Терроризмӕн ныхкъуырд радтыны охыл

0
24

РЦИ-Аланийы Сӕргълӕууӕг Битарты Вячеслав дзы сӕрдариуӕг кодта, афтӕмӕй уыдис терроризмы ныхмӕ республикон къамисы ӕмбырд. Рӕгъмӕ рахастӕуыд Интернеты тыгъдады терроризмы ӕууӕлтӕ ма ‘руадзыны фарстытӕ.

Ацы ахсджиаг фембӕлды ма архайдтой РЦИ-Аланийы Хицауады Сӕрдар Тускъаты Таймураз, Парламенты Сӕрдар Алексей Мачнев, сӕйраг федералон инспектор Челӕхсаты Владимир, барадхъахъхъӕнӕг оргӕнты, районты разамонджытӕ.

Национ ахастдзинӕдты фарстаты министрады конд ӕрцыд ӕмӕ архайы, Интернеты фӕрӕзтӕм ӕппынӕдзух хъус чи дары, ахӕм кусджыты къорд. Специалисттӕ бӕрӕг кӕнынц экстремистон ӕмӕ террористон мидисимӕ хабӕрттӕ, хъусынгӕнинӕгтӕ. Уавӕрыл хорзӕрдӕм зынынц экстремистон зондахаст ӕмӕ терроризмы ӕууӕлтӕн ныхкъуырддӕттӕг видеороликтӕ. Министрады официалон сайты сӕрмагонд сыф «ӕдас Интернет»-ы фӕрцы республикӕйы цӕрджыты бон у тӕссагдзинад хӕссӕг информацийы тыххӕй фехъусын кӕнын.

Фаронимӕ абаргӕйӕ, фӕфылдӕр сты нациты’хсӕн ныхмӕлӕудимӕ, экстремизм ӕмӕ терроризмимӕ баст ӕрмӕджытӕ социалон хызты рабӕрӕг кӕныны цаутӕ. «Алы районы дӕр ис фӕсивӕды социализацийы центртӕ, сӕ сӕйраг хӕс у скъолаты, техникумты, училищӕты, уӕлдӕр ахуыргӕнӕндӕтты кусын. Центрты специалисттӕ хъуамӕ ӕппынӕдзух уой се ‘мгӕртты ‘хсӕн ӕмӕ сын амоной раст фӕндаг, бахизой сӕ тӕссаг зондахастӕй», — загъта Битарты Вячеслав.

Ӕрыгӕтты социалон ахадгӕ архайдыл фӕцалх кӕнын, сӕ фӕндӕттӕ, сӕ бӕллицтӕ сӕххӕст кӕнынӕн сын фадӕттӕ аразын — уыдӕтты фӕрцы фӕсивӕд хызт уыдзысты зыгъуыммӕ хъуыдытӕй ӕмӕ ракӕндтӕй. Ацы аз Цӕгат Ирыстонӕй 410 лӕппу ӕмӕ чызджы архайдтой алыхуызон фӕсивӕдон форумты, сӕ арӕхстдзинад, сӕ курдиат ӕвдыстой. Уыдӕттӕ сын стыр ахъаз фӕуыдзысты сӕ дарддӕры фӕндаджы.

Национ ахастдзинӕдты фарстаты министрад, Фӕсивӕды хъуыддӕгты комитетӕн хорз ӕмгуыстад ис барадхъахъхъӕнӕг оргӕнтимӕ, уый руаджы сӕхицӕн нысан кӕнынц архайды растдӕр мадзӕлттӕ. Социалон хызты закъонхалӕг ӕрмӕг иртасын ӕххӕстгӕнӕг хицаудзинадӕй, барадхъахъхъӕнӕг оргӕнтӕй домы къӕрцхъус уӕвын, бӕлвырд арӕхстдзинӕдтӕ ӕмӕ зонындзинӕдтӕ. Уымӕ гӕсгӕ хъуыддагыл хъуамӕ кусой хорз цӕттӕгонд специалисттӕ. Хъуамӕ республикӕмӕ ӕрцӕуой фӕлтӕрдджын уӕрӕсейаг специалисттӕ, уыдон сӕ зонындзинӕдтӕ нӕ бавгъау кӕндзысты цӕгатирыстойнаг кусджытӕн.

Ӕмбырды ма фӕбӕрӕг кодтой 2019 — 2023 азтӕн конд Уӕрӕсейы Федерацийы террористон идеологийӕн ныхмӕлӕуды иумӕйаг пъланы мадзӕлттӕ царды ӕххӕст кӕныны фарстытӕ.

РЦИ-Аланийы Сӕргълӕууӕджы

ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here