Цӕрджыты ӕууӕнк бынӕттон хицаудзинадыл

0
23

Республикӕйы экономикон ведомствӕ рӕгъмӕ рахаста Дзӕуджыхъӕуы ӕмӕ районты бынӕттон хиуынаффӕйады оргӕнты архайды ахадындзинады бӕрӕггӕнӕнтӕ 2018 азӕн. Уыцы хатдзӕгтыл Хицауады ӕмбырды ӕрныхас кодта экономикон рӕзты министр Томайты Хъазыбег.

— Фыццагдӕр уал министр фӕбӕрӕг кодта Цӕгат Ирыстон экономикон рӕзты, скъолайы агъоммӕ, иумӕйаг ӕмӕ уӕлӕмхасӕн ахуырады, культурӕ, цӕрӕнуӕтты арӕзтады, граждӕнтӕн цӕрӕнуӕттӕ дих кӕныны, цӕрӕнуӕтты-коммуналон хӕдзарады, физикон культурӕ ӕмӕ спорты, муниципалон разамынд фидар кӕныны ӕмӕ энергетикон ахадындзинад фӕфылдӕр кӕныны цавӕр ӕнтыстдзинӕдтӕм схызт, уыдӕттӕм. Фылдӕр районты рабӕрӕг чысыл ӕмӕ рӕстӕмбис амалхъомады рӕзт.

«Ивгъуыд аз чысыл ӕмӕ рӕстӕмбис амалхъомады куыстуӕтты зилдухад рауад 63,6 миллиард сомы. Чысыл ӕмӕ рӕстӕмбис куыстуӕтты нымӕц дӕр 3990 сырӕзт 4217 онг. Уавӕр хуыздӕр у Дзӕуджыхъӕуы, Алагиры, Ӕрыдоны, Ӕрӕфы, Мӕздӕджы ӕмӕ Рахизфарсы районты. Дыгуры ӕмӕ Кировы районты бӕрӕггӕнӕнтӕ баззадысты раздӕры ӕмвӕзады. Уавӕр февзӕрдӕр Горӕтгӕрон районы», — бафиппайдта Томайы-фырт.

Зӕрдӕрайгӕ уавӕр ис ахуырады дӕр. Республикон ӕмӕ муниципалон хицауад фарон ахъаззагӕй бацархайдтой, цӕмӕй 1 азӕй 6 азмӕ сывӕллӕттӕн рӕвдауӕндӕттӕм фӕзына фылдӕр бынӕттӕ, рад фӕкъаддӕр уа, ууыл. Арӕзт ӕрцыд цыппар ног рӕвдауӕндоны, алкӕй дӕр дзы 120 бынаты (Алагиры, Беслӕны, хъӕутӕ Советскоейы ӕмӕ Мичурины). Дзӕуджыхъӕуы та сарӕзтой 280 бынатимӕ ног рӕвдауӕндон. Ахсджиаг у, ахуырады нырыккон домӕнтӕн дзуапп чи дӕтты, ахӕм иумӕйагахуырадон кусӕндӕтты бӕрц кӕй фӕфылдӕр, уый. Зӕгъӕм, Ӕрыдоны, Ӕрӕфы, Горӕтгӕрон ӕмӕ Рахизфарсы районты. Дзӕуджыхъӕуы ӕмӕ Алагиры районы иумӕйагахуырадон кусӕндӕтты 100 проценты дзуапп дӕттынц нырыккон домӕнтӕн, Дыгуры, Кировы ӕмӕ Мӕздӕджы районты та — 90, 80 ӕмӕ 93 проценттӕн.

Томайты Хъазыбег куыд бацамыдта, афтӕмӕй скъолаты бӕстыхӕйттӕ кӕй базӕронд сты, уый у иумӕйаг тыхстдзинад. Зӕгъӕм, Мӕздӕджы районы скъолатӕ арӕзт ӕрцыдысты 50 азы размӕ, уӕдӕй сӕм бындуронӕй никуы базылдысты. Иннӕ районты дӕр уавӕр хуыздӕр нӕу. Ахсджиагыл банымайгӕ у, фарста алыг кӕныны тыххӕй Уӕрӕсейы Федерацийы паддзахадон программӕты ног скъолатӕ саразынӕн, рагон бӕстыхӕйттӕм бындуронӕй базилынӕн ӕхца кӕй бавӕрдтой, уый.

Ныхасгӕнӕг фӕбӕрӕг кодта культурӕйы къабазы ивддзинӕдтӕ дӕр. Хъӕуты  аразынц культурӕйы ног артдзӕстытӕ, базилинаг цы бӕстыхӕйттӕ сты, уыдоныл дӕр куыст цӕуы. Ивгъуыд аз фӕкъаддӕр ис кӕлӕддзаг уавӕры, кӕнӕ бындурон цалцӕг чи домы, культурӕйы ахӕм кусӕндӕтты бӕрц Дзӕуджыхъӕуы, ӕрыдоны, ӕрӕфы ӕмӕ Кировы районты. Уӕрӕсейы цӕрджытӕн цӕрӕнуӕтты-коммуналон хӕдзарады хӕрзхъӕд лӕггӕдтӕ кӕныны охыл федералон бюджет ӕхца дих кӕны нырыккон горӕтаг алфамбылайтӕ аразынӕн, горӕтаг парктӕ сфидауц кӕнынӕн. Афтӕмӕй, бюджеты ӕхцайӕ кӕронмӕ ахӕццӕ сты Алагиры ӕмӕ Дзӕуджыхъӕуы 12 ӕхсӕнадон фӕзуаты ӕмӕ парктӕ сфӕлгонц кӕныны хъуыддӕгтӕ.

Республикӕйы цӕрджыты ‘хсӕн фӕфылдӕр сты, спортмӕ йе ‘ргом чи аздӕхта, ахӕм адӕймӕгтӕ. Фарон цалцӕггонд ӕрцыдысты Уӕллаг Фыййагдоны, Мичурины, Мустыздӕхы, Фарны, Ногиры, Терскы станицӕйы скъолаты спортивон залтӕ. Балхӕдтой сын хъӕугӕ спортивон ифтонггӕрзтӕ дӕр. Кӕлӕддзаг хӕдзӕрттӕй ног цӕрӕн бынӕттӕм адӕмы раивыны республикон программӕйы фӕрцы фарон Алагиры, Беслӕны, Мӕздӕджы, хъӕутӕ Советскоейы, Хуымӕллӕджы, Майскийы, Чермены, Мызуры, Уӕллаг Зджыды, Холсты цӕрджытӕй 300 бинонтӕ систы ног фатерты хицӕуттӕ. Ног цӕрӕнуӕттӕн ӕхца радих кодта республикон бюджет ӕмӕ Цӕрӕнуӕтты-коммуналон хӕдзарад рацаразынӕн ахъазгӕнӕг фонд.

Томайты Хъазыбег йӕ раныхасы хицӕнӕй фӕбӕрӕг кодта, цӕрджытӕ бынӕттон хицаудзинады архайдӕй разы кӕй сты, уый. Уыдӕттӕ ахӕсгӕ сты социалон, экономикон архайды ахадындзинад кӕй фӕбӕрзонддӕр ис, уымӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here