«Къоста — мӕ царды»

0
21

Хетӕгкаты Къостайы юбилейон азы бындурыл афӕдзы дӕргъы нӕ республикӕйы цӕуынц алыхуызон цымыдисаг мадзӕлттӕ. Дзӕуджыхъӕуы Къостайы номхӕссӕг 13-ӕм скъолайы уыдис фембӕлд, Ирыстоны аивады, литературӕйы ӕмӕ наукӕйы Къостайы премийы лауреаттимӕ. Фембӕлд бацӕттӕ кодтой педагогон институты кусджытӕ, «Уӕрӕсейаг скъоладзауты змӕлд»-ы цӕгатирыстойнаг регионалон хайад.

Фембӕлд ӕнӕмӕнгхъӕугӕ хъуыддаг уыд рӕзгӕ фӕлтӕры национ хъомылады, Къоста нӕ царды куыд ахсджиаг у, уый  ноджы арфдӕр банкъарынӕн ӕмӕ не ‘взаджы хъысмӕт поэты номимӕ ӕнгом баст кӕй у, уый сывӕллӕттӕн бамбарын кӕнынӕн. Кӕддӕр,  йӕхӕдӕг сывӕллон уӕвгӕйӕ, фыццаг хатт Къостайы «Ирон фӕндыр» чи бакаст, уыцы лауреаттӕ ахуырдзаутӕн сӕ сабидуджы мысинӕгтӕ радзырдтой, Къоста йӕ царды кӕмӕн цы бынат ахсы, уый фӕдыл. Мадзал байгом кодта скъолайы директор, ирон ӕвзаджы хъысмӕтыл зӕрдӕйӕ чи риссы, йӕ рӕзтмӕ йын стыр ӕвӕрӕн чи хӕссы канд хъомыладон куысты фӕрцы нӕ, фӕлӕ ӕхсӕнадон царды разӕнгардӕй дӕр чи архайы, уый — ирон ӕвзаджы патриот Сӕлбиты Иринӕ.

— Къостайы хуызӕн адӕймӕгтӕ сӕдӕ азы иу хатт райгуыры. Мӕнӕн тынг зын у, Къоста мӕ царды цавӕр бынат ахсы, уый бацамонын, уымӕн ӕмӕ Къостайы фаг ныхӕстӕ ӕз дзырдуаты дӕр не ссардзынӕн. Йӕ ном хӕссы не скъола ӕмӕ, нын уый та ноджы бӕрзонддӕр кад у, ууыл дзурӕг у, ӕмӕ махӕн нӕй ирон ӕвзаг ӕмӕ Къостайы рох кӕныны бар. Къостайы преми райсын ӕнцон нӕу, алы фыссӕг не свӕййы уый аккаг, алы уацмысы фӕдыл ӕй нӕ раттынц. Фӕлӕ абон фембӕлдмӕ кӕй ӕрбахуыдтам, уыцы лауреатты сфӕлдыстадон куысты бӕрӕггӕнӕнтӕ Ирыстоны культурӕйы ахсджиаг бынат ахсынц. Уыдон сты: УФ-йы сгуыхт скульптор-нывгӕнӕг Дзбойты Михал, зындгонд журналист, фыссӕг Цгъойты Хазби, УФ-йы адӕмон артист Сӕбанты Тамерлан, фыссӕг ӕмӕ журналист Цомартаты Изӕтбег ӕмӕ сывӕллӕтты кафджыты паддзахадон ансамбл «Маленький джигит»-ы разамонӕг Кокайты Таймураз, — загъта Сӕлбиты Иринӕ.

Алы сывӕллоны хӕс дӕр у Къостайы ӕмдзӕвгӕтӕ зонын, фӕлӕ сын кадджын уазджытимӕ цы зӕрдӕйӕ-зӕрдӕмӕ ныхас рауад, уый никуы ферох кӕндзысты.

Сӕйраг фарст: «Чи у Къоста мӕ царды?»-йӕн, цымыдисаг дзуаппытӕ радтой лауреаттӕ.

Дзбойты Михал радзырдта, сабидуджы фыццаг хатт Къостайы ӕмдзӕвгӕтӕ йӕ ныййарджытӕй куы фехъуыста, уӕдӕй абоны онг дӕр поэт йӕ зӕрдӕйы кӕй цӕры.

— Къостайы ныхӕстӕй ӕз мӕхицӕн лозунгтӕ сарӕзтон ӕмӕ уыдоны рӕстдзинады бындурыл аразын мӕ цард дӕр, — загъта скульптор ӕмӕ скъолайӕн балӕвар кодта ныв «Къоста ӕмӕ Къипиани».

Цгъойты Хазби дӕр радзырдта «Ирон фӕндыр», скъоладзау ма куы уыдис, уӕд кӕрӕй-кӕронмӕ куыд базыдта.

— Къоста нын ис, ӕмӕ уымӕй мах хъӕздыг стӕм. Иннӕ адӕмтӕм дӕр ис сӕхи фысджытӕ, фӕлӕ сӕм Къостайы хуызӕттӕ нӕй. Цӕрӕнбонты тох фӕкодта мӕгуыр адӕмы бартыл, ӕмӕ йӕ йӕхи цардмӕ дӕр нӕ равдӕлд. Ӕз Къостайы преми райсын мӕхицӕн ӕнхъӕл нӕ уыдтӕн. Мӕ хӕс ӕндӕр уыд. Нӕ фыдӕлтӕй нын цы бирӕ сусӕгдзинӕдтӕ баззад мифологийы хуызы, уыдон ӕрӕмбырд кӕнын ӕмӕ сӕ хицӕн чиныгӕй рауадзын. Афтӕ мыхуыры фӕзындис «Арвы дуар», Къостайы преми цӕй фӕдыл райстон, уыцы чиныг, мифологион дзырдуат, — загъта Цгъойты Хазби.

Хазби дӕр афтидкъухӕй не ‘рбацыд. Къостайы цард ӕмӕ сфӕлдыстадыл ныффыста дыууӕ уацы. Уац «Къоста — нӕ кад, нӕ намыс» цы чиныджы мыхуыргонд ӕрцыд, уыдонӕй балӕвар кодта скъола ӕмӕ институтӕн.

Цымыдисаг уыдысты фыссӕг Цомартаты Изӕтбеджы мысинӕгтӕ дӕр. Фыссӕг цыбырӕй ӕмӕ ӕргомӕй загъта, йӕ Хуыцау, йӕ зӕд, йӕ кувӕндон Къоста кӕй у.

УФ-йы адӕмон артист Сӕбанты Тамерланы ныхас та уыдис мадӕлон ӕвзаджы рӕзтыл.

— Мад йӕ хъӕбулмӕ цы ӕвзагыл дзура, уыцы ӕвзагыл дзурдзӕн саби дӕр. Дӕ ныййарджыты ӕмӕ дӕ бинонты куы уарзай, уӕд уарздзынӕ мадӕлон ӕвзаг дӕр. Ӕз Къостайы преми райстон ӕрыгонӕй бӕхты театр «Нартӕ»-йы спектакл «Хъодыгонд зӕд»-ы цы ролы хъазыдтӕн, уый тыххӕй. Мӕнмӕ Уӕрӕсейы адӕмон артисты ном уыйбӕрц кадджын нӕ кӕсы, Къостайы премийы лауреатӕй куыд сӕрыстыр дӕн, — загъта Сӕбанты Тамерлан ӕмӕ  ма бакаст ӕмдзӕвгӕтӕ дӕр.

Кокайты Таймураз та радзырдта, кӕмдӕриддӕр гастролты вӕййынц, сӕ сӕйраг эмблемӕ вӕййы «Къоста». Поэты фарнӕй хайджын сты, ӕмӕ алы ран дӕр сӕ аивад хуыздӕрыл нымад ӕрцӕуы.

Педагогон институты проректор Анжеликӕ Вареница куыд загъта, афтӕмӕй ацы мадзал уыдис федералон проект «Классные встречи»-йы фӕлгӕты. Институты ирон ӕвзаджы кафедрӕйы сӕргълӕууӕг Дзусты Беллӕ та фӕнысан кодта, ректор Кучиты Людмилӕимӕ мадӕлон ӕвзаджы рӕзтыл алы мадзӕлттӕй дӕр кӕй архайы, уый.

Саутӕты Тамилӕ

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here