Ирон адӕмы аивады артдзӕст

0
62

— Чызджытӕ, абон цӕуӕм Ирон театрмӕ. Цӕуы дзы спектакл «Ӕфхӕрдты Хӕсанӕ». Хӕсанӕйы ролы та хъазы нӕ уарзон артист Хъалӕгаты Федя!

— О, фӕлӕ нӕм ӕхца хӕрыны фаг дӕр куы нӕ ис, уӕд театрмӕ куыд цӕуӕм?!

— Хӕрыныл фӕлӕудзыстӕм, чызг бирӕ нӕ фӕхӕры, фӕлӕ, уый хыгъд, фембӕлдзыстӕм нӕ уарзон артисттимӕ!

Уыцы ныхас-иу уыдис ивгъуыд ӕнусы 60-ӕм азты педагогон училищӕйы ирон хайады студентты ‘хсӕн. Ахӕм ног спектакл-иу нӕ уыдис, ӕмӕ мах кӕдӕм нӕ ацыдыстӕм. Уыцы бон-иу нын уыдис бӕрӕгбон! Уӕдӕ дзы цы диссаджы артисттӕ архайдта! Уыдоны тыххӕй бакӕсӕн ис, ӕрӕджы рауагъдад «Ир»-ы редактор Цӕрӕкты Аллӕ цы цымыдисаг чиныг сарӕзта, уым.

Ирон театр уыдис, ӕмӕ уыдзӕн ирон адӕмы артдзӕст. Хъуыды ма йӕ кӕнын, къорд азы размӕ театры актертӕ дыууӕ дихы куы фесты, уый. Ӕвӕццӕгӕн, Ирыстоны ахӕм адӕймаг нӕ баззад, ацы хабар хъыг кӕмӕн нӕ уыд. Уый уыдис стыр худинаджы рӕстӕг.

О, зонын ӕй, ирон адӕмӕн сӕ иу хай сты хӕлӕггӕнаг, ӕдзӕстуарзон, исчи нӕ размӕ куы цӕуа, уӕд ын йӕ размӕ цӕлхдуртӕ ӕвӕрынц. Уый иутӕн сӕ туджы ис, ӕмӕ сын аивӕн нал ис. Мах, ӕвӕццӕгӕн, ӕмзонд никуы уыдзыстӕм, ӕмӕ уый нӕ царды уагыл дӕр зыны. Мӕнӕ та ныр дӕр чидӕртӕ змӕнтынц, архайынц, цӕмӕй нӕ уарзон Ирон театр, Ирыстоны зӕрдӕ, ногӕй ныппырх уа!

Цы уыл ӕрцыд, кӕрӕдзиуыл уӕ чи ардауы, ныхӕстӕ хицауадмӕ чи хӕссы, чъизидзинадӕй чи нӕ тӕрсы, уыдонмӕ иуӕй-иу актертӕ цӕмӕн хъусынц ӕмӕ сӕ ныфс куыд хӕссынц Ирыстоны артдзӕст фехалынмӕ?! Сымах хъуамӕ уат фӕзминаг ӕппӕт ирон адӕмӕн — хистӕрӕй кӕстӕрмӕ.   Тылаттаты Бексолтан, Бытъӕты Роберт, Бекмӕрзты Ӕхсарбег, Цӕргӕсты Дзамболат, Гуыбиаты Хъазыбег,  Фидараты Альберт, Сабанты Тамерлан хуызӕн. Хистӕртӕ кӕм ис, уым хъуамӕ уа коммӕгӕс кӕстӕртӕ. Уыдон сӕ цард ӕмӕ куыст хъуамӕ аразой ацы хистӕртӕм гӕсгӕ, кӕд ма ирон адӕм ӕмбарынц хистӕр ӕмӕ кӕстӕр, уӕд. Тынг зын мын у ацы рӕнхъытӕ фыссын, фӕлӕ мӕ нӕ фӕнды, цӕмӕй та кӕддӕры хуызӕн фӕрӕдийой.

Мӕнӕй никуы ферох уыдзӕн Гуыбиаты Хъазыбеджы хорздзинад. 2007 азы 13-ӕм скъола бӕрӕг кодта йӕ 70 азы юбилей, ӕмӕ Хъазыбегӕн куы загътон, кӕд гӕнӕн ис, уӕд нӕ бӕрӕгбон Ирон театры скӕнӕм, стӕй цас бафидын хъӕудзӕн, уый тыххӕй, уӕд йӕ мидбылты бахудт. Мӕ хъуыдыйыл сразы, фӕлӕ ӕхцайы коймӕ йӕ цӕсгом фӕтар, ӕмӕ, дам, ӕз  ӕхца куыд хъуамӕ райсон  нӕ уарзон ирон скъолайы юбилейы тыххӕй. Бӕрӕгбон, дам, махмӕ кӕй уыдзӕн, уый махӕн у стыр кад. Мӕ хъуыдыйӕ мӕхӕдӕг дӕр фефсӕрмы дӕн, фӕлӕ абон цард ахӕм у. Хъазыбеджы уӕздан ныхас ма абон дӕр  нӕ ахуыргӕнджыты ӕхсӕн арымысӕм.

Гъе, ахӕм хистӕртӕ хъуамӕ бӕттой кӕрӕдзиуыл кӕстӕрты, аразой сӕ раст фӕндагыл.

Абон Ирон театры сӕргъы лӕууы Колыты Владислав. Уый мыггаджы ‘хсӕн дӕр у тынг нымад, аргъ ын кӕнынц, цин кӕнынц йӕ хорздзинӕдтыл ӕмӕ йӕ хъуыддӕгтӕ рӕстмӕ уӕнт! Театр тынг хорз къахдзӕфтӕ кӕны, йӕ фӕлгонц дӕр хуыздӕрӕрдӕм аивта, уӕдӕ йӕ репертуар дӕр у тынг хъӕздыг. Уымӕ гӕсгӕ уӕ курын, нӕ уарзон актертӕ, кӕрӕдзи бамбарут, кӕрӕдзийӕн аргъ кӕнут, чи уӕ цы куыстыл лӕуд у, уый зӕрдиагӕй ӕххӕст кӕнӕд, ӕмӕ уӕ уӕд нал ӕвдӕлдзӕн загъта-багътатӕм. Ацы ран нӕ культурӕйы министр дӕр хъуамӕ зӕгъа йӕ ныхас. Мах та уын стыр аргъ кӕнӕм уӕ курдиатӕн, ӕмӕ зӕрдиагӕй ӕнхъӕлмӕ кӕсдзыстӕм уӕ ног спектаклтӕм.

Сӕлбиты Иринӕ,

Дзӕуджыхъӕуы Хетӕгкаты Къостайы номыл 13-ӕм скъолайы директор

ОСТАВЬТЕ ОТВЕТ

Please enter your comment!
Please enter your name here