Берлиозы сфӕлдыстадмӕ —”дӕгъӕлтӕ”

0
52

Ӕппӕтадӕмон фестивал «Мариинаг-Дзӕуджыхъӕу»-ы фӕлгӕты 28 сентябрӕй 6 октябрмӕ Гергиты Валерийы разамындӕй Цӕгат Ирыстоны концерттӕ ратдзӕн Мариинаг театры симфонион оркестр.

Фестивалы сӕ дӕсныйад ӕвдисдзысты П.И.Чайковскийы номыл конкурсы лауреаттӕ ӕмӕ регионы курдиатджын ӕвзонг музыканттӕ. Республикӕйы цӕрджытӕ ӕмӕ уазджытӕ  фендзысты спектаклтӕ сывӕллӕттӕн. Уымӕй уӕлдай ма фестивалы архайдзӕн Леонид Якобсоны номыл балеты театр.

Фестивал цӕудзӕн Дзӕуджыхъӕуы Мариинаг театры филиалы фӕзты — Цӕгат Ирыстоны паддзахадон академион филармони ӕмӕ нӕ республикӕйы оперӕ ӕмӕ балеты Национ театры. Симфонион оркестрты сӕйраг фестивал ахицӕн Берлины филармонийы, Дворжакы оперӕ «Русалка»-йӕ. Архайдтой дзы Берлины хор ӕмӕ радиойы ӕппӕтадӕмон солистты къорд, Робин Тиччатийы разамындӕй. Семӕ уӕрӕсейаг солисттӕ дӕр — Зоя Церерина ӕмӕ Александр Рославец.

Ацы аз фестивалы темӕйӕн ӕвзӕрст ӕрцыд XIX-ӕнусы зындгонд, йе сфӕлдыстадон бынтӕм абон дӕр ӕгӕрон цымыдис кӕмӕн ис, уыцы композитор Гектор Берлиоз. Цардӕй ахицӕн 150 азы размӕ. Симфонион хъуыдыкӕнынады рӕзты ӕмӕ Европӕйы музыкалон модернизацийы, оперӕйы дунейы, Берлиозы бавӕрӕн Рихард Вагнерӕй къаддӕр нӕу.

Фестивалы оперӕйы сценӕйы зӕлыдысты Берлиозы зындгонддӕр уацмыстӕ. Программӕйы композиторы музыкӕ кӕд алы хатт нӕ райхъуыст, уӕддӕр иннӕ композиторты ӕнӕуынгӕ тӕгтӕй баста Гекторы музыкалон хъуыдыкӕнынад. Фестивал райдыдта Берлиозы оперӕ «Бенвенуто Челлини»-йӕ, акодта йӕ хъуыстгонд революцион-романтикон оркестр, Монтевердийы хор ӕмӕ сэр Джон Элиот Гардинеры разамындӕй солистты къорд. Драмон симфони «Ромео ӕмӕ Джульеттӕ» ацагъта Берлины радиойы хор ӕмӕ филармонийы оркестр бритайнаг Дэниел Хардингы разамындӕй.

Берлиозы «Клеопатрӕйы мӕлӕт»-ы хъуамӕ азарыдаид Элис Кут, фӕлӕ йӕ ӕнӕнхъӕлӕджы раивта америкаг Сьюзен Грэм. Тенор Клаус Флорианимӕ ма Сьюзен Грэм азарыд скъуыддзаг оперӕ «Троянцы»-йӕ.

Гергиты Валерийы разамындӕй Мюнхены филармонийы оркестр акодта Шниткейы Фыццаг ӕмӕ Брукнеры ӕхсӕзӕм симфонитӕ — Берлиозы ӕмдугонтӕ. Ноджыдӕр ма иу уӕрӕсейаг дирижер — Сохиты Тугъан архайдта Европӕйы симфонион форумы, Амстердамы къаролаг оркестр Консертгебауимӕ. Тугъаны разамындӕй райхъуыстысты Чайковскийы Фыццаг симфони «Зимние грезы» ӕмӕ Луи Андриссены «Мистерии»-тӕ. Фестивалы кӕронбӕттӕн мадзалы Дворжакы уацмыс «Русалка» ӕнӕнхъӕлӕджы рауад. Ӕмӕ йӕ адӕм уӕлдай бӕрзонддӕр диссагӕн айстой сӕ зӕрдӕмӕ. Ӕрыгон ӕмӕ курдиатджын дирижер Робин Тиччати уацмыс аргъауы хуызӕн рахаста адӕмы рӕгъмӕ ӕмӕ дзы равдыста дыууӕ — идеалон ӕмӕ реалон дунетӕн фембӕлыны гӕнӕн кӕм нӕй, ахӕм егъау трагикон тых.

Уырыссаг лирикон-драмон хъӕлӕсы хицау Зоя Церерина  бритайнаг Салли Мэтьюзимӕ акодтой фӕсфурдаг кънйазы чызджы парти ӕмӕ систы ӕнкъард ӕрхӕндӕг философон хъуыды ӕвдисӕг.

«Российская газета» 2019.23.09

ОСТАВЬТЕ ОТВЕТ

Please enter your comment!
Please enter your name here