Ӕнтыстджын къахдзӕфтӕй — размӕ

0
35

Дзӕуджыхъӕуы Алайнаг гимназ ӕнтыстджынӕй цӕуы размӕ — ахуырады фӕндагыл. Куы байгом, уӕдӕй рацыд ӕртӕ азы. Ахуырады къабазы ацы проект у ахсджиаг, уымӕн ӕмӕ ирон ӕвзаг бахъахъхъӕныны хъуыддаджы у фыццаг ӕргом къахдзӕф. Цымыдисаг у уымӕй, ӕмӕ дзы ӕппӕт предметтӕ  скъоладзаутӕ ахуыр кӕнынц ирон ӕвзагыл. Сӕ уӕлӕдарӕс дӕр у аив, национ хуызы. Чызджытыл ис рӕсугъд ирон нывтимӕ къабатӕ, лӕппутыл та — ирон хӕдӕттӕ. Се ‘ддаг бакастӕй адӕймаджы зӕрдӕ райы.

Скъолайы директор Цӕразонты Мӕдинӕ афтӕ зӕгъы:

— Не скъолайы ахуыры цыд арӕзт у ирон ӕвзагыл, полилингвалон программӕ ацы скъолайы ахуырадӕн у йӕ астӕуккаг цӕджындз. Уый та домы ирон ӕвзагыл фылдӕр предметтӕ амонын ӕмӕ ахуыр кӕнын. Бирӕтӕм уыцы хъуыддаг диссаг фӕкӕсы, куыд ис математикӕ ӕмӕ ӕндӕр предметтӕ ирон ӕвзагыл ахуыр кӕнӕн, зӕгъгӕ. Фӕлӕ, мӕнмӕ гӕсгӕ, сывӕллон уыйбӕрц зындзинад не ‘ййафы. Уымӕн ӕмӕ ацы хъуыддаг аразгӕ у ахуыргӕнӕджы фӕлтӕрддзинадӕй, ӕрмӕг раст амынд кӕй цӕуы, уымӕй.

Скъолайы разамонӕг йӕ ахуыргӕнджытӕй сӕрыстыр кӕй у, уый бӕрӕг у йӕ ныхасӕй ӕмӕ сӕ ахастытӕй дӕр. Бекъойты Янӕ у ирон ӕвзаг ӕмӕ литературӕйы ахуыргӕнӕг. Йӕхӕдӕг дӕр нырма хӕрзӕрыгон у, фарон каст фӕци Цӕгат Ирыстоны Хетӕгкаты Къостайы номыл паддзахадон университеты ирон филологийы факультет. Йӕ фӕлмӕн дзыхы ныхасӕй йӕхи сабитӕн бауарзын кодта. Йӕ урочы бындз куы атӕха, уӕд йӕ базырты уынӕр  дӕр райхъуысдзӕн, афтӕ лӕмбынӕг ӕм фӕхъусынц йӕ ахуырдзаутӕ.

Скъолайы бахизӕны ис стенд, сабитӕ сӕхи къухтӕй цы диссӕгтӕ аразынц, уыдоны равдыст. Ахуыр та сӕ кӕны Хъулаты Жаннӕ — ӕрмдӕсныйад ӕмӕ нывкӕнынады ахуыргӕнӕг.

Ахуыр кӕнынц фӕсарӕйнаг ӕвзаг дӕр. Дзиуаты Маринӕ у англисаг ӕвзаджы ахуыргӕнӕг. Йӕ уроктӕ кӕны афтӕ, сабитӕн ӕнцонӕмбарӕн ӕмӕ цымыдисаг куыд уой, цӕмӕй сӕм зонындзинӕдтӕ райсынмӕ тырнындзинад райрӕза.

Скъолайы тынг парахат у уӕлӕмхасӕн ахуырад. Сӕ уроктӕ куы ахицӕн вӕййынц, уӕд сын рӕстӕг вӕййы баулӕфынӕн ӕмӕ сӕ хӕдзармӕ куыстытӕ баххӕст кӕнынӕн. Фӕссихор та алы къласы дӕр вӕййы уӕлӕмхасӕн ахуырады къордтӕ: шахмӕттӕ, ирон хореографи, нывкӕнынад, ӕрмдӕсныйад, театралон студи, мультипликацион студи ӕмӕ афтӕ дарддӕр. Систой фыццаг мультипликацион киноныв ирон ӕвзагыл Ирыстоны зынгхуыст хъӕбултӕ Гӕздӕнты авд ӕфсымӕры тыххӕй. Хъӕлӕстӕ дӕр ныффыстой сабитӕ сӕхӕдӕг.

Нырма уал гимназы ис ӕртӕ къласы. Ам ахуыр кӕнынц ӕрмӕст Дзӕуджыхъӕуы сабитӕ нӕ, фӕлӕ нӕ республикӕйы алы районтӕй дӕр. Уый тыххӕй скъолайы бӕстыхайы ис интернат. Ам сывӕллӕттӕн цӕрынӕн ис ӕппӕт фадӕттӕ дӕр, ис дзы, нырыккон домӕнтӕн дзуапп чи дӕтты, ахӕм хӕрӕндон.

— Нӕ сывӕллӕттӕ сты нӕ республикӕйы алы районтӕй. Бирӕты сӕ ныййарджытӕ ӕрбаласынц. Ис нӕм 14 сывӕллоны, дӕрддзӕф чи цӕры, ахӕмтӕ. Уыдон интернаты вӕййынц къуырисӕрӕй — майрӕмбонмӕ, — бафтыдта ма йӕ ныхасыл скъолайы разамонӕг.

Алайнаг гимназы ахуыр кӕнынц къуыри фондз боны. Сабат бон та фӕархайынц алыхуызон сфӕлдыстадон къордты. Скъолайы разамонӕг куыд загъта, афтӕмӕй ирон кӕфтытыл ахуыр кӕнынц ахуырдзаутӕ се ‘ппӕт дӕр, ома, сын уыцы хъуыддаг фӕндонӕй нӕу. Цы ма уа уымӕй рӕсугъддӕр, ирон фӕсивӕд ирон кӕфтытӕ куы зоной. Хъыгагӕн, хатгай нӕ фӕсивӕдӕй бирӕтӕ ирон хъазты сӕ къах айсын дӕр нӕ фӕзонынц. Уый у стыр хъомыладон куыст. Сывӕллӕттӕ канд ирон ӕвзаг нӕ ахуыр кӕнынц, фӕлӕ ма нӕ адӕмы культурӕ ӕмӕ традицитӕ дӕр.

Алайнаг гимназ у фыццаг ахӕм ахуырадон скъола, кӕцы, ӕнӕмӕнг, феххуыс уыдзӕн нӕ мадӕлон ӕвзаг ӕмӕ нӕ адӕмон традицитӕ бахъахъхъӕнынӕн.

Хъойбайты Галинӕ

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here