Дмитрий Медведев хорз аргъ скодта Цӕгат Ирыстоны хъӕууон хӕдзарады райрӕзты нысантӕн

0
24

Знон Мӕскуыйы йӕ куыст райдыдта ӕрвылазон ӕппӕтуӕрӕсеон агропромышленнон равдыст «Сыгъзӕрин фӕззӕг». Уыцы уӕрӕх мадзалы архайы Цӕгат Ирыстоны официалон делегаци республикӕйы Сӕргълӕууӕг Битарты Вячеславы разамындӕй.

Ӕппӕтуӕрӕсеон равдыст байгом кӕныны фӕдыл кадджын ӕмбырды архайдтой ӕмӕ раныхас кодтой бӕстӕйы премьер-министр Дмитрий Медведев ӕмӕ хъӕууон хӕдзарады министр Дмитрий Патрушев. Уыдон фӕстӕдӕр бабӕрӕг кодтой Цӕгат Ирыстоны экспозицитӕ.

Республикӕ равдыстмӕ цы продукци аласта, стӕй йӕ стендты цы инвестицион проекттӕ равӕрдта, уыдоны тыххӕй УФ-йы Хицауады разамындӕн радзырдта Цӕгат Ирыстоны Сӕргълӕууӕг Битарты Вячеслав. Республикӕйы хъӕууонхӕдзарадон товаруадзджытӕ равдыстмӕ аластой сӕ быдырты бӕркады хай. Экспозициты кадджын бынӕттӕ бацахстой, агропромышленнон комплексы къабазы республикӕ цы цымыдисаг инвестицион проекттӕ (дыргъты куыстадимӕ, кӕсагдарынадимӕ, хорӕрзадимӕ, суӕрттӕ ӕмӕ адджын дӕтты рауагъдимӕ баст) бацӕттӕ кодта, уыдон дӕр.

Фысымтӕ Дмитрий Медведевӕн бӕстон радзырдтой, ныридӕгӕн цы программӕтыл куыст цӕуы, стӕй хӕстӕгдӕр рӕстӕг цавӕр проекттӕм бавналдзысты, уыдӕтты тыххӕй.

Уф-йы премьер-министр хорз аргъ скодта республикӕйы хъӕууон хӕдзарады къабазы райрӕзты нысантӕн. Дмитрий Медведев сӕрмагонд ӕргом аздӕхта мыггаджы картофы куыстад рапарахат кӕныны программӕтӕм. Специалисттӕ куыд фӕнысан кодтой, афтӕмӕй Цӕгат Ирыстоны хӕххон районты хорз фадӕттӕ ис экологон ӕгъдауӕй сыгъдӕг продукци исынӕн.

Кӕсагдарынады къабаз фӕхъомысджындӕр кӕныны нысанимӕ дӕр республикӕ кусы цалдӕр ахсджиаг проектыл. Проекттӕ царды куыд уагъд цӕуынц, стӕй сын федералон центры ‘рдыгӕй цы ӕххуыс хъӕуы, ууыл дӕр ӕрныхас кодтой Дмитрий Медведев ӕмӕ Битарты Вячеслав.

— Фӕстаг азты бӕстӕйы агропромышленнон комплекс хъомысджындӕр кӕны, хъӕууонхӕдзарадон товаруадзджытӕ уӕрӕхдӕр пайда кӕнынц нырыккон технологитӕй. Уыцы ӕвӕрццӕг ногдзинӕдты бындурыл рацарӕзт цӕуы Цӕгат Ирыстоны агропромышленнон комплекс дӕр. ӕмӕ рӕстӕг куыд ӕвдисы, афтӕмӕй азӕй-азмӕ рӕзы хӕрзхъӕд ӕмӕ экологон ӕгъдауӕй сыгъдӕг продукцийы рауагъд. Уыимӕ, цӕгатирыстойнаг хъӕууонхӕдзарадон продукци ерысхъом у, — йӕ раныхасы фӕнысан кодта Битарты Вячеслав.

Уыцы бон ӕппӕтуӕрӕсеон равдыст чи бабӕрӕг кодта, уыцы адӕм сӕхи цӕстӕй федтой, куыд хъӕздыг уыд Цӕгат Ирыстоны экспозици, уый. Равӕрдтой дзы халсартӕ ӕмӕ дыргътӕ, дзидза ӕмӕ ӕхсыры продукци, адджинӕгтӕ, ирон чъиритӕ, мыд, ӕхсӕртӕ, зокъотӕ, суӕрттӕ ӕмӕ адджын дӕттӕ, сӕлдӕг ӕмӕ зайӕгойты мыггӕгтӕ… Республикӕйы инвестицион проектты уагӕвӕрдтимӕ базонгӕ уӕвын кӕй фӕндыд, уыцы адӕмӕн дӕр стендты ӕрӕвӕрдтой цӕстуынгӕ ӕрмӕджытӕ, уымӕй уӕлдай, республикӕйы минӕвӕрттӕ ӕмӕ проекттыл бӕрнон иннӕ специалисттӕ цӕттӕ уыдысты ӕппӕт фарстытӕн дӕр дзуаппытӕ раттынмӕ.

Куыд нысангонд цӕуы, афтӕмӕй Цӕгат Ирыстоны делегацийы уӕнгтӕн уыдзӕн хъуыддаджы фембӕлдтытӕ министрадтӕ ӕмӕ ведомствӕты бӕрнон кусджытимӕ, агропромышленнон къабазы кусӕг компаниты минӕвӕрттимӕ. Республикӕйы Сӕргълӕууӕгӕй уӕлдай делегацийы сты РЦИ-Аланийы Хицауады Сӕрдары хӕдивӕг — УФ-йы Президенты цур РЦИ-Аланийы ӕххӕстбарджын минӕвар Дзанайты Барис, хъӕууон хӕдзарад ӕмӕ хойраджы министр Уазиты Хъазыбег, хъӕууонхӕдзарадон ӕмӕ хомаггуыстгӕнӕг компаниты разамонджытӕ, зӕхкусӕг-фермерон хӕдзарӕдты хицӕуттӕ, наукӕйы къабазы минӕвӕрттӕ.

ӕппӕтуӕрӕсеон агропромышленнон равдыст арӕзт цӕуы ӕрвылаз УФ-йы Хъӕууон хӕдзарад ӕмӕ хомаггуыстгӕнӕг промышленносты кусджыты боны агъоммӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here