Алцыдӕр лӕгӕй аразгӕ у

0
108

Ӕнӕ ныфсӕй та цы у цӕрӕгуд?! ӕвӕццӕгӕн-иу уайтагъд фӕтасид хуымӕтӕг ӕмӕ вазыгджын уавӕрты, фӕлӕ йӕ, ӕрдзӕй лӕвӕрд удхъомыс, цудын нӕ уадзы. Бонваг, чысыл ӕви стыр нысан йӕ къухы куы бафты, уӕд адӕймаг, ӕнӕмӕнг, фӕныфсджындӕр вӕййы, мылазон рӕстӕг дӕр ӕм кӕцӕйдӕр хуры цӕст фӕзыны.

Ӕртӕ азмӕ, афтӕ зӕгъӕн ис, ӕмӕ цӕгатирыстойнӕгтӕ сӕхиуыл банкъардтой, ныхас ӕмӕ хъуыддаг кӕрӕдзиимӕ фидар баст кӕй сты, уый. Цӕгат Ирыстоны хъӕутӕ ӕмӕ горӕттӕ ивынц сӕ хуыз, рауад сӕ арӕзтадон фӕзтӕ. Республикӕ уӕндонӕй архайы федералон программӕты, национ проекттӕ царды рауадзыныл дӕр бӕрнонӕй балӕууыд.

Адӕмы цӕст уынаг у, фӕзӕгъынц. Республикӕйы Сӕргълӕууӕг Битарты Вячеслав цӕрджытимӕ дзуры ӕргомӕй, сӕ зондахаст, сӕ бӕллицтӕ сын базоныны охыл арӕх семӕ ӕмбӕлы. Ӕнӕбындурӕй зӕрдӕ нӕ бавӕрдзӕн, фӕлӕ иугӕр ныхас загъта, нысан сӕвӕрдта, уӕд ыл дызӕрдыг мауал кӕн.

Ӕппӕт уыцы ногдзинӕдтыл, размӕцыдыл газет ӕдзухдӕр фыссы, фӕлӕ нын уӕлдай ӕхсызгондӕр сты, хъӕутӕ ӕмӕ горӕтты цӕрджытӕ нӕм цы фыстӕджытӕ ӕрбарвитынц, уыдон. Дӕлдӕр уыдонӕй цалдӕр мыхуыр кӕнӕм.

Ӕргом ныхас республикӕйы Сӕргълӕууӕгимӕ

Ӕртӕ азы рацыд, Битарты Вячеслав официалон ӕгъдауӕй Республикӕ Цӕгат Ирыстон-Аланийы сӕргъы куы ‘рлӕууыд, уӕдӕй нырмӕ. Уыцы цыбыр рӕстӕгмӕ йӕ хъӕддых архайды руаджы республикӕйы ӕрцыд зынгӕ ивддзинӕдтӕ царды ӕппӕт къабӕзты дӕр. Алыхуызон ӕмвӕзадты нысанмӕарӕзт программӕты архайыны фӕрцы арӕзт ӕрцыдысты ӕнӕниздзинад хъахъхъӕныны ӕмӕ спортивон объекттӕ, ног цӕрӕнхӕдзӕрттӕ, цалцӕггонд ӕрцыдысты бирӕуӕладзыгон хӕдзӕрттӕ, фӕндӕгтӕ, сывӕллӕтты рӕвдауӕндӕттӕ ӕмӕ социалон ахадындзинады ӕндӕр объекттӕ.

Ӕппӕт ацы фарстыты ӕмӕ республикӕйы хъӕууон цӕрӕн бынӕтты рӕзты фидӕныл ӕрӕджы лӕмбынӕг ныхас цыдис, Битарты Вячеславӕн районты газетты сӕйраг редактортимӕ фембӕлды. Йӕ саразыны хъӕппӕрис равдыста РЦИ-Аланийы Сӕргълӕууӕджы ӕмӕ Хицауады пресс-службӕйы разамонӕг Сӕбанты Фатимӕ.

Республикӕйы районты газетты сӕйраг редактортимӕ фембӕлд ацыд хӕлар уавӕры. Журналистты фӕндыдис базонын республикӕйы дарддӕры социалон-экономикон рӕзты фарстыты тыххӕй ӕмӕ сын Сӕргълӕууӕг радта лӕмбынӕг дзуаппытӕ. Абон бӕлвырдӕй зынынц хорзӕрдӕм ивддзинӕдтӕ, фӕлӕ, кӕй зӕгъын ӕй хъӕуы, разӕй нырма бирӕ саразинӕгтӕ ис. Цард иу ран нӕ лӕууы, уымӕ гӕсгӕ фӕзыны ног хъуыддӕгтӕ, уыдон алыг кӕныныл дысвӕлдӕхтӕй кусынц РЦИ-Аланийы Сӕргълӕууӕг ӕмӕ Хицауад.

Диссаджы ивддзинӕдтӕ ӕрцыдис хорзӕрдӕм нӕхи Горӕтгӕрон районы дӕр. Не ‘ппӕт дӕр ӕвдисӕн стӕм, районы разамынд республикӕйы хицаудзинады цӕстуарзон ӕххуысӕй лыггӕнинаг хъуыддӕгтыл куыд кусы, районы цӕрӕг адӕмы цард фӕхуыздӕр кӕныныл куыд архайы, уымӕн. Уый тыххӕй иу ӕмӕ дыууӕ хатты нӕ фыстӕуыд газетты фӕрстыл, фӕлӕ ма сӕ иу хатт зӕрдыл ӕрлӕууын кӕнӕм: арӕзт ӕрцыд газуадзӕн Иры хъӕумӕ, районы цӕрӕн бынӕтты аивгонд ӕрцыдысты 20 ӕхсӕнадон фӕзы; районы центр Октябрыхъӕуы ӕххӕстгонд ӕрцыдысты рухсгӕнӕн куыстытӕ; Михайловскы хъӕуы арӕзт ӕрцыд Культурӕйы хӕдзар; Майски ӕмӕ Чермены хъӕуты ӕхсӕз кӕлӕддзаг хӕдзары цӕрджытӕ ивд ӕрцыдысты ног цӕрӕн бынӕттӕм; арӕзт ӕрцыд 4 амбулаторийы Тарскӕйы, Сунжӕйы, Куырттат ӕмӕ Майскийы хъӕуты; лӕвӕрд ӕрцыдысты сывӕллӕтты ног рӕвдауӕндӕттӕ Дачнӕйы ӕмӕ Иры (Восход-2) хъӕуты, Октябрыхъӕу ӕмӕ Ногиры сывӕллӕтты рӕвдауӕндӕттӕм та бафтыдӕуыд уӕлӕмхасӕн бӕстыхӕйттӕ; ӕрхонкӕйы станицӕйы цалцӕггонд ӕрцыд спортивон зал, Джызӕл ӕмӕ Тарскӕйы арӕзт ӕрцыдысты гом спортивон фӕзтӕ; куыст цӕуы Октябрыхъӕуы центрон парк банывылдӕр кӕныныл; бындуронӕй цалцӕггонд ӕрцыдысты Октябрыхъӕуы Маяковский ӕмӕ Михайловскы хъӕуы Аразджыты уынгтӕ.

Ивддзинӕдтӕ ис. Фӕлӕ нырма ис лыггӕнинаг хъуыддӕгтӕ дӕр, сӕ иу — районы поликлиникӕйы ӕдзӕллаг уавӕр.

Интервьюйы рӕстӕг республикӕйы Сӕргълӕууӕгмӕ радтой фарст, уыцы поликлиникӕ бындурон цалцӕг скӕныны фӕдыл республикӕйы Хицауады пъланты тыххӕй. Сӕргълӕууӕг радта ӕвӕрццӕг дзуапп: 2020-2021 азты поликлиникӕ ӕрцӕудзӕн цалцӕггонд.

Интервьюйы кӕронбӕттӕн хайы журналисттӕ фӕнысан кодтой республикӕйы рӕзтмӕ Битарты Вячеславы стыр бавӕрӕн, загътой йын зӕрдиаг арфӕйы ныхӕстӕ.

Дзебойты Регинӕ,

Горӕтгӕрон районы газет «Фидиуӕджы» сӕйраг редактор, Уӕрӕсейы Федерацийы культурӕйы сгуыхт кусӕг

Ӕгъдау, ӕфсарм ис

Нӕ ног Хицауад, йӕ сӕргъы — Битарты Вячеслав, афтӕмӕй архайы зӕрдиагӕй республикӕйы хъӕндзинӕдтӕ сраст кӕныныл. Хетӕгкаты Къостайы номыл парк фӕстаг азты ӕнӕ зылдӕй ӕдзӕллагмӕ ӕрцыд. Ӕнусон стыр бӕлӕстӕн сӕ сыджыт уарыны дон фӕласта, сӕ уидӕгтӕ хӕрдмӕ сидзӕр сывӕллӕтты каст кодтой, сӕ зӕнгтӕ ӕрлӕмӕгъ сты. Ныр сӕм мин тоннӕйӕ фылдӕр саумӕр ӕрбаластой, ӕмхуызон сӕ ралӕгъз кодтой, лыстӕг кӕрдӕджы мыггаг дзы байтыдтой, ӕмӕ парк цъӕх гауызау цӕхӕртӕ калы. Бӕлӕстӕ хъӕздыг лӕгтау бухъкаст кӕнынц бӕрзӕндты пӕлӕхсар къалиутимӕ. Къахвӕндӕгтӕ — рӕсугъд къӕйтӕй ӕмбӕрзт. Сӕ фӕрсты цыбыр ӕмхуызон цъӕх къутӕртӕ — ӕмраст рӕнхъытӕй сагъд. Фӕндӕгты фӕрсты рӕсугъд даргъ бандӕттӕ ӕвӕрд. Кӕд парк кӕронмӕ арӕзт нӕма у, уӕддӕр дзы зӕрдӕ рухс кӕны. Уымӕн ӕм цӕуы бирӕ адӕм тезгъо кӕнынмӕ, сыгъдӕг уӕлдӕф улӕфынмӕ боны ӕрбарухсӕй изӕры ӕрталынгмӕ. Уалдзӕджы парчы цады доны хъазтӕ аст цъиуимӕ куы фӕзындысты, уӕд сӕ адӕм сӕ къамисӕнтӕй истой.

Адӕм бузныг сты нӕ республикӕйы Хицауадӕй. Уӕлдайдӕр — Битарты Вячеславӕй. Уый йӕ къӕлӕтджыны нӕ бады. Йӕхӕдӕг цӕуы хъӕутӕм, ӕмбӕлы адӕмимӕ, хъусы сын сӕ тыхстытӕм, сӕ куырдиӕттӕм. Йӕ дӕлбар кусджытӕй дзы кӕмӕ цы хауы, уый сын сӕ бар кӕны, ӕмӕ кусынц ӕмхуызонӕй адӕмы хорздзинадӕн. Битары-фырт у ирон лӕг. Ӕгъдау, ӕфсрм ӕм ис. Стыр ӕхцатӕ йӕ дзыппы нӕ тъыссы, фӕлӕ дзы дзӕбӕх кӕны Ирыстоны хъӕнтӕ.

Тылаттаты Бексолтан,

Уӕрӕсейы Федерацийы сгуыхт артист

ОСТАВЬТЕ ОТВЕТ

Please enter your comment!
Please enter your name here