, цыхт, дзидза, айк сӕ къӕбицы парахатӕй. Цӕхӕрадоны дӕр бинонтӕ иумӕ кусынц, ӕмӕ дзы афӕдзы фӕлхасы фаг фӕллой сисынц.

Петр йӕ бинонты рӕстмӕ хъуыддагыл ӕвӕрын зоны. Фӕллойӕ тыхджындӕр хъомылгӕнӕг нӕй. Уый Георгийӕн гыццылӕй йӕ къухыл «рахӕцыд», ӕмӕ дзы кусӕг лӕг рауади. Боны дӕргъы иу, ӕвдӕлон сахат дӕр кӕмӕн нӕй, ахӕм гуырд. Йӕ фӕндаг зӕрдӕхсайгӕ нӕу.

Георги бинонты фермӕ саразыны куы сфӕнд кодта, уӕд Петр зӕрдӕмӕ уый фӕцыд: «Уыцы хъуыддаджы паддзахад дӕ фарсмӕ ӕрбалӕудзӕн, ӕмӕ ма дӕ каст цӕмӕ у? Хъаруйӕ ӕххӕст дӕ, фӕлтӕрдзинад дӕм ис. Дӕ фыдӕбонӕй куы ницы рауайа, уӕддӕр та исты уыдзӕн… Дӕ куыст дын нӕ байсдзысты, мыййаг, сӕ чъылдым дӕм нӕ сыздахдзысты.»

Уӕдмӕ, Георги институты инженеры дӕсныйад райста. Ӕфсады лӕджы хӕс бафыста. Уӕдӕ, энергетикӕй дӕр акуыста. Иу хъуыддаг — коллективы уӕнг, иннӕ — дӕхӕдӕг дӕхицӕн хицау куы уай, уый. Де ‘фтиӕгтӕ нымайыс. Гӕппӕй дугъ нӕй, уый ӕмбарыс, ӕмӕ алы капеккӕн дӕр йӕ нысан ссарыс.

Паддзахадӕй Грант 400 мин сомы куы райса, уый уӕд хъуыддаг цӕттӕ у. Ӕнӕмӕнг сӕ исты сараздзӕн. Йӕ бон фосы куыст райдайын у. Замманай скъӕт сӕм ис. Йӕ фыдимӕ иуцасдӕр уым галтӕ дардтой. Зын куыст у, фӕлӕ йӕ куы зонай, уӕд дзы ӕнӕпайда нӕ уыдзынӕ.

Георгийыл паддзахад баууӕндыд ӕмӕ йын йӕ къух сарӕзта. Уыцы фӕрӕзтӕй хуыздӕрӕн швециаг мыггагӕй 5 хъуджы балхӕдта. Сӕ ӕхсырдыгъд бӕрзонд у. Фӕлӕ фыццаг аз къуыхцытӕ баййӕфтой. Ӕмӕ куыннӕ! Зынаргъ холлӕгтӕй хъуыддаг тагъд нӕ сырӕзы, уый рабӕрӕг. Цӕттӕ кӕрдӕг цӕмӕй ӕркӕрда, уый йӕм нӕй. Техникӕ ӕххуырсын ӕй бахъуыд. Уӕддӕр ма сӕхи самангӕрдӕг ӕмӕ куыройы руаджы цыдӕр фӕрӕзтӕ райстой.

Куыд фӕстӕмӕ Дзанӕгаты бинонты фермӕйы хъуыддӕгтӕ размӕ ацыдысты, уайтагъд сӕм ӕхсыры базарад рапарахат и. Уый фӕстӕ та — цыхт ахсын райдыдтой. Сӕ гуымбылтӕ сойджын ӕмӕ хӕрзад сты, уый фӕлхасгӕнджытӕ уайтагъд раиртӕстой. Црауы ӕмӕ сын Алагиры сӕрмагонд ӕлхӕнӕг разынд.

Ӕрвылбон дӕр дуцгӕтӕ, куыд ӕмбӕлы, ахӕм зылд ӕййафынц. Уӕгъдӕй сӕ сӕрмагонд бынатмӕ рауадзынц, кӕрдӕгыл дӕр ахизынц, сӕхи дзаг бӕлӕгътыл «аирхӕфсынц». Хъугӕн йе ‘хсыр йе ‘взагыл ис. Ӕххормаг фос не сты. Уымӕ гӕсгӕ ӕхсыр ӕркӕнынц. Сӕ лӕппынвосы иу къордӕй хӕрзмыггаг дыгӕрдгуытӕ рауайдзӕн.

Бинонты фермӕ дарын ӕрвылбоны уӕззау куыст у. Чидӕртӕ йӕм уый тыххӕй сӕ ныфс нӕ хӕссынц. Ӕмӕ бынтон дзӕгъӕлы. Фыдӕбон кӕнын дзы бирӕ хъӕуы, уый сусӕггаг нӕу. Фӕлӕ къӕсӕрӕй дуармӕ дӕ хиды ӕртахы бын бӕркад гуырын райдайдзӕн. Никӕмӕ ӕнхъӕлмӕ кӕсыс, афтӕмӕй дӕ бинонтӕ дарын фӕразыс. Мах заман уый ахсджиаг у.

Дулаты Татьянӕ

ОСТАВЬТЕ ОТВЕТ

Please enter your comment!
Please enter your name here