О, уыцы фыдвӕззӕг!..

0
20

2002 азы сентябры изӕрӕй Ирыстоны ӕмӕ нӕ бӕстӕйыл фыдуацы хабар айхъуыст. Ӕрцыд стыр ӕрдзон фыдбылыз, адӕймаджы сӕрызонд кӕй нӕ ахсы, ахӕм бӕллӕх.

Хъолайы цъити ратыдта ӕмӕ Гӕналы комы уым дӕлӕмӕ йӕ хъӕлӕсы ахаста, йӕ размӕ цыдӕриддӕр ӕмӕ чидӕриддӕр фӕци, уыдоны. Сау калмау рабырыд йӕ хуыккомӕй ӕмӕ йӕ амӕттаг баисты 135 адӕймаджы. Зӕрдӕдзӕф фесты Ирыстоны цӕрджытӕ стырӕй, чысылӕй. Не ‘хсӕнӕй нын атыдта нӕ уарзон хоты, ӕфсымӕрты, ныййарджыты, сӕ аивадӕй адӕмы дисы чи ӕфтыдта, уыцы нӕртон фӕсивӕды, бӕхты театр «Нарты» артистты: Кънаттаты Тауызбеджы, Къесаонты Аланы, Гаджиты-Зассеты Викторы, Багаты Зазайы, Сланты Сосланы, Газанты Маринӕйы, Беджызаты Маринӕ ӕмӕ Тохтиаты Русланы.

Уыцы бон мӕскуыйаг уазджытӕ, нӕ бӕстӕйы зындгонд ӕмӕ не ‘ппӕтӕн дӕр уарзон артист, режиссер Сергей Бодров йӕ киноисӕг къордимӕ Хъӕрмӕдоны куыста йӕ ног киноныв «Связной»-ыл. Семӕ уыдысты нӕхи фӕсивӕд дӕр — «Нарты» барджытӕ. Сергей сӕ фӕхуыдта йӕ кинонывы архайынмӕ. Райдзаст, фӕззыгон хурбон бӕргӕ уыд кусынӕн, фӕлӕ… 22 милуан тоннӕйы ихзӕй комы 15 километры дӕргъӕн йӕ быны фӕкодта. Нӕ бацауӕрста санатори «Хъӕрмӕдон»-ыл дӕр. Бодровы кинокъордимӕ уыдысты нӕ республикӕйы фӕндӕгтыл ӕдасӕй цӕуыны паддзахадон инспекцийы патрулон службӕйы кусджытӕ Сихъоты Алик ӕмӕ Гиоты Зауырбег. Ничиуал сӕ аирвӕзт.

Цард-цӕрӕнбонты ирон адӕмы фӕлтӕртӕн хӕхтӕ сты ныфсы, хъахъхъӕныны ӕмӕ царды хос. Хӕхтӕ, нӕ фыдӕлты уӕзӕг, уӕ номӕй, уӕ узӕлдӕй нӕ сӕртӕ хӕссӕм бӕрзонд! Уӕ цӕрайӕ цъӕх арвы бын цӕрӕм, хур нӕ зӕрин тынтӕй тавы. Рагзамантӕй нӕ дисы ӕфтауы аивадон литературӕйы Кавказы ӕрдз, хӕхтӕ цы ирд ахорӕнтӕй нывгонд ӕрцыдысты, уый. Нӕ зӕрдыл ӕрлӕууынц Михаил Лермонтовы поэмӕ «Демон»-ы рӕнхъытӕ:

…и между них,

Прорезав тучи,

Стоял всех выше головой.

Казбек, Кавказа царь могучий

В чалме и ризе парчевой…

Алчидӕр уарзы йӕ фыдыбӕстӕ, дуртӕ йеддӕмӕ дзы куы ницы уа, уӕддӕр. Йӕ райгуырӕн хӕхты уындӕй никуы бафсӕст, фӕлӕ сын се ‘нусон тыхст ӕмӕ уырыд цард йӕ фӕстаг бонты йӕ зӕрдӕ ӕхсыдта поэт Ованес Туманянӕн:

«Куы скӕсын нӕ хӕхтӕм,

Уӕд фенын ӕврӕгътӕ.

Сӕ бынмӕ — нӕ хъӕутӕ,

Нӕ хӕрзуд, рыст адӕм!»

Кӕй зӕрдӕ нӕ сагайдзысты нӕ хурты-хур Къостайы ӕгъуыстаджы ныхӕстӕ:

«Мӕ цӕстысыг донау мызти,

Мӕ зӕрдӕ фырцинӕй рысти, —

Куы скастӕн нӕ цъитиджын хӕхтӕм».

Хӕхтӕ ӕмӕ Иры дзыллӕ кӕрӕдзиуыл ӕнгом баст сты, иу уысм дӕр нын хицӕнтӕй нӕй цӕрӕн. Фӕлӕ зӕрдыл дарын хъӕуы иудадзыг, хӕхты ӕрдзы сконд тызмӕг ӕмӕ ӕгъатыр кӕй у. Рӕвдаугӕ дӕ куыд бакӕной, ӕфхӕргӕ дӕр афтӕ. Бӕргӕ, куы уаид хӕхтӕн адӕймаджы ӕнкъарынад, уынынӕн цӕстытӕ, дзурын куы зониккой, уӕд сӕ бафӕрсиккам: «ӕнусты мидӕг сӕ дӕлбазыр ӕууӕнкджынӕй чи цӕры, уыцы зӕрдӕхӕлар, цардбӕллон адӕм, хӕхты бардуаг-дзуӕрттӕн сыгъзӕрин тӕбӕгъты табуйаг ӕртӕ уӕливыхы ӕмӕ ӕлутонӕй кувӕг дзыллӕ, ӕнӕ аххосӕй аххосджын цӕмӕн фесты?»

Ӕвддӕс азы рацыд Хъолайы ихзӕй-цъитийы ракалдыл. 2002 азы 20 сентябры майрӕмбоны изӕры аст сахаты ӕмӕ дӕс минутыл ӕвиппайды дымгӕ сыстад, Хъӕрмӕдоны сӕрмӕ мигътӕ ӕддӕг-мидӕг ауадысты, Гӕналгом сау тары ӕрныгъуылд. Тыхуарын ӕмӕ тыхджын, тӕссаг гыбар-гыбурӕй кӕмттӕ нӕрыдысты, хъустӕ къуырма кодтой: зӕхх ӕмӕ арвы фыдӕх баиу сты. Хъолайы цъити ратыдта ӕмӕ ихзӕй рафсӕрста. Ихты, дурты донӕмхӕццӕ ламийы ӕбуалгъы зӕй рацыд Гӕналдоны донвӕдыл, цӕуылдӕриддӕр ӕмбӕлд, уыдон ссӕндгӕйӕ, йемӕ хӕсгӕйӕ. Баурӕдта йӕ тъунел ӕмӕ къӕдзӕхджын рагъы нарӕг, фӕлӕ йӕ ламихӕццӕ зӕй рахӕццӕ Джызӕлы сӕрмӕ — хъӕумӕ ма йӕ бахъуыд ӕрмӕст дыууӕ километры.

Ӕмбисонды ӕбуалгъы митӕ бакодта. Ныррызт Иры дзыллӕ сӕрӕй къӕхтӕм. Нӕ райгуырӕн хӕхтӕй фыдбылызы-фыдбоны зӕй Джимарайы хох, Хъолайы цъитийӕ, Руймонау рафсӕрста. Изӕррухсӕй Хъӕрмӕдон-Гӕналыком гӕныстон фестади.

Хъолайы цъити-ихзӕй удхӕссӕг, цы бакуыстай? Иры хуыздӕрты цӕрдудӕй куы баныгӕдтай. Ӕрдзы ныхмӕ адӕймагӕн йӕ бон кӕд цы уыд, уӕлдайдӕр зӕйракалды. Зӕйласты фыдбылыз нӕ фыдӕлтӕй бирӕты бабын кодта, дӕнцӕгтӕ бирӕ: 87 азы размӕ Джусойты мыггаджы ӕмӕ 25 азы размӕ Транскамы — царды фӕндагыл, ӕмбисонды зарӕггӕнӕг Сагкаты Валерийы хъуытаз хъӕлӕс кӕм бамынӕг…

Ӕвддӕс азы размӕйы Хъолайы цъити-зӕйы фыдохӕн нӕхӕдӕг — ӕвдисӕн. Фӕмард дзы 134 адӕймаджы, уыдонӕй нудӕсы мӕрдтӕ ссардтой, сӕ фылдӕр — ӕрыгон ахуыргонд фӕсивӕд. Сӕ бинонтӕ, сӕ хионтӕ, Иры дзыллӕ сыл фӕхъыг кодта. 115 дуджы фӕдисоны ӕнусмӕ баззадысты цъити-зӕйы ӕбӕрӕг сӕфтӕй.

Уыцы зынгхуыстытӕн сӕ табӕты раз не ‘рлӕууыд, йӕ рустӕ тонгӕ, ныййарӕг мад. Ныййарджытӕ хъарынц се ‘взонг хъӕбулты тӕригъӕд уӕларвмӕ. Республикӕйы Конституцион тӕрхондоны сӕрдар  Къесаты Станислав зӕрдӕбынӕй ныккӕрзы, уыцы ӕрыгон ахуыргонд фӕсивӕды мӕрдӕй, се ‘ппӕт дӕр уыдысты йӕ ахуырдзаутӕ, паддзахадон университеты юридикон факультеты студенттӕ.

О, Хуыцау, ракӕс, сӕркъулӕй-табугӕнгӕ дӕуӕй курӕм, цӕй-ма нӕ ӕвзонг хъӕбулты кӕм агурӕм, ирон мӕрдвӕндаг куыд скӕнӕм, нӕ цӕссыг кӕдӕм калӕм?! Адӕмы маст ӕмӕ мароймӕ дзӕнӕты бадинаг курдиатджын поэт Цомайты Ростиславы ӕнкъараг зӕрдӕ ныккӕрзыдта ӕмӕ йӕ «Реквием»-ы ӕрхӕндӕгӕй фыста:

Куыд ма уарзон нӕ хӕхтӕ?

Йӕ тугӕрхӕм ӕртӕхты

Куы бабын сты адӕм,

Сӕ хисты ныр куыд бадӕм?..

 

Афтид чырын ныгӕнӕм,

Уӕдӕ ӕндӕр цы кӕнӕм?

Куы нӕ арӕм нӕ мӕрдтӕ,

Кӕм сын кӕнӕм уӕлмӕрдтӕ?

Иры адӕмы тӕригъӕдӕй, бӕрзонд арвыл бандзыг мӕй. Сӕнайы хох, тӕфӕрфӕсгӕнгӕ, сау мигъты ‘хсӕн ӕрныгъуылд, йӕ дӕлвӕд айнӕг къӕдзӕхтӕ скодтой сӕ саутӕ.

Иры хъыг — ӕгӕрон, цӕссыг тугӕй згъоры. Ӕрдзы фыдракӕндӕн ницы у нӕ бон, ӕгъгъӕд фод ӕрдзон фыдбылыз ӕмӕ Ирыстоныл фыдвӕндтӕ чи кӕны, уыдонӕн.

Кӕронбӕттӕны ме ‘нкъард уац фӕуыдзынӕн Шамилы зӕрдӕмӕхъаргӕ рӕнхъытӕй:

Ӕрдзы знаггад цинтӕм разилӕд.

Иры адӕмыл хур рӕвдаугӕ ракӕсӕд.

Тӕрхоны лӕг чи сси хӕрам ӕмӕ хинӕй,

Нӕ адӕмыл чи цӕуы, знагау, мӕнгардӕй,

Фыдызӕххӕй чи кӕны базар, —

Уый баййафӕд йӕ азар.

Хъолайы цъити — зӕйы бын чи фӕци, уыцы зынгхуыст адӕмы цыртдзӕвӕныл фыст ис ахӕм ныхӕстӕ: «Мах баззадыстӕм ӕнӕ сымах, сымах та баззадыстут махимӕ». Уый арф хъуыды у. Ирон адӕм уыцы фыдбӕллӕх сӕ зӕрдӕмӕ хӕстӕг райстой, ӕмӕ йын рохгӕнӕн нӕй.

Гуылӕрты Барис,

ӕхсӕнадон уацхӕссӕг

ОСТАВЬТЕ ОТВЕТ

Please enter your comment!
Please enter your name here