Боны фӕткы — коммуналон хӕдзарады нывылдзинад ӕмӕ горӕты фӕлгонцад

0
13

Цӕгат Ирыстоны сӕйраг горӕты цӕрӕнуӕтты- коммуналон хӕдзарады ӕнӕкъуыхцы куыст ӕмӕ ӕхсӕнадон бынӕтты фӕлгонцады фарстытыл ныхас цыд, Дзӕуджыхъӕуы муниципалон арӕзты сӕргълӕууӕг Икъаты Русланбег ӕмӕ горӕты администрацийы хицауы хӕстӕ ӕххӕстгӕнӕг  Фӕрниаты Тамерлан цы ӕмбырд сарӕзтой, уым.

Боны фӕткы фарстыты фӕдыл ныхасы архайдтой администрацийы структурон дӕлхайӕдты разамонджытӕ, горӕты Минӕвӕртты ӕмбырды депутаттӕ, цӕрӕнуӕтты-коммуналон хӕдзарады комплексы специалисттӕ.

Ӕмбырды архайджытӕ куыд фӕнысан кодтой, афтӕмӕй горӕты коммуналон хӕдзарад рацаразинаг у. Специалистты хъуыдымӕ гӕсгӕ, уыцы нысан къухы бафтдзӕн, Дзӕуджыхъӕу алыхуызон сӕрмагонд федералон программӕты ахадгӕ хуызы куы архайа, уӕд. Икъаты Русланбег фӕндон бахаста, цӕмӕй уыцы ӕмӕ иннӕ фарстытӕ бӕстондӕр лыг кӕныны нысанимӕ муниципалитеты ӕмвӕзадыл арӕзт ӕрцӕуа проектон офис. Уыцы структурӕ комкоммӕ кусдзӕн цӕрӕнуӕтты-коммуналон хӕдзарады райрӕзт ӕмӕ горӕты службӕты архайд фӕнывылдӕр кӕныны проекттыл, федералон программӕты архайыны фӕдыл цӕттӕ кӕндзӕн хъӕугӕ документаци ӕмӕ афтӕ дарддӕр. Уыимӕ, Икъайы-фырты ныхасмӕ гӕсгӕ, цыбыр ӕмгъуыдмӕ сбӕрӕг кӕнын хъӕуы, фыццаградон ӕгъдауӕй цы фарстытыл бакусын хъӕудзӕн, уыдоны номхыгъд.

«Горӕты цардарӕзты фарстытӕ ӕнтыстджындӕрӕй лыг кӕнынӕн хорз фадат дӕттынц, федералон бюджет сӕрмагонд фӕрӕзтӕ цы программӕтӕн дих кӕны, уыдон. Хъӕуы сӕ ӕрмӕстдӕр ӕппӕтвӕрсыг хуызы архайын», — фӕнысан кодта муниципалон арӕзты сӕргълӕууӕг.

Ӕмбырды архайджытӕ сӕрмагонд ӕргом аздӕхтой фӕндӕгты цалцӕг ӕмӕ фӕлгонцады иннӕ фарстытӕм.

Зындгонд куыд у, афтӕмӕй ацы аз зынгӕ фӕхъомысджындӕр Фӕндӕгты фонд. Уыцы ӕууӕл фадат радта, цӕмӕй цалцӕггонд ӕрцӕуой фылдӕр горӕтаг фӕндӕгтӕ. Уыимӕ, Фӕрниаты Тамерлан ӕмӕ иннӕ бӕрнон кусджытӕ иуӕй-иу фиппаинӕгтӕ бахастой, фӕндӕгты цалцӕгыл бӕрнон чи у, уыцы подрядон организациты куыстмӕ.

«Горӕты цӕрджыты цӕстӕй ницы бамбӕхсдзӕн. Адӕмӕй бирӕтӕ хъаст кӕнынц фӕндаг аразджыты архайдӕй. Зӕгъӕм, фӕндаг сцалцӕг кӕнынц, фӕлӕ зӕронд асфальт ӕмӕ бордюртӕ уынгты тигътыл ныууадзынц, кӕнӕ фӕндаг ӕмӕ тротуарты ӕхсӕн зӕххы уадздзӕгтӕ ӕнӕзылдӕй ныууадзынц», — бафиппайдта Фӕрниаты Тамерлан ӕмӕ подрядчиктӕн бафӕдзӕхста, цӕмӕй ӕппӕт лыстӕг хабӕрттӕм дӕр лӕмбынӕг цӕстдард уа.

Фембӕлды архайджытӕ ӕркастысты горӕты администраци ӕмӕ Минӕвӕртты ӕмбырды ӕнгом ӕмархайды фарстытӕм дӕр.

Дзӕуджыхъӕуы администрацийы пресс-службӕ

ОСТАВЬТЕ ОТВЕТ

Please enter your comment!
Please enter your name here