Равзӕрстой Дзӕуджыхъӕуы Минӕвӕртты ӕмбырды сӕрдар

0
18

Знон Дзӕуджыхъӕуы бынӕттон хиуынаффӕйады администрацийы уыдис горӕты Минӕвӕртты ӕмбырдмӕ VII равзӕрст депутатты фыццаг ӕмбырд, амыдта йӕ депутатты хистӕр Калоты Витали.

Ӕмбырды боны фӕткы цы фарстытӕ уыдис, уыдонӕн сӕ сӕйрагдӕр уыд Дзӕуджыхъӕуы Минӕвӕртты ӕмбырдӕн сӕрдар равзарын. Калойы-фырт арфӕ ракодта ног равзӕрст депутаттӕн ӕмӕ боны фӕткы фыццаг цалдӕр фарстмӕ ӕркӕсыны фӕстӕ рахызт сӕйраг фарстамӕ.

Дзӕуджыхъӕуы Минӕвӕртты ӕмбырды сӕрдары бынатмӕ хаст ӕрцыд депутат Икъаты Русланбеджы кандидатурӕ. Ӕмбырды чи уыд, уыцы 30 депутатӕй йыл схъӕлӕс кодтой 28 (ӕдӕппӕт та сты 32). Афтӕмӕй Дзӕуджыхъӕуы Минӕвӕртты ӕмбырды сӕрдарӕй ӕвзӕрст ӕрцыд Икъаты Кузмайы фырт Русланбег.

Горӕты ног равзӕрст Минӕвӕртты ӕмбырды архайдтой РЦИ-Аланийы Сӕргълӕууӕг Битарты Вячеслав, республикӕйы Сӕргълӕууӕг ӕмӕ Хицауады администрацийы разамонӕг Челӕхсаты Рустем, Муниципалон скондты советы сӕрдар Нӕкуысаты Барис.

Горӕт Дзӕуджыхъӕуы Минӕвӕртты ӕмбырды сӕрдары хӕдивджытӕй ӕвзӕрст ӕрцыдысты депутаттӕ Александр Пациорин, Сӕлбиты Зитӕ ӕмӕ Бестауты Сослан.

Дзӕуджыхъӕуы Минӕвӕртты ӕмбырдмӕ ног равзӕрст депутатты раз раныхас кодта РЦИ-Аланийы Сӕргълӕууӕг Битарты Вячеслав. Зӕрдиаг арфӕ ракодта фыццаг ӕмбырды архайӕг депутаттӕн, ӕвзарджытӕ сыл кӕй схъӕлӕс кодтой, уый тыххӕй, стӕй сӕ размӕ уыцы бӕрнон куыст чи кодта, уыдонӕн сӕ хорз куысты тыххӕй. Ног равзӕрст депутаттӕн бафӕдзӕхста, цӕмӕй ӕвзарджыты ӕууӕнчы аккаг разыной, архайой горӕты цӕрджыты пайдайӕн кусыныл.

Кӕронбӕттӕны раныхас кодта Дзӕуджыхъӕуы Минӕвӕртты ӕмбырды ног сӕрдар Икъаты Русланбег. Уый арфӕ ракодта депутаттӕн, кӕй йыл баууӕндыдысты, уый тыххӕй. Сӕрмагондӕй раарфӕ кодта республикӕйы Сӕргълӕууӕгӕн горӕты Минӕвӕртты ӕмбырдыл йӕ аудындзинады тыххӕй.

Багаты Аврам

ОСТАВЬТЕ ОТВЕТ

Please enter your comment!
Please enter your name here