«Фӕстауӕрцджын хицауад» — царды ӕххӕст кӕнгӕйӕ

0
13

Чысыл амалхъомадон куыстуат байгом кӕнынвӕнд кӕмӕ уыд, ахӕм нӕлгоймаг хъӕугӕ документтӕ ӕмбырдгӕнгӕйӕ сӕмбӕлд ӕнӕнхъӕлӕджы цӕлхдуртыл. Цалдӕр хатты бацыд, зӕххы хай йын кӕм дих кӕнынц, уый муниципалон сконды картӕйыл ссарыны охыл, цӕмӕй йын уый фӕстӕ йӕ документтӕ хъӕугӕ актӕй баххӕст кӕной. Уыцы-иу специалистмӕ бацыдис аст-фараст хатты, дурын куклайӕ рӕсугъддӕр чызг, иу хаттӕй-иннӕмӕ горӕты картӕйы хъӕугӕ зӕххы хай ссарынхъом нӕ уыдис. Нӕлгоймаг йӕхицӕй ӕфсӕрмы кӕнын райдыдта, специалист та — нӕдӕр размӕ не ‘нкъуысыд, нӕдӕр — фӕстӕмӕ: афтӕ дӕр йӕ «агурыны» мадзӕлтты нӕ басгуыхт.

Ӕвӕццӕгӕн, паддзахадон ӕмӕ муниципалон куыстуӕтты ‘хсӕн электронон документты зилдухад хуымӕтӕджы не ‘рфидар кодтой, адӕммӕ паддзахадон лӕггӕдтӕ фӕхӕстӕгдӕр кӕныны нысанимӕ  информацион технологитӕм дзӕгъӕлы нӕ рахызтысты. Дунеон фӕлтӕрддзинад куыд ӕвдисы, афтӕмӕй куыст нывыл арӕзт кӕм у, уым хъуыддӕгтӕ дӕр хуыздӕр ӕмӕ рӕвдздӕр ӕнтысынц. Уӕвгӕ, дард цӕмӕ цӕуӕм, советон рӕстӕджы тынг ахсджиаг уыдис куыст наукӕйы бындурыл рацаразын (научная организация труда). Дыууӕ азы дӕргъы Цӕгат Ирыстон архайы сӕрмагонд проект «Фӕстауӕрцджын хицауад»-ы, архайджытӕ ӕдӕппӕтӕй Уӕрӕсейы сты аст регионы.

Нӕ республикӕйы Сӕргълӕууӕг Битарты Вячеслав куыд банымадта, афтӕмӕй нӕм куыст фӕхъомысджындӕр кӕнынӕн, цавӕр къуылымпыдзинӕдтӕ ӕвзӕры ӕмӕ цӕй аххосӕй, уыдӕттӕ раиртасынӕн проект у ахсджиаг. Алы ведомствӕйы дӕр фӕзындис сӕрмагонд кусӕг къордтӕ, уыдон иртасынц, сӕ архайд къуылымпыдзинӕдтӕ кӕй ӕмӕ цӕй тыххӕй ӕвзары, уыдӕттӕй хатдзӕгтӕ скӕнгӕйӕ, фӕнысан кӕнынц уавӕр банывыл кӕныны мадзӕлттӕ. Нӕ республикӕйы разамынды архайд дӕр ӕнцой кӕны бӕлвырд фӕткыл, ӕнӕмӕнг, фӕзыны дзы цавӕрдӕр къуылымпыдзинӕдтӕ. Тынгдӕр сӕ цы хъыгдары, цас вазыгджын сты уыцы аххосӕгтӕ, уыдӕттӕ ӕвзары кусӕг къорд, йӕ разамонӕг       РЦИ-Аланийы Хицауады коррупцийы ныхмӕ управленийы хицау Цгъойты Тамерлан.

Знон Цгъойы-фырт фембӕлд дзыллон хабархӕссӕг фӕрӕзты минӕвӕрттимӕ, фӕбӕрӕг кодта проект «Фӕстауӕрцджын хицауад» сын куыд ӕнтысы, цавӕр мадзӕлттӕй йыл кусынц, уыцы ахсджиагдӕр рахӕцӕнтӕ. Йӕ ныхасмӕ гӕсгӕ, ацы фӕлтӕрддзинад нӕ бӕстӕмӕ ӕрбацыд Японӕй, фыццагдӕр уал дзы спайда кодта «Росатом», уымӕй дарддӕр —»КАМаЗ». Сӕ разамынды хатдзӕгтӕм гӕсгӕ, фӕлтӕрддзинад йӕхи хорзӕй равдыста, куыстадон хъуыддаг кӕд кӕмдӕр, цавӕрдӕр ӕмтъерыдзинӕдтӕ ӕвзӕрста, уӕд ацы проекты фӕрцы иуварсгонд ӕрцыдысты. «Куыстад ӕмӕ паддзахадон разамынддӕттыны оргӕнты архайды ‘хсӕн ис бирӕ хицӕндзинӕдтӕ. Фӕлӕ хъуамӕ иу ран ӕмӕ иннӕ ран дӕр нӕдӕр кусӕг, нӕдӕр ӕрбацӕуӕг адӕймаг къуылымпыдзинӕдтӕ ма ӕййафа. Бӕрнон адӕймаг цы ран кусы, уым хъуамӕ ӕмтъеры, арвистон мацы хуызы ӕруадза — уымӕй аразгӕ у, йӕ хӕстӕ цас рӕвдз ӕмӕ афойнадыл ӕххӕст кӕны, уый. Иннӕ ахӕм, куырдиат, кӕнӕ йӕм цавӕрдӕр домӕнимӕ чи ӕрбацӕуы, уымӕн йӕ хъуыддаг цас рӕстӕгмӕ ӕмӕ цы хуызы алыг кӕндзӕн, уый», — загъта Цгъойы-фырт.

Ӕддейы бакӕсгӕйӕ, Хицауады хӕдзары куыст цӕуы, алчидӕр йӕ хӕстӕ ӕмӕ йӕ нысантӕ зоны, фӕлӕ дзы бӕрӕг къуылымпыдзинӕдтӕ дӕр сӕвзӕры. Зӕгъӕм, ӕппӕт муниципалон скондтӕ дӕр, уыцы-иу рӕстӕг, иугонд реестрмӕ барвитынц сӕ нормативон акттӕ. Уыдӕттӕ ӕвзаргӕйӕ, рабӕрӕг, уыцы иухуызон рӕдыдтытӕ дзы кӕй ӕруадзынц, уый. Бахъуыдис рӕстӕг аххосӕгтӕ ссарынӕн, уый фӕстӕ бӕрнон адӕймӕгты ӕрӕмбырд кодтой, бацамыдтой сын рӕдыдтыты аххосӕгтӕ, ӕмӕ ма сӕ ‘руадзыны мадзӕлттӕ дӕр. Кӕд ӕмӕ бынтон ӕнӕ рӕдыд нал вӕййынц, уӕддӕр уавӕр зынгӕ фӕхуыздӕр. Уыцы мадзӕлттӕ конд ӕрцыдысты проект «Фӕстауӕрцджын хицауад»-ы фӕлгӕты.

Цгъойты Тамерлан куыд радзырдта, афтӕмӕй проекты домӕнтӕм гӕсгӕ кусын райдыдтой дӕс алыхуызон нысаныл, уыйас зын ссарӕн нӕ уыдысты куыст къуылымпыгӕнӕг тыхстаг фарстытӕ. Уыдонмӕ ахӕссӕн ис, Хицауады ӕмбырдтӕм ӕнӕмӕнгхъӕугӕ документтӕ афойнадыл бацӕттӕ кӕнын ӕмӕ барвитын. «Цы йӕ сусӕг кӕнӕм, рауадис-иу афтӕ, ӕмӕ бӕрӕггонд ӕмгъуыдмӕ министрад кӕнӕ комитет документтӕ не сцӕттӕ кодтой, уымӕ гӕсгӕ та хъуамӕ Хицауады ӕмбырды боны фӕткӕй фарста ист ӕрцыдаид. Афойнадыл вазыгджын хъуыддӕгтӕ кӕныны ӕвзӕрдис ӕнӕбындур цӕлхдур. Нӕ кусӕг къорд уыцы аххосӕгтӕ равзӕрста, фӕбӕрӕг кодтам банывыл кӕнинӕгтӕ, иумӕйагӕй сыл бацархайдтам, ныр Хицауады ӕмбырдтӕ ахӕм къуылымпыдзинӕдтӕ нал ӕййафынц», — бафиппайдта Цгъойы-фырт.

Куыд бамбарын кодта, афтӕмӕй кӕцыдӕр проекттӕ, ома — куыстуромӕг цӕлхдуртӕ аиуварс кодтой ӕмӕ проекттӕ ӕхгӕд ӕрцыдысты. Фӕлӕ ис ахӕм хъуыддӕгтӕ, ахӕм паддзахадон архайд ӕмӕ йӕ уромӕн нӕй, бонӕй-бонмӕ дзы цы цӕлхдуртӕ ӕвзӕры, уыдон хъӕуы иуварс кӕнын. Уымӕ гӕсгӕ, нырма архайынц фондз вазыгджын проектыл, афтӕ зӕгъӕн дӕр нӕй, ӕмӕ иу тыхстдзинад, иу къуылымпы иуварсгонд куы ‘рцӕуа, уӕд иннӕ нал сӕвзӕрдзӕн. Цгъойы-фырты ныхасмӕ гӕсгӕ, бирӕ аразгӕ у хорз цӕттӕгонд специалисттӕй, адӕм сӕ комкоммӕ хӕстӕм цы цӕстӕй кӕсынц, уыдӕттӕй. Иу кусӕг ӕппӕт хъуыддӕгтӕ дӕр кӕны бӕрнонӕй, иу хӕс иннӕимӕ не ‘мхӕццӕ кӕны, йӕ фарсмӕ ӕндӕр ахӕм кусӕг — бонасадӕнтӕ, ӕгӕнонтӕ кӕны ӕмӕ сӕ дыууӕйӕн дӕр ис ӕмхуызон мызд…

Цгъойты Тамерлан бӕстон дзуаппытӕ радта уацхӕсджыты фарстытӕн, куыд бамбарын кодта, афтӕмӕй, «Фӕстауӕрджын хицауад»-ы проект Цӕгат Ирыстоны ӕххӕстгонд куыд цӕуы, уый бӕрӕггӕнӕнтӕ иртасы Проектон офис, ис дзы бӕрнон дзуапдӕттӕг адӕймӕгтӕ. Алы ран дӕр ӕппӕт хъуыддӕгтӕ конд цӕуынц адӕмы сӕраппонд, сӕ хорздзинадӕн, сӕ рӕстӕг, сӕ хъару, сӕ зӕрдӕйыуаг сын бахъахъхъӕныны охыл. Уырдӕм ахӕсгӕ сты, республикӕйы Сӕргълӕууӕгмӕ комкоммӕ телефонтӕй цӕрджытӕ цы бирӕ фарстытӕ, куырдиӕттӕ, домӕнтимӕ ӕрбадзурынц, уыдон дӕр. Цӕмӕй сӕ алыг кӕнын ма ныддӕргъвӕтин уа, ахадгӕ ӕмӕ бӕрнондӕр уа, уыцы нысанимӕ ӕрхъуыды кодтой сӕрмагонд кол-центр байгом кӕнын. Ныридӕгӕн хъӕугӕ специалисттӕ цӕттӕ кӕнынц, адӕймаг йӕ куырдиатимӕ куы ‘рбадзура, уӕд фарст иу чиновникӕй иннӕмӕ ӕрвитыны бӕсты, уайтагъд кол-центры специалист телефонӕй бадзурдзӕн бӕрнон, дзуапдӕттӕг адӕймагмӕ. ӕнӕмӕнг, ахӕм архайды хуыз фӕпайда уыдзӕн адӕмы тыхстаг фарстытӕ афойнадыл лыг кӕнынӕн.

Цгъойты Тамерлан ма бӕстон радзырдта, паддзахадон ӕмӕ муниципалон хицауиуӕггӕнӕг оргӕнты куыст фӕхуыздӕр кӕнынӕн цы мадзӕлттӕй пайда кӕнынц, уыдӕтты тыххӕй.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here