Райгуырӕн бӕстӕмӕ уарзондзинад

0
14

Зындгонд ахуыргонд, филологон зонӕдты кандидат Плиты Гацыры Хуссар ӕмӕ Цӕгат Ирыстоны  хорз зонынц. 50 азы бӕрц кусы Хуссар Ирыстоны паддзахадон университеты, студентты зонгӕ кӕны ирон литературӕйы классиктимӕ ӕмӕ се сфӕлдыстадимӕ. Кӕсы лекцитӕ ирон литературӕйы историйӕ, ирон адӕмон дзыхӕйдзургӕ сфӕлдыстадӕй, литературӕйы зонынадмӕ бацӕуынӕй, аив кӕсын ӕмӕ аив дзурынӕй.

Плийы-фырт бирӕ бӕрнон бынӕтты фӕкуыста, ӕмӕ алы ран дӕр йӕ  куысты фӕд бӕрӕгӕй зыны. Стыр у йӕ кад студентты ӕмӕ, цы коллективы ‘хсӕн кусы, уыдоны цӕсты дӕр.

Плиты Гацыр фӕндзай азы дӕргъы кӕны куыд ахуырадон-хъомыладон, афтӕ сфӕлдыстадон куыст дӕр. Ныффыста 150 зонадон куыстӕй фылдӕр. Мыхуыры йын рацыдысты журналтӕ «Фидиуӕг» ӕмӕ «Мах дуджы», газеттӕ «Хурзӕрин», «Южная Осетия», «Рӕстдзинад», «Стыр ныхас», университеты зонадон уацты ӕмбырдгӕндты.

Ӕрӕджы Плиты Гацырӕн мыхуыры рацыди ног чиныг «Плитӕ ӕмӕ Рукъгом». Чиныджы автор фыссы Плиты мыггаджы тыххӕй, цы зындгонд ӕмӕ сӕм хъайтар адӕм уыдис, сӕ Райгуырӕн бӕстӕмӕ уарзондзинады тыххӕй.

Мӕнӕ куыд зӕгъы йӕ чиныджы райдайӕны райгуырӕн бӕстӕйы тыххӕй: » Райгуырӕн бӕстӕ адджын у. Уый алы адӕммӕ дӕр ӕмбисондӕн баззад. Лӕг кӕм райгуыры, йӕ сабибонтӕ кӕм арвиты, абетӕ кӕсын ӕмӕ фыссын кӕм базоны, фыййауы лӕдзӕгимӕ, стыр урс фосы дзугтимӕ, стӕй уӕд фыццаг хатт схъӕлфындз цӕвӕгимӕ кӕм базонгӕ вӕййы, уыцы бынатӕн рохгӕнӕн нӕй, уыцы бынат адджын у кӕддӕриддӕр адӕймагӕн».

Цас фӕлмӕн рӕвдауӕн ныхӕстӕ ссардта автор йӕ райгуырӕн бӕстӕйӕн. Уый хъӕбулы уарзтӕй уарзы Ирыстон ӕмӕ йӕ нӕ дих кӕны Хуссар ӕмӕ Цӕгатыл: «Рӕсугъд сты хӕхтӕ Цӕгаты ‘рдыгӕй дӕр ӕмӕ Хуссары ‘рдыгӕй дӕр. Рӕсугъддзинӕдтимӕ ӕвдадзы хос сты йӕ ӕрдз, йӕ уӕлдӕф, йӕ дӕттӕ.»

Чиныг йӕ мидисмӕ гӕсгӕ рауад тынг цымыдисаг. Ис дзы авторӕн йӕ уарзон Рукъгомимӕ баст уацмыстӕ: радзырдтӕ, таурӕгътӕ, новеллӕтӕ, топонимтӕ.

Радзырд «Рукъгом» ӕвдисы, ирон адӕм хӕххон уавӕрты куыд ӕвадат цард кодтой, уый. «…Цӕрыны охыл ам фыццаг чи ӕмӕ цы мыггӕгтӕ фӕзындысты, уыдон ничиуал хъуыды кӕны, фӕлӕ дзы уӕддӕр рагондӕр цӕрджытыл нымад цӕуынц  Плитӕ»

«Цӕрыны охыл», — ома, цардӕнхъӕлӕй… Фӕлӕ цӕй цард уыдис ахӕм ран? Зӕхх — кадавар кӕй  уыд, уымӕ гӕсгӕ адӕм хохы фӕхстыл сӕхицӕн зӕххы гӕппӕлтӕ агуырдтой, фӕлӕ сын-иу фылдӕр хатт къӕвдайы дӕттӕ сӕ фӕллой аластой… Зымӕг зӕйтӕй тӕрсгӕйӕ, уалдзӕг — донивылдтытӕй, афтӕмӕй фыдӕбӕттӕ кодтой.

Абон хӕхбӕсты бирӕ цӕрӕг нал ис, куыд Хуссары, афтӕ Цӕгат Иры дӕр. Цардӕн фадӕттӕ хъӕуы, фадӕттӕ кӕй нӕ уыд хӕххон адӕмӕн, уый сын фыдӕлты уӕзӕгыл сӕ къух сисын кодта. ӕмӕ бирӕтӕ хуыздӕр цардагур ралыгъдысты быдырмӕ.

Фӕлӕ кӕд цыфӕнды уӕззау цард кодтой хӕхбӕсты, уӕддӕр автор мысы йӕ райгуырӕн хъӕубӕстӕ, кӕм бахъомыл, йӕ лӕдзӕгимӕ фосы фӕдыл кӕм уади, фыццаг хатт уарзты цин кӕм банкъардта,  зӕрдӕйӕн зынаргъ ӕмӕ адджын, ӕмбал кӕмӕн нӕй, уый.

Фыдыбӕстӕйы Стыр хӕст ӕмӕ Рукъгом. Зын сахат фӕдисы хабарӕй Иры фӕсивӕд сӕхи никуы бафӕсвӕд кодтой. Нӕ фыдӕлтӕ куыд дзырдтой: «Худинаджы бӕсты мӕлӕт —  хуыздӕр!». Ирыстоны сагсур фӕсивӕд араст сты тугкалӕн хӕстмӕ. Уыдоны ‘хсӕн уыдысты Плиты мыггаджы сахъгуырдтӕ дӕр. Фашистон лӕгмарты дӕрӕнгӕнгӕ суанг Берлинмӕ ныххӕццӕ Ирыстоны цӕхӕрцӕст стъалы  Плиты Грис. Уый фӕстӕдӕр фыста:

Ӕлгъыстӕй зындоны дзыназа,

Цы лӕг ӕрымысыд хӕст!

Ирыстон кӕд армыдзаг йеддӕмӕ нӕу, уӕддӕр хӕсты быдырмӕ арвыста 98 мин адӕймагӕй фылдӕр. Уыдонӕй 58 мин хӕстоны ӕнустӕм баззадысты тохы быдыры…

«Ирыстоны Плиты Иссӕйы ном чи нӕ зоны, ахӕм нӕ разындзӕн. Плиты Иссӕ райгуырдис Цӕгат Ирыстоны, Зӕронд Бӕтӕхъойыхъӕуы мӕгуыр ирон бинонты ‘хсӕн. 1922 азы йӕхи фӕндӕй бацыд Сырх ӕфсадмӕ. Схъомыл ӕй кодта Советон хицауад, ӕмӕ  сырхӕфсӕддонӕй схызти ӕфсады инӕлары онг», — фыссы Плиты Гацыр.

Фыдыбӕстӕйы Стыр хӕстӕн йӕ райдайӕнӕй йӕ фӕстаг бонмӕ Плиты Иссӕ уыдис архайӕг ӕфсады. Командӕ кодта бӕхджын ӕфсӕддон дивизийӕн ӕмӕ корпусӕн. Коммунистон парти ӕмӕ Советон хицауад ӕфсады инӕлар Плиты Иссӕйӕн скодтой стыр аргъ. Уый уыдис Советон Цӕдисы дыууӕ хатты Хъӕбатыр, хорзӕхджын ӕрцыд Ленины ӕхсӕз орденӕй, Октябры революцийы орденӕй, Сырх Тырысайы ӕртӕ орденӕй, Суворовы 1-аг къӕпхӕны дыууӕ орденӕй, Кутузовы 1-аг къӕпхӕны орденӕй ӕмӕ бирӕ ӕндӕр хӕрзиуджытӕй.

Чысыл ӕвӕрӕн нӕ бахаста Плиты мыггаг ирон аивадон литературӕ ӕмӕ аивадмӕ дӕр. Ирыстоны чиныгуарзджытӕн зындгонд сты  фысджытӕ Плиты Харитон, Плиты Грис, Плиты Илья, Плиты Феликс, Плиты Олег ӕмӕ иннӕтӕ. Уӕдӕ зонадон кусджытӕ дӕр къаддӕр не сты: Плиты Баграт, Плиты Филим, Плиты Хъазыбег, Плиты Арон, Плиты Алан, Плиты Муссӕ ӕмӕ ма бирӕтӕ. Лӕвӕрд цӕуынц сӕ къамтӕ дӕр.

Чиныгӕн ис стыр патриотон-хъомыладон ахадындзинад. Хъуамӕ рӕзгӕ фӕлтӕр зоной, ирон адӕмӕн ном чи скодта, уыцы хъайтарты, нӕ адӕмы истори, не ‘гъдӕуттӕ, уарзой Райгуырӕн бӕстӕ.

Гацыры лӕггӕдтӕн стыр аргъ скодта Республикӕ Хуссар Ирыстоны хицауад. 1998 азы йын радта Республикӕ Хуссар Ирыстоны зонады сгуыхт архайӕджы кадджын ном, Республикӕйы 10 азы бӕрӕгбоны  — кадджын майдан, 2004 азы — кадджын ном «Фӕллойы ветеран», хорзӕхгонд ӕрцыд «Хӕлардзинады орден”-ӕй ӕмӕ майдан «Ирыстоны намыс»-ӕй.

Плиты Гацыр ныртӕккӕ у Хуссар Ирыстоны паддзахадон университеты ирон литературӕйы историйы кафедрӕйы сӕргълӕууӕг.

Гӕбуаты Галинӕ

ОСТАВЬТЕ ОТВЕТ

Please enter your comment!
Please enter your name here