Зонындзинӕдты бӕрзӕндмӕ — ирон фарнимӕ

0
47

Ӕппӕты рагондӕр ӕмӕ цымыдисагдӕр дӕсныйӕдтӕй иу у ахуыргӕнӕджы дӕсныйад. Уый  хуымӕтӕг зондамонӕг  нӕу, уый у бахъуаджы сахат ӕххуыс, хистӕр ӕмбал, кӕстӕрты раст фӕндагыл аразӕг. Рагон адӕм-иу афтӕ загътой: «Ахуыргӕнӕг йӕ зонды фӕрцы ӕрхиздзӕн йӕ ахуырдзауы «нӕзонынады» бӕрцмӕ, цӕмӕй иумӕ схизой ахуырады бӕрзӕндмӕ».

Уый у ахӕм адӕймаг, йӕ уӕхсчытыл стыр бӕрнондзинады уаргъ кӕмӕн ӕрбады. Уымӕ гӕсгӕ, адӕймаг йӕ куыст куы уарза, уӕд сывӕллӕтты дӕр уарздзӕн, ӕмӕ уӕд бӕрӕг уыдзысты йӕ куысты ӕнтыстдзинӕдтӕ.

Ныртӕккӕ цард аивта, ахуыргӕнӕджы дӕсныйад бирӕтӕм раздӕрау кадджын нал кӕсы, чысыл мызд сын кӕй фидынц, уый тыххӕй.

Фӕлӕ ис ахӕм адӕм, йӕ цард скъолайы куыстимӕ чи сбаста ӕмӕ йын йӕ фарны ном кадимӕ бӕрзонд чи хӕссы.

Хъамболты Саукуыдзы фырт Олег 24 азы бӕрц кусы ахуыргӕнӕгӕй Хуссайраг поселочы скъолайы. Ныртӕккӕ нӕлгоймаг ахуыргӕнӕг скъолаты зын ссарӕн у, фӕлӕ Хъамболы-фырт рӕстӕджы домӕнтӕ нӕ хынцгӕйӕ, кусы ӕмӕ йӕ рухстауӕг арфӕйаг архайдӕй  йӕ зӕрдӕ райы.

Олег йӕхӕдӕг 30 азы размӕ каст фӕцис ацы скъола. Ныр дӕр ма фӕлмӕн ныхасӕй ӕрымысы йӕ уарзон ахуыргӕнджыты. 1990 азы ахуыр кӕнынмӕ бацыд Цӕгат Ирыстоны Хетӕгкаты Къостайы номыл паддзахадон университеты ирон филологийы факультетмӕ ӕмӕ йӕ 1995 азы ӕнтыстджынӕй каст фӕци. Мадӕлон ӕвзагмӕ уарзондзинад ирон фарны дзырдимӕ арф ахъардтой йе уӕнгты. Йӕ зӕрдыл бадардта Джыккайты Шамилы рӕнхъытӕ мадӕлон ӕвзаджы тыххӕй:

Ды — арвы цӕссыг. Уый ныхмӕ цы сты

Ӕнуд ӕнтӕф, сындзын арт ӕмӕ уадӕг!

Ды дӕ нӕ туг, нӕ уды рухс, нӕ кадӕг,

Нӕ фарны гӕнах сыгъд ӕмӕ хӕсты.

Скъолайы ирон ӕвзаджы сахӕттӕ фаг кӕй нӕ уыд, уый аххосӕй Олег ӕвддӕс азы бакуыста ОБЖ-йы ахуыргӕнӕгӕй, фӕлӕ ныр авд азы бӕрц скъоладзауты ахуыр кӕны ирон ӕвзагыл. Архайы, цӕмӕй йӕ ахуыргӕнинӕгтӕ зоной нӕ фыдӕлты рӕсугъд ӕгъдӕуттӕ, хистӕртӕн кад кӕной, кӕстӕртӕн та ныфс уой. Йӕхӕдӕг куыд зӕгъы, уымӕ гӕсгӕ йӕ ахуырдзаутӕй се ‘ппӕтӕй, чи зоны, дзырды дӕснытӕ  нӕ рауайдзӕн, фӕлӕ сӕ фыццаджыдӕр хорз адӕймӕгтӕ куыд рауайа, ууыл архайы.

— Поселочы иууылдӕр кӕрӕдзи зонынц. Уымӕ гӕсгӕ архайын, цӕмӕй мӕхӕдӕг дӕр макуы фӕрӕдион, мӕ ахуырдзауты раз мӕ цӕсгом макуы фӕчъизи уа. Ӕмӕ мыл уынджы искуы куы амбӕлынц мӕ рауагъдонтӕ, зӕрдӕйӕ мыл куы бацин кӕнынц, уӕд ма уымӕй стырдӕр амонд цы уа ахуыргӕнӕгӕн,— зӕгъы Олег. — Афтӕ рауад ӕмӕ мӕм ныр ахуыр кӕнынц ме ‘мкъласонты сывӕллӕттӕ. Цард ӕнӕ зиан ӕмӕ ӕнӕ цин нӕ вӕййы ӕмӕ мын ӕхсызгон вӕййы, мӕ ахуырдзаутӕ ахӕм хъуыддӕгты фӕкӕсынмӕ ӕппӕты разӕй кӕй вӕййынц, уый. Ис сӕм ӕгъдау, ӕфсарм ӕмӕ уый, мӕнмӕ гӕсгӕ, царды сӕйрагдӕр у.

Олег куыд зӕгъы, уымӕ гӕсгӕ Хуссайраг поселочы дӕр ирон ӕвзаджы уавӕр сӕ хӕрзтӕй нӕу. Ӕрыгон ныййарджытӕ сӕ сабитӕм дзурынц уырыссагау. Уый фӕстӕ саби бацӕуы рӕвдауӕндонмӕ, ӕмӕ та йын уым дӕр мадӕлон ӕвзагыл дзурыны уавӕртӕ нӕ вӕййы.  Афтӕмӕй нӕ фыдӕлты ӕвзаг бынтондӕр рохуаты зайы. Ӕмӕ уый ахуыргӕнӕджы раз стырдӕр хӕс ӕвӕры, йӕ ирондзинад уымӕй бирӕ аразгӕ у. Ӕппӕт хъарутӕй дӕр архайын хъӕуы не ‘взаг бахъахъхъӕныныл.

Рагон бердзенаг фыссӕг ӕмӕ хъуыдыгӕнӕг Плутарх афтӕ дзырдта: «Ахуыргӕнӕг йӕ ахуырдзаутӕй сӕрыстыр кӕны, уымӕн ӕмӕ уыны, цы хоры нӕмгуытӕ байтыдта, уыдон цы ӕвзартӕ суагътой, ӕмӕ цы тыллӕг ратдзысты, уый».

Олегӕн йӕхицӕн дӕр ис кӕстӕртӕ. Нӕ зӕрдӕ йын зӕгъы, фарн ӕмӕ амонд йӕ бинонтӕн! Йӕ ахуырдзаутӕй йӕ зӕрдӕ рухс ӕмӕ буц уӕд кӕддӕриддӕр!

Хъойбайты Галинӕ

ОСТАВЬТЕ ОТВЕТ

Please enter your comment!
Please enter your name here