Скъоладзауты зонындзинӕдтӕн ахъазгӕнӕг

0
76

Цард размӕ куыд цӕуы, афтӕ рӕстӕгимӕ ахуырады домӕнтӕн дӕр ӕнӕ ивгӕ нӕй. Уыдонимӕ ивддзинӕдтӕ хаст цӕуы, астӕуккаг скъолайы предметтӕ кӕстӕртӕ цы чингуытӕм гӕсгӕ ахуыр кӕнынц, уыдонмӕ дӕр. Зӕгъӕм, ивгъуыд ӕнусы 90 азты Ирыстоны скъолаты 1-аг къласы ахуырдзаутӕ сӕ мадӕлон ӕвзаг цы «Абетӕ»-м гӕсгӕ ахуыр кодтой, уый  фӕстӕ фӕзындысты УФ-йы сгуыхт ахуыргӕнӕг Гусаты Еленӕ ӕмӕ  поэт Кокайты Тотрадзы   чингуытӕ.  Ирыстоны рӕзгӕ фӕлтӕрӕн   «Абетӕ»-йы  хуызы, сӕ чингуытӕ балӕвар кодтой нӕ иннӕ зындгонд поэттӕ Хъодзаты ӕхсар ӕмӕ Къадзаты Станислав. Уӕдӕ Цӕгат Ирыстоны  педагогон институты ЮНЕСКО-йы кафедрӕ дӕр бакуыста райдайӕн кълӕсты ахуырдзаутӕн «Абетӕ» рауадзыныл.

Ӕрӕджы Хуссар Ирыстоны Тыбылты Алыксандры номыл паддзахадон университеты профессор, филологон зонӕдты кандидат Битарты Зойӕ  бацӕттӕ кодта ӕмӕ мыхуыры рауагъта “Абеты” чиныг. Арӕзт у дыууӕ хайӕ. Дыууӕ чиныджы дӕр рухс федтой рауагъдад «Республикӕ»-йы.  Се ‘ддаг бакастӕй куыд аив сты, мидисӕй дӕр афтӕ рауадысты зӕрдӕмӕдзӕугӕ. Фыццаг хай арӕзт у хъуыдыйад, дзырд,  уӕнг,  цавды тыххӕй сабитӕн ӕнцонӕмбарӕн раиртӕстытимӕ ӕмӕ семӕ баст, куыд дӕнцӕгтӕ афтӕ, аивадон тексттӕ лӕвӕрд цӕуынц адӕмон сфӕлдыстадӕй, ирон фысджыты, поэтты ӕмдзӕвгӕтӕй, прозаикон уацмыстӕй.

«Абетӕ» райдайы Хуссар Ирыстоны  гимны текстӕй. (нотӕтимӕ).  Йӕ автортӕ сты зындгонд ирон композитор ӕлборты Феликс ӕмӕ  Кокайты Тотрадз.

Дарддӕр лӕвӕрд цӕуы  поэт Уырымты Петкайы ӕмдзӕвгӕ «Мурат». Йӕ хъуыды арӕзт у скъола ӕмӕ ахуырдзауы ‘хсӕн уарзонддзинад сӕвзӕрын кӕныны нысанмӕ.  Йӕ сӕйраг архайӕг у ӕвзонг, ӕнӕзивӕг лӕппу Мурат. Уый уарзы чиныг ӕмӕ скъола, аргъ кӕны йӕ ахуыргӕнӕгӕн. Тексты кӕрон ис ахуыргӕнӕджы ӕмӕ ахуырдзауы ‘хсӕн диалог, уый кӕрон ахуыргӕнӕгӕн, чиныгуарз кӕстӕр зӕгъы, йӕ Ирыстон, мадӕлон ӕвзаг кӕй уарздзӕн ӕмӕ сын аргъ кӕй кӕндзӕн, уый.

Иннӕ хай фыст у фӕллой ӕмӕ ӕнувыддзинадыл. Арӕзт у мӕлдзыг (ӕрдзы цӕрӕгойтӕй ӕппӕты кусагдӕр) ӕмӕ лӕппуйы ‘хсӕн ныхасӕй. Йӕ автор та у  поэт Айларты Чермен.

Чиныджы иннӕ тексттӕ дӕр сты фӕлгонцтӕй ӕххӕст. Архӕйдтытӕ  дзы  сты удӕгас, фыст сты ӕнцонӕмбарӕн ирон ӕвзагыл. Хӕдзары дзаумӕтты, ӕрдзы фӕзындтыты, адӕймаджы буары хӕйтты, фыдӕлты ӕгъдӕутты тыххӕй тексттӕ, базон-базонтӕ, ӕмбисӕндтӕ, ӕмдзӕвгӕтӕ, тагъддзуринӕгтӕ. Уыдонмӕ лӕвӕрд цӕуы аив нывтӕ, кӕнӕ къамтӕ, сӕ хъуыдымӕ гӕсгӕ.

Аивадон литературон ӕрмӕджытӕ ахуыргӕнӕн чиныгмӕ автор райста куыд национ литературӕйы классикон, афтӕ нырыккон фысджыты сфӕлдыстады поэзийы, прозӕйы ӕмбырдгӕндтӕй. Алы текстӕн дӕр йӕ хъуыдымӕ гӕсгӕ, ахуырдзаутӕн фарстытӕ лӕвӕрд цӕуы ӕрмӕг хуыздӕр бамбарыны тыххӕй.

Чиныг хуызджын нывтӕй срӕсугъд кодтой нывгӕнджытӕ Кочиты Н., Хъотайты С. ӕмӕ ӕлборты А.

Ацы «Абетӕ» канд   ахуыргӕнӕн чиныг нӕ уыдзӕн, фӕлӕ ма сывӕллӕттӕн стыр пайда ӕрхӕсдзӕн,  уӕгъд рӕстӕг ӕй куы  кӕсой, уӕддӕр.   Йӕ саразӕг ма нын нӕ сабитӕн ахӕм  лӕвӕрттӕ  куыд кӕна, уыцы хорзӕх ӕй уӕд!

Гасанты Валери

ОСТАВЬТЕ ОТВЕТ

Please enter your comment!
Please enter your name here