“Дун-дуне — Фыдыбӕстӕ мӕнӕн”

0
259

Алы адӕмтӕ дӕр ӕхсызгонӕн ӕмӕ сӕрыстырӕй фӕзӕгъынц, дзыллӕты цӕсты сӕ кадджын чи скодта, сӕ национ сӕрыстырдзинад, уалдзыгон дидинӕгау, кӕй фӕрцы райхӕлд, сӕ уыцы ахсджиаг хъӕбулты  нӕмттӕ.

Мах, ирӕттӕ та, фӕзӕгъӕм — Къоста, ӕмӕ нын уыцы ном нӕ зӕрдӕтӕ байдзаг кӕны ӕгӕрон сӕрыстырдзинад ӕмӕ хъӕбулы уарзондзинадӕй.

Абайты Васо

 

Нӕхи Къоста

Стыр лӕджы ном хӕссын стыр, уӕззау уаргъ хӕссынӕй уӕлдай нӕу, стыр бӕрнондзинад домы, уӕлдайдӕр нӕ номхӕссӕн, нӕ сомыгӕнӕн Къостайы ном. Цӕгат Ирыстоны паддзахадон университет Хетӕгкаты Къостайы ном кӕдӕй хӕссы, уӕдӕй фӕстӕмӕ йӕ хорз хъуыддӕгтӕй ӕвдисы, Къостайы ном хӕссыны аккаг кӕй у, уый. ӕмӕ канд алы дӕсныйӕдтӕн ахуыргонд специалисттӕ цӕттӕ ӕмӕ хъомыл кӕныны хъуыддаджы нӕ, фӕлӕ Къостайы цард ӕмӕ сфӕлдыстад зоной, йӕ ныстуантӕ сын сӕ дарддӕры царды ахъаз уой, ууыл иууылдӕр кӕй архайынц, уымӕй. Уымӕ гӕсгӕ университеты ахуыргӕнджытӕ ӕмӕ студенттӕн генион поэтӕй сӕ бон зӕгъын у, нӕхи Къоста, зӕгъгӕ.

Ӕмӕ та ныр дӕр сӕхи Къостайы райгуырды 160 азы юбилейы размӕ йӕ номыл кӕд, кӕм ӕмӕ цы сарӕзтой, йӕ абоны юбилеймӕ цӕимӕ цӕуынц, уый тыххӕй ныхас кӕны Хетӕгкаты Къостайы номыл ЦИПУ-йы ректор Огъуаты Алан:

— Ирон адӕмы намысджын фырт Хетӕгкаты Леуаны фырт Къоста ныффӕдзӕхста йӕ фӕстагӕттӕн аразын “иумӕйаг аргъуан, рухсады, сӕрибардзинады ӕмӕ уарзондзинады аргъуан». Сӕдӕ азы размӕ, 1920 азы 21 августы, Дзӕуджыхъӕуы гомгонд ӕрцыд Терчы адӕмон ахуырады институт (абон ЦИПУ) — Кавказы фыццаг, бӕстӕйы та — фыццӕгтӕй иу уӕлдӕр педагогон ахуыргӕнӕндон. Уый уыдис, стыр нысаниуӕг кӕмӕн уыд, ахӕм цау — адӕмы бирӕ фӕлтӕрты хуыздӕр минӕвӕртты бӕллиц сӕххӕст.

1939 азы Цӕгат Ирыстоны паддзахадон педагогон институтӕн (абон — ЦИПУ) лӕвӕрд ӕрцыд ирон литературӕйы бындурӕвӕрӕг Хетӕгкаты Къостайы ном. Республикӕ бӕрӕг кодта поэты райгуырды 80 азы юбилей. Ныр, 2019 азы, Ирыстон бӕрӕг кӕндзӕн дыууӕ юбилейы — Къостайы райгуырдыл ӕххӕст кӕны 160 азы, университет та йӕ ном хӕссы 80 азы.

Университет бирӕ мадзӕлттӕ бацӕттӕ кодта ацы бӕрӕгбонмӕ. Ахуыргӕнӕндоны арӕзт ӕрцыд бӕрӕгбӕттӕм цӕттӕ кӕныны кусӕг къорд. ЦИПУ-йы президент Мӕхӕмӕтты Ахуырбег сси кусӕг къорды разамонӕг. ЦИПУ-йы конференц-залы уыд ӕппӕтуӕрӕсеон наукон-практикон конференци дунеон архайдимӕ — «Хетӕгкаты Къоста Уӕрӕсейы культурӕйы контексты». Форумы архайджытӕ уыдысты сӕдӕ ахуыргондӕй фылдӕр: Уӕрӕсейӕ, Хуссар Ирыстонӕй ӕмӕ Абхазӕй. Уыдон уыдысты ӕвзагзонынады, литературӕзонынады, историйы, этнологийы, журналистикӕйы, фольклористикӕйы, педагогикӕ ӕмӕ аивадзонынады къабӕзты специалисттӕ.

Къостайы цард ӕмӕ сфӕлдыстады тыххӕй пленарон ӕмбырды докладтӕ скодтой ЦИПУ-йы президент, историон наукӕты доктор Мӕхӕмӕтты Ахуырбег ӕмӕ И. Канты номыл Балтийаг федералон университеты профессор Тахъазты Валери.

Конференцийы куыст уыдис хицӕн секцитӕм гӕсгӕ: “Хетӕгкаты Къоста ӕмӕ нырыккон литературон процесс”; “Хетӕгкаты Къостайы бынтӕ ӕмӕ Уӕрӕсейы адӕмты историон рӕзты проблемӕтӕ”; “Национ ӕвзӕгтӕ бахъахъхъӕныны, рӕзты ӕмӕ ахуыр кӕныны проблемӕтӕ”; “Къоста ирон журналистикӕйы райдайӕны”; “Фольклор, куыд социоисторион ӕцӕгдзинад ӕмӕ йӕ ахуыр кӕныны проблемӕтӕ”.

Конференцийы фӕлгӕты РЦИ-Аланийы Национ музей бацӕттӕ кодта музейон-архивон ӕрмӕджыты экспозици «Ӕппӕт дуне — мӕ аргъуан». Университеты конференцийы архайджытӕн сӕ бон уыд ЦИПУ-йы ӕмӕ Пединституты иронзонынады ахуыргӕндты наукон куыстыты музеймӕ бацӕуын, стӕй ЦИПУ-йы аивӕдты факультеты студентты ӕмӕ ахуыргӕнджыты куыстыты равдыст фенын. Конференцийы архайджытӕ федтой Къостайы номимӕ баст Дзӕуджыхъӕуы зӕрдылдарӕн бынӕттӕ.

Уалдзӕджы ЦИПУ-йы студенттӕ бабӕрӕг кодтой Цӕгат Кавказы Къостайы номимӕ баст зӕрдылдарӕн бынӕттӕ. Экспозици хуындис «Хетӕгкаты Къоста — хӕлардзинады ӕмӕ ӕфсымӕрдзинады рыцарь».  Журналистикӕйы, аивӕдты, историон, ирон ӕмӕ уырыссаг филологийы факультетты студенттӕ уыдысты Кисловодскы, Пятигорскы, Хъӕрӕсе-Черкесты, Лабӕйы. Балцы райдиан — нывгӕнӕг Николай Ярошенкойы музей-хӕдзар. Уымӕн Къостаимӕ уыдис хӕлар ахастдзинӕдтӕ. Музейы кусджытӕ цӕсты гагуыйау хъахъхъӕнынц Къостайы цард ӕмӕ сфӕлдыстадимӕ баст экспонаттӕ, алы аз дӕр, 15 октябры, аразынц номарӕн мадзӕлттӕ. Студенттӕ Къостайы уацмыстӕм гӕсгӕ бацӕттӕ кодтой тематикон концертон программӕ…

Дарддӕр экспозицийы архайджытӕ Пятигорскы фембӕлдысты национ-культурон автономи «Ирыстон»-ы уӕнгтимӕ. Дидинджытӕ сӕвӕрдтой Къостайы цыртдзӕвӕныл. Уый йын 2009 азы балӕвар кодта Республикӕ Цӕгат Ирыстон-Алани ӕмӕ ӕвӕрд ӕрцыд горӕты центрон уынджы. Дидинджытӕ сӕвӕрдтой Михаил Лермонтовы цыртдзӕвӕныл дӕр. Уый 1889 азы куы гом кодтой, уӕд дзы Къоста бакаст йӕ номыл фыст ӕмдзӕвгӕ «Торжествуй, дорогая Отчизна моя…»

Экспедицийы рӕстӕджы Къостайы цард ӕмӕ сфӕлдыстады тыххӕй студенттӕ цы ӕрмӕджытӕ, къамтӕ, видеоӕрмӕджытӕ ӕрӕмбырд кодтой, уыдон уыдысты се студентон куыстыты бындур: радзырдтӕ, эссе, репортажтӕ, къамты равдыстытӕ.

ЦИПУ-йы историон факультет бацӕттӕ кодта цымыдисаг квест — “Къоста 160”. Йӕ архайджытӕй суӕвын сӕ бон уыд Цӕгат Ирыстоны ӕппӕт уӕлдӕр ахуыргӕнӕндӕтты студенттӕн ӕмӕ аспиранттӕн, фидӕны историктӕй фӕстӕмӕ. Цӕмӕй квест ацӕуай, уый тыххӕй зӕрдыл ӕрлӕууын кӕнын хъуыд стыр поэты цардимӕ баст цӕвиттонтӕ, йӕ уацмыстӕ. Ам архайджытӕм ӕнхъӕлмӕ кастысты поэты хъысмӕтимӕ баст сӕйраг адӕймӕгтӕ — Цӕлыккаты Алыксандр, ӕмбалты Цоцко, Аннӕ Попова, Цӕлыккаты Аннӕ ӕмӕ ӕндӕртӕ.

Квесты хӕслӕвӕрдтӕ уыдысты алыхуызон. Зӕгъӕм, архайджытӕ хъуамӕ базонгӕ уыдаиккой Къостайы уацимӕ ӕмӕ баххуыс кодтаиккой поэтӕн сылгоймӕгты гимназ бахъахъхъӕнынӕн ахъазын тыччытӕй, Къостайы уацмыстӕ кастысты фӕсарӕйнаг ӕвзагыл. Архайджытӕ та, сӕхи ‘рдыгӕй хъуамӕ ӕмдзӕвгӕтӕ базыдтаиккой. Алы командӕйы дӕр уыд авд адӕймаджы, ӕмӕ уыдон — сӕ университеты иугонд командӕ. Квесты уӕлахиздзаутӕ хорзӕхджын ӕрцыдысты Кады гӕххӕттытӕ ӕмӕ сӕрмагонд призтӕй.

ЦИПУ-йы президент Мӕхӕмӕтты Ахуырбег байгом кодта акци — эстафетӕ «Мӕ уарзон рӕнхъытӕ Къостайӕ». Уый эстафетӕ радта журналистикӕйы факультеты декан Хӕбӕлаты Фатимӕмӕ. Уый бакастис ӕмдзӕвгӕ «Тӕхуды». Акцийы архайджытӕ ма систы ахуыргӕнӕндоны фестивал «Студентты уалдзӕг-             2019»-мӕ кӕсджытӕ.

15 октябры, Къостайы райгуырӕн бон, нӕ зӕрды ис студенттимӕ Нармӕ ацӕуын. 22 октябры равдисдзыстӕм гала-концерт «Мӕхи Къоста».

Ӕрмӕг бацӕттӕ кодта Абайты Эдуард

ОСТАВЬТЕ ОТВЕТ

Please enter your comment!
Please enter your name here