Сыгъзӕрин фӕззӕг-2019″

0
19

«Ралӕууыд бӕркадджын фӕззӕг, ӕмӕ та Мӕскуыйы, Адӕмон Хӕдзарады ӕнтыстдзинӕдты Равдысты уӕрӕх фӕзмӕ ӕрӕмбырд уыдзысты Уӕрӕсейы ӕппӕт регионты минӕвӕрттӕ. Хъӕууон хӕдзарады ӕмӕ хомаджы промышленносты кусӕджы профессионалон бонмӕ, ныр 21-ӕм хатт арӕзт ӕрцӕудзӕн ӕппӕтуӕрӕсеон агропромышленнон равдыст «Сыгъзӕрин фӕззӕг-2019».

Архайдзысты дзы Цӕгат Ирыстоны делегаци дӕр, сӕ сӕргъы республикӕйы Сӕргълӕууӕг Битарты Вячеслав, Уӕрӕсейы Федерацийы Президенты цур Цӕгат Ирыстоны ӕххӕстбарджын минӕвар Дзанайты Барис,  РЦИ-Аланийы хъӕууон хӕдзарады ӕмӕ хойраджы промышленносты министр Уазиты Хъазыбег, хъӕууонхӕдзарадон куыстуӕтты разамонджытӕ, фермертӕ, ахуыргӕндтӕ, ӕндӕр бӕрнон кусджытӕ. Алчидӕр сӕ архайдзӕн хъӕууон хӕдзарады къабазы райрӕзтыл ныхас кӕм цӕудзӕн, ахӕм цӕлхӕмбырдты, секциты ӕмӕ форумты куысты.

— Нӕ республикӕ алы хатт дӕр вӕййы «Сыгъзӕрин фӕззӕджы» архайӕг. «Уӕрӕсейы регионтӕ ӕмӕ фӕсарӕйнаг бӕстӕтӕ», зӕгъгӕ, ахӕм павильоны Ирыстонӕн уыдзӕн сӕрмагонд информацион стенд.

Ӕвдыст дзы цӕудзысты нӕ экспорты ӕмӕ инвестицион гӕнӕнтӕ, хъӕууон фӕзуӕтты райрӕзты хуыздӕр фӕлтӕрддзинӕдтӕ, нӕ абоны ӕмӕ фидӕны ӕнтыстджын проекттӕ. Парахатӕй дзы равӕрдзыстӕм хойраджы ӕмӕ хомаджы промышленносты хуыздӕр регионалон продукцийы хуызтӕ, — зӕгъы министр Уазиты Хъазыбег.

21-ӕм ӕппӕтуӕрӕсеон агропромышленнон равдыст «Сыгъзӕрин фӕззӕг-2019» цӕудзӕн Агропромышленнон комплексы къуырийы фӕлгӕты. Йӕ бындурыл, 4-13 октябрмӕ цӕудзысты культурон-дзыллон мадзӕлттӕ. Сӕ саразӕг — Уӕрӕсейы Федерацийы Хъӕууон хӕдзарады министрад. «Сыгъзӕрин фӕззӕг-2019» йӕ куыст райдайдзӕн 9 октябры.

РЦИ-Аланийы Хъӕууон хӕдзарады министрады пресс-службӕ

ОСТАВЬТЕ ОТВЕТ

Please enter your comment!
Please enter your name here