Цӕгат Ирыстоны бон — Уӕрӕсейы Сывӕллӕтты паддзахадон библиотекӕйы

0
34

Мӕскуыйы, Уӕрӕсейы Сывӕллӕтты паддзахадон библиотекӕйы уыд Республикӕ Цӕгат Ирыстон-Аланийы бон. Уыцы мадзал арӕзт ӕрцыд федералон рухстауӕн проект «Байрай, мӕ сыхаг!»-ы фӕлгӕты.

Республикӕйы боны мадзӕлттӕм библиотекӕмӕ цы бирӕ адӕм ӕрбамбырд, уыдонӕн зӕрдиаг салам загътой Цӕгат Ирыстоны минӕвӕрттӕ.

УФ-йы Президенты цур РЦИ-Аланийы ӕххӕстбарджын минӕвар — РЦИ-Аланийы Хицауады Сӕрдары хӕдивӕг Дзанайты Барисы номӕй фембӕлды архайджытӕн арфӕ ракодта Цӕгат Ирыстоны Фӕсивӕдон мӕскуыйаг минӕварады сӕрдар Фӕрниаты Сослан.

«Мӕскуыйы цӕрджытӕ ӕмӕ горӕты уазджытӕ Цӕгат Ирыстоны боны мадзӕлттӕм кӕй саккаг кодтой, уый тыххӕй сӕ бузныг стӕм. Уӕлдай арфӕйы аккаг сты, ацы рухстауӕн-культурон проект чи ӕххӕст кӕны ӕмӕ ацы алӕмӕты бынатмӕ мах чи фӕхуыдта, Уӕрӕсейы Сывӕллӕтты паддзахадон библиотекӕйы уыцы кусджытӕ. Абон сымахӕн фадат ис бӕстондӕр базонгӕ уӕвынӕн Цӕгат Ирыстонимӕ, йӕ культурӕ ӕмӕ аивадимӕ, ӕмӕ нӕ фембӕлд зӕрдӕмӕдзӕугӕ кӕй уыдзӕн, ууыл дызӕрдыг нӕ кӕнын», — фӕнысан кодта Фӕрниаты Сослан.

Республикӕйы минӕвӕрттӕ библиотекӕйӕн балӕвар кодтой Хетӕгкаты Къостайы «Ирон фӕндыр», ирон традициты тыххӕй чингуытӕ ӕмӕ сывӕллӕттӕн ӕмдзӕвгӕты ӕмбыргӕндтӕ.

Уый фӕстӕ фембӕлды архайджытӕ бакастысты цымыдисаг культурон-рухстауӕн программӕмӕ. Цӕгат Ирыстоны ӕрдзы рӕсугъддзинӕдтӕ ӕмӕ историйы хабӕртты тыххӕй федтой аив киноныв. Бӕрӕгбоны литературон хай та сӕхимӕ райстой мӕскуыйаг уӕлдӕр ахуыргӕнӕндӕтты ирон студенттӕ. Уыдон ӕмбырды архайджыты базонгӕ кодтой Нарты кадджытӕ ӕмӕ ирон аргъӕутты хъайтартимӕ, бакастысты сын ирон поэтты ӕмдзӕвгӕтӕ.

Ирыстоны боны концертон хайы сӕйраг архайӕг та уыдысты адӕмон кӕфтыты ансамбл «ӕрхон»-ы (йӕ аивадон разамонӕг — Цӕгат ӕмӕ Хуссар Ирыстоны сгуыхт артист Цопанаты Алан) уӕнгтӕ. «Хонгӕ», «Хӕххон» ӕмӕ иннӕ кӕфтытыл залы бадӕг адӕм къухӕмдзӕгъдимӕ сӕмбӕлдысты…

Фӕстӕдӕр та фембӕлды архайджытӕ саходыдтой ирон чъиритӕй — уыдон бӕрӕгбонмӕ тӕвдӕй ӕрбахӕццӕ кодтой мӕскуыйаг дзулфыцӕн «Асса»-йы (йӕ генералон директор — Хуыгаты Алан) минӕвӕрттӕ.

Фысымтӕ ӕмӕ уазджытӕ фембӕлдӕй разыйӕ баззадысты.

УФ-йы Президенты цур РЦИ-Аланийы Иудадзыгон минӕварады пресс-службӕ

ОСТАВЬТЕ ОТВЕТ

Please enter your comment!
Please enter your name here