Боны фӕткы — фыццаградон программӕтӕ «Ӕнӕниздзинад хъахъхъӕнынад» ӕмӕ  «Культурӕ»

0
19

Битарты Вячеслав дзы сӕрдариуӕг кодта, афтӕмӕй уыд республикӕйы Проектон офисы ӕмбырд. Фембӕлды архайджытӕ бӕстон ӕрдзырдтой фыццаградон программӕтӕ «Ӕнӕниздзинад хъахъхъӕнынад» ӕмӕ «Культурӕ» ӕххӕст кӕныныл.

Боны фӕткы фарстыты фӕдыл сӕ хъуыдытӕ загътой Хицауады Сӕрдары хӕдивджытӕ Сӕбӕтхъуаты ӕхсарбег, Фадзайты ӕхсарбег, Годжыцаты Тамерлан ӕмӕ Иринӕ Азимова, экономикон рӕзты министр Томайты Хъазыбег, культурӕйы министры фыццаг хӕдивӕг Мамсыраты Сослан, Туризмы комитеты сӕрдары хӕстӕ рӕстӕгмӕ ӕххӕстгӕнӕг Хъодзаты Зауырбег,  РЦИ-Аланийы Рӕзты агентады разамонӕг Плиты Алыксандр ӕмӕ ӕндӕр бӕрнон кусджытӕ.

Фыццаградон программӕ «Ӕнӕниздзинад хъахъхъӕнынад»-ы разамонӕг Туаты Ирмӕ куыд радзырдта, афтӕмӕй сӕрмагонд мадзӕлттӕ арӕзт цӕуы, цӕмӕй республикӕйы дохтыртӕ сӕ профессион дӕсныдзинад бӕрзонддӕр кӕной бӕстӕйы раззагдӕр медицинон клиникӕты.

Зӕгъӕм, ирыстойнаг медикты иу къорд тагъд рӕстӕджы ахуыртӕм ацӕудзӕн Профилон ахуырады уӕрӕсейаг медицинон академимӕ. Уыимӕ, республикӕ ӕмӕ академийы ‘хсӕн ӕмгуыстад ӕххӕстгонд цӕудзӕн иудадзыгон фӕткыл — уымӕн ахъаз уыдзӕн ӕмархайды фарстыты фӕдыл сӕрмагонд бадзырд.

Уымӕй уӕлдай, хӕстӕгдӕр рӕстӕг ахӕм профессионалон дӕсныдзинады курсытӕм ацӕудзысты иннӕ дохтыртӕ дӕр. Зӕгъӕм, хирург Хъазиты Тимур стажировкӕ кӕндзӕн Рязаны паддзахадон медицинон университеты, Дзгойты Алан та — Травматологи ӕмӕ  ортопедийы ӕппӕтуӕрӕсеон наукон-иртасӕн институты. Афтӕ, архайд цӕуы, цӕмӕй ӕндӕр специализацийы дохтыртӕн дӕр фадат уа сӕ дӕсныдзинад фӕбӕрзонддӕр кӕнынӕн.

Ӕмбырды архайджытӕ сӕрмагонд ӕргом аздӕхтой адӕмы иумӕйаг диспансеризаци ӕххӕст кӕныны уагӕвӕрдмӕ дӕр. Ныридӕгӕн нӕ республикӕйы цӕрджытӕй бирӕтӕ спайда кодтой, диспансеризацийы мадзӕлттӕ сын се ‘нӕниздзинад бахъахъхъӕныны хъуыддаджы цы фадӕттӕ дӕттынц, уыдонӕй. Уыимӕ, ӕмбырды архайджыты хъуыдымӕ гӕсгӕ, ноджы фӕахадгӕдӕр кӕнын хъӕуы ацы профилактикон акцийы тыххӕй информацион-ӕмбарынгӕнӕн куыст.

Республикӕйы медицинон кусӕндӕттӕ цӕттӕ сты диспансеризацийы мадзӕлттӕ ӕххӕст кӕнынмӕ — ӕмӕ уыцы хъуыды хӕццӕ кӕнын хъӕуы адӕммӕ.

Программӕйы мадзӕлттӕ куыд ӕххӕстгонд цӕуынц, ууыл дзургӕйӕ, Битарты Вячеслав куыд фӕнысан кодта, афтӕмӕй лӕмбынӕг ӕркӕсын хъӕуы, диспансеризаци цы къуыхцы кӕны, уыцы ӕууӕлтӕм ӕмӕ сӕ аиуварс кӕнын.

Фыццаградон программӕ «Культурӕ» ӕххӕст кӕныны фӕдыл уыд йӕ доклад Атайты Мӕдинӕйӕн. Программӕйы разамонӕг куыд радзырдта, афтӕмӕй сӕрмагонд ӕргом аздӕхтой курдиатджын сывӕллӕттӕ раргом кӕнын ӕмӕ сӕ дарддӕры ахуырады хъуыддагмӕ. Ахӕм курдиатджын фӕсивӕд ӕрвыст кӕдӕм цӕудзысты, уыцы ахуырадон кусӕндӕттӕй иу суыдзӕн Аивӕдты республикон лицей. Уым ис хъомысджын материалон-техникон бындур, кусынц дзы фӕлтӕрдджын ӕмӕ дӕсны специалисттӕ музыкӕйы, нывгӕнынад ӕмӕ хореографийы.

Куыд нысангонд цӕуы, афтӕмӕй курдиатджын сывӕллӕтты раргом кӕныны куыст цӕудзӕн суанг скъолайы агъоммӕ ахуырады кусӕндӕттӕй. Уый фӕстӕ къӕпхӕныл фадӕттӕ арӕзт цӕудзӕн, цӕмӕй уыцы лӕппутӕ ӕмӕ чызджытӕ сӕ ахуырад дарддӕр ӕххӕст кӕной Аивӕдты республикон лицейы, кӕнӕ сӕрмагонд музыкалон ӕмӕ аивадон скъолаты.

Атайты Мӕдинӕ йӕ раныхасы ӕргом аздӕхта программӕйы иннӕ уагӕвӕрдтӕ ӕххӕст кӕныны хъуыддагмӕ дӕр. Йӕ ныхасмӕ гӕсгӕ, сӕрмагонд цӕстдард хъӕуы, УФ-йы Культурӕйы министрады уӕлдӕр ахуыргӕнӕндӕтты студенттӕ чи сси, нӕ уыцы курдиатджын фӕсивӕдмӕ. Уыцы ӕууӕл хынцгӕйӕ, Битарты Вячеслав ӕххӕстгӕнӕг хицаудзинады оргӕнты разамонджытӕн бахӕс кодта, цӕмӕй сӕ фӕндӕттӕ ӕрбадӕттой фӕсивӕды уыцы фӕлтӕрӕн сӕрмагонд стипендитӕ ӕмӕ уӕлӕмхасӕн социалон ӕххуысы мадзӕлттӕ снысан кӕныны фӕдыл.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here