Мамсыраты Дӕбейы кадӕн

0
69

Номдзыд ирон прозаик ӕмӕ драматург, Хетӕгкаты Къостайы номыл паддзахадон премийы лауреат Мамсыраты Дӕбейы райгуырдыл сӕххӕст 110 азы. Уый уыд нӕ литературӕйы зӕрдиагдӕр зиууӕтӕй иу. Йӕ уацмыстӕ сты нӕ национ культурӕйы хӕзнатӕ.

Ӕрӕджы Дӕбейы райгуырӕн хъӕу Быдыры Дӕргъӕвсы Культурӕйы хӕдзары уыд йӕ номарӕн изӕр. Уый арӕзт ӕрцыд нӕ республикӕйы Фысджыты цӕдисы ӕмӕ хъӕуы аивады артдзӕсты хъӕппӕрисӕй. Архайдтой дзы фысджытӕ, паддзахадон Дыгурон драмон театры артисттӕ, Дӕбейы ӕрвадӕлтӕ, ӕрӕфы районы ахуырады управленийы разамынд, ӕхсӕнады минӕвӕрттӕ, хъӕуы цӕрджытӕ, ахуыргӕнджытӕ ӕмӕ скъоладзаутӕ.

Номарӕн изӕрмӕ Культурӕйы хӕдзары кусджытӕ ӕмӕ хъӕуы астӕуккаг скъолайы ахуырдзаутӕ фыссӕджы цард ӕмӕ сфӕлдыстадмӕ гӕсгӕ бацӕттӕ кодтой зӕрдӕмӕдзӕугӕ литературон-музыкалон композици. Радзырдтой сӕ зындгонд ӕмхъӕуккагӕн йӕ царды цымыдисагдӕр хабӕрттӕ, кастысты, йӕ номыл нӕ зындгонд поэттӕ алы рӕстӕджыты цы ‘мдзӕвгӕтӕ ныффыстой, уыдон. Культурӕйы хӕдзары фӕндырдзӕгъдӕг та номарӕн изӕрмӕ ӕрбацӕуджыты зӕрдӕтӕ барухс кодта йӕ аив зардӕй ӕмӕ фӕндыры цагъдӕй.

— Литературон сфӕлдыстады мӕ фыццаг къахдзӕфтӕ кӕнын куы райдыдтон, уӕдӕй фӕстӕмӕ зонгӕ уыдтӕн Дӕбеимӕ. Тынг хӕларзӕрдӕ, цӕстуарзон адӕймаг уыд. Йӕ хӕдзары-иу иудадзыг уазӕгуаты уыдысты нӕ республикӕйы интеллигенцийы минӕвӕрттӕ. Номдзыд фыссӕг уыд цӕстуарзон ӕххуысгӕнӕг. Фыдыбӕстӕйы Стыр хӕстмӕ нӕ поэттӕй, фысджытӕй чи цыд, уыдонӕй дӕр бирӕты йӕ хӕдзарӕй, ирон ӕгъдаумӕ гӕсгӕ, Дӕбе фӕндараст кодта. Уӕдӕ нӕ йӕ бинойнаг Пуцыры конд хойрагӕй чи нӕ сахуыста, ахӕм адӕймаг нӕ уыд. Мӕ уды Дӕбейы номӕн ӕмӕ сфӕлдыстадӕн ис хицӕн бынат, — дзырдта номарӕн изӕры Цӕгат Ирыстоны адӕмон фыссӕг Хуыгаты Сергей.

Журнал «Ногдзау»-ы сӕйраг редакторы хӕдивӕг Дзасохты Музафер та йӕ мысинӕгты афтӕ загъта: «Дӕбейӕн йӕхи лӕгӕй-лӕгмӕ нӕма зыдтон, афтӕмӕй йын йӕ уацмыстӕ кастӕн тынг зӕрдиагӕй. Зонгӕ та баистӕм, газет «Рӕстдзинад»-ы культурӕйы хайады кусын куы райдыдтон, уӕд. Йӕ прозаикон ӕмӕ ӕндӕр сфӕлдыстадон ӕрмӕджытӕ йын мыхуырмӕ дӕр уӕд бирӕ бацӕттӕ кодтон. Дӕбе йӕхӕдӕг куы нал уыд, уӕд, мӕм иуахӕмы йӕ бинойнаг Пуцыр ӕрбахаста, алы азты йӕм йӕ чиныгкӕсджытӕ Советон Цӕдисы алы рӕттӕй цы фыстӕджытӕ фыстой, уыдон. Ӕмӕ дзы иу ран иу сылгоймаг фыста, тӕхуды, ӕмӕ Дӕбе, галиу къух дын куы фестин, ӕмӕ дын уӕд та уацмыстӕ фысгӕйӕ, дӕ гӕххӕтты сыфыл фӕхӕцын мӕ бон куы уаид…»

Музафер Фысджыты цӕдисы номӕй арфӕ ракодта хъӕуы администрацийы сӕргълӕууӕг Базраты Мананӕйӕн, сӕ хъӕуккаджы ном рӕсугъдӕй кӕй мысынц, кӕй йӕ нӕ рох кӕнынц, уый тыххӕй. Уый фӕстӕ бакаст нӕ бӕстӕйы Федерацийы Советы уӕнг Мамсыраты Таймуразы арфӕйы тел номарӕн изӕры архайджытӕн.

Уазджытӕн зӕрдиаг арфӕтӕ ракодтой ӕрӕфы районы бынӕттон хиуынаффӕйады администрацийы ахуырады управленийы разамонӕг Фидараты Алыксандр, РЦИ-Аланийы адӕмон артист Мамсыраты Тасолтан, районы Стыр Ныхасы советы сӕрдар Хуасцауты Тазрет.

Номарӕн изӕрмӕ сӕхи сфӕлдыстадон хуын бацӕттӕ кодтой Дыгурон паддзахадон драмон театры артисттӕ. Уыдон ацы театралон сезоны аивадуарзджыты размӕ рахӕсдзысты Дӕбейы фыст пьесӕмӕ гӕсгӕ ӕвӕрд спектакл «Бӕтӕйы фырттӕ». Сценӕйы йӕ сӕвӕрдта театры актер, РЦИ-Аланийы адӕмон артист Хадаты Альберт. Дӕргъӕвсӕгтӕн уал дзы равдыстой скъуыддзаг. Уый тыххӕй арфӕйы ныхӕстӕ сӕмбӕлд театры аивадон разамонӕг, УФ-йы адӕмон артисткӕ Гергиты Ларисӕйыл ӕмӕ йӕ директор РЦИ-Аланийы адӕмон артист Гӕлӕуты Анатолийыл.

Номарӕн изӕрмӕ хъӕуы Культурӕйы хӕдзары ӕмӕ скъолайы коллектив бацӕттӕ кодтой Дӕбейы чингуыты равдыст.

Гасанты Валери

ОСТАВЬТЕ ОТВЕТ

Please enter your comment!
Please enter your name here