Бӕхты театр «Каскадер»-ӕн — ног бынат

0
29

Ӕппӕт дунейыл хъуыстгонд, дзӕнӕты бадинаг Хъантемыраты Мухтарбег цы бӕхты театр «Каскадер» сарӕзта, уый  ӕрбынат кодта Мӕскуыйы ӕфсӕддон-спортивон комплекс «Патриот»-ы.  Ахӕм уынаффӕ рахаста Уӕрӕсейы Федерацийы Хъахъхъӕнынады министрад.  ӕмӕ ныр иудадзыг уыдзӕн ам. Ничиуал ӕй феддӕдуар кӕндзӕн.  ӕрӕджы йӕ йӕ зӕронд бынатӕй Мӕскуыйы ӕнӕнхъӕлӕджы уавӕрты министрады академийы разамынд куыд феддӕдуар кодтой, афтӕ.

Ацы аз Хъантемыраты Мухтарбеджы театр «Каскадер»-ыл сӕххӕст 30 азы. Уый фӕдыл  «Патриот»-ы бӕхты манежы 5 октябры уыдис стыр равдыст. Уырдӕм ӕрбахуыдтой мах дӕр — Мӕскуыйы ирон  ӕхсӕнады уӕнгты.

Бӕхты театры концерт байгом кодта Хъантемыраты Мухтарбеджы хорз хӕлар, зындгонд режиссер Юлий Гусман. Уый йӕ раныхасы хорз хъарм ныхӕстӕ ракодта Хъантемыраты Мухтарбеджы тыххӕй. Ю. Гусман систа киноныв «Не бойся, я с тобой». Уым сӕйраг ролтӕй иуы хъазыд Мухтарбег.

Уый фӕстӕ Хъантемыраты номӕй раныхас кодта Хъантемыраты Олег. Нӕ фӕзивӕг кодта ацы бӕрӕгбонмӕ Канадӕйӕ  ӕрбацӕуын.

Концерт уыдис дыууӕ хайӕ. Фыццаг хай уыдис арӕзт Доны хъазахъы царды нывтӕй. Дыккаг хайы  айзӕлд ирон цагъд, ӕмӕ бӕхтылбадджытӕ манежмӕ куы ратахтысты сӕ бӕхтыл, диссаджы митӕ кӕнын куы райдыдтой, уӕд  ӕрбацӕуӕг адӕмӕн сӕ къухӕмдзӕгъдӕн бауромӕн нал уыдис.  ӕнӕхъӕн сахатӕй фылдӕр ирон бӕхтылбадджытӕ сӕ разамонӕг Хабӕты Цӕраимӕ диссаджы кӕфтытӕ фӕкодтой.

Концерт куы фӕцис, уӕд мах, Мӕскуыйы ирон  ӕхсӕнады уӕнгтӕ  Саулохты Умар  ӕмӕ  ӕз стыр арфӕтӕ ракодтам Уӕрӕсейы Федерацийы  Хъахъхъӕнынады министрады разамындӕн, Мухтарбеджы номыл театры генералон директор Анатолий Клименкойӕн, Хъантемыраты Олег  ӕмӕ  бӕхтылбадджыты ирон къордӕн сӕ рухстауӕн куысты тыххӕй.

Ахӕм циндзинады хабар ӕрцыдис Мӕскуыйы. Хъантемыраты Мухтарбеджы номыл театры разамынд нын куыд фехъусын кодта, афтӕмӕй сфӕнд кодтой Хъантемыраты Мухтарбегӕн бӕхты манежы раз стыр цыртдзӕвӕн сӕвӕрын.

Ходы Тамерлан, Мӕскуы

ОСТАВЬТЕ ОТВЕТ

Please enter your comment!
Please enter your name here