«Ирон фӕндыр» — французаг ӕвзагыл

0
91

Хетӕгкаты Къостайы «Ирон фӕндыр» у Аланыстоны поэтты монон рагфыдыбӕстӕ. Цал ӕмӕ цал стихамайӕджы сырӕзт йӕ алӕмӕтон зӕлтӕм хъусгӕйӕ! Цас курдиатджын адӕм слӕууыдысты уый фӕрцы национ литературӕйы тырысайы бынмӕ! Къостайы аивзӕл фӕндыры хӕрзаудӕн ӕндӕвдад сӕ хуыдта, историон ахаст кӕмӕн уыдис, ахӕм аивадон архайдмӕ. Гъе уымӕ гӕсгӕ «Ирон фӕндыр» нымад цӕуы Зӕххы къорийы цытджындӕр чингуытӕй иуыл. Къостайы фӕрцы йӕ дуджы ӕвӕрд ӕрцыд ХIХ ӕнусы ирон классикон литературӕйы бындур. Ам цы хъуыдытӕ ӕмӕ поэзийы хуызтӕ сӕвзӕрдысты, уыдон сӕрӕвӕрӕн систы ӕнӕхъӕн ссӕдзӕм ӕнусы дзырдаивадӕн дӕр.

Хетӕджы-фырты ныхасыздӕхтон уагӕвӕрд ссис ирон литературон ӕвзаджы суадон, ӕмӕ, цы бӕркадджын ӕвзартӕ суагъта йӕ сатӕгӕй, уыдон абон дӕр сты фӕзминаг. Уыцы бӕрнон ӕмӕ ахсджиаг куыст ӕххӕстгонд цыдис тынг зын уавӕрты, ӕмӕ дзы уымӕ гӕсгӕ ӕмзӕрдӕйӕ, ӕмзондӕй, ӕмуӕхскӕй архайдтой нӕ адӕмы царддӕттӕг тыхтӕ ӕгасӕй дӕр. Ӕмбисондӕн баззадысты Гӕдиаты Секъа, Коцойты Арсен, Къубалты Алыксандр, Хъайтмазты Аслӕмырзӕ, Гуырдзыбеты Блашка, Байаты Гаппо, ӕмбалты Цоцко, Цӕлыккаты Ахмӕт, Брытъиаты Елбыздыхъо, Гӕдиаты Цомахъ ӕмӕ иннӕты рухс нӕмттӕ.

Уыцы фӕлварӕн дуджы сфӕлдыстадон интеллигенцийы монон фӕтӕгыл нымад цыдис Хетӕгкаты Къоста. ӕмӕ уым диссагӕй ницы уыд. Поэт ӕмӕ йӕ аивадон фӕлтӕры тӕваг се ‘мдугонтыл уыдис ӕнӕкӕрон. Канд нӕхи адӕм нӕ, фӕлӕ ӕгас Цӕгат Кавказы цӕрджытӕ дӕр сӕ ныфсытӕ бастой Къостаимӕ. Автор, йӕ «Ирон фӕндыр»-ы рацыды фӕстӕ хасты уӕвгӕйӕ, алы адӕмты минӕвӕрттӕй иста бирӕ фыстӕджытӕ. Йӕ хъуыдыты сыгъдӕгдзинад, хи нывондӕн хӕссынмӕ йӕ диссаджы цӕттӕдзинад, ӕппынфӕстаг, ӕнӕфӕцудгӕ ӕууӕнк сӕрибар, ӕмбарад ӕмӕ ӕфсымӕрады идеалтыл — фидарӕй баиу кодта ирон фысджыты ӕгасӕй дӕр, кӕд сӕ тохы мадзӕлттӕ кӕрӕдзийӕ хицӕн кодтой, уӕддӕр. Йе ‘мдугонтӕй иу — Хъаныхъуаты Инал — уый тыххӕй уырнинагӕй фыста: «Фыссӕг басудзы йӕхи: хъарм бахъахъхъӕнӕн нӕй, искӕмӕн ӕй куы дӕттай, уӕд». Къостайы монон фӕдонты миддунейы рӕзгӕ-ивгӕ цард иу арӕны лӕууыдис уӕды историон уавӕрты ныхмӕвӕрдимӕ. Сӕрибар бӕллицты уӕлтӕмӕнадӕй — историон цардарӕзтмӕ — ахӕм уыд, Хетӕджы-фырты алыварс чи лӕууыдис, уыдоны ӕхсӕнадон сагъӕсты идеологион ӕмӕ психологион уагӕвӕрд.

Къостайы дуджы ирон поэзимӕ ӕрбацыдис хизонынад ӕмӕ национ химбарынады вазыгджын хъуыдытӕ. Уый адыл нӕ дзырдаивады хъӕлӕс райхъуыстис ӕххӕст ӕмӕ бирӕвӕрсыгӕй. ӕмӕ уыцы бирӕхуызад ӕмӕ ӕххӕстад систы адӕмы хӕрзаив зарӕг. Цытджын поэты фӕдонтӕ аивадон ӕнтысты фӕрцы райстой стыр ахадындзинад. Уыдон бахостой бирӕ фӕлтӕрты зӕрдӕтӕ ӕмӕ сӕ схорзӕхджын кодтой зонды рухс, зӕрдӕйы хъарм ӕмӕ уды рӕсугъддзинадӕй. Къостайы дугӕн ирон литературӕйы уыдис йӕхи ӕнӕбаивгӕ комулӕфты хӕрздзӕф. Ӕмӕ уый, уыцы комулӕфт, зынгӕ сбӕлвырд кодта поэты архайды дарддӕры фӕндаг. Хъуыддаг уый мидӕг уыдис, ӕмӕ Хетӕджы-фырты размӕцыд национ дзырдаивады райхъал кодта социалон прогрессы иумӕйаг ӕууӕлтӕ. Уырдыгӕй та скӕнӕн ис ахӕм хатдзӕг: «Ирон фӕндыр» — уый хуымӕтӕджы чиныг нӕу, фӕлӕ цытджын гуманисты, фидӕны ивддзинӕдты фидиуӕджы зӕрдиаг зарджыты алдымбыд. Уыдоны мидӕг бацыд поэты цард, удыхъӕд ӕмӕ уарзт йӕ иузӕрдион адӕммӕ. Уымӕ гӕсгӕ дзы мах уынӕм «Ирон ӕхсӕндзарды энциклопеди». Йе сфӕлдисӕг нӕ разы ӕрлӕууы ӕрмӕст поэтӕй нӕ, фӕлӕ дзыллӕйы национ химбарынады бындурӕвӕрӕгӕй.

Куыд бафтыди йӕ къухы ахӕм алӕмӕтаг хъуыддаг сфӕлдисын? Ацы фарстӕн дзуапп ссарыныл ирон ахуыргӕндты иу ӕмӕ дыууӕ фӕлтӕры нӕ архайдтой. Сӕ удвӕллой куысты фӕрцы бӕрӕггонд ӕрцыдысты вазыгджын ӕууӕлтӕ ӕмӕ миниуджытӕ. Фӕлӕ, Джусойты Нафи куыд загъта, афтӕмӕй дзы нырма дзуаппытӕй фарстытӕ фылдӕр сты. ӕмӕ уымӕн бамбарӕн ис, уымӕн ӕмӕ ныхас цӕуы, Къостайы ном ӕрдзон хуызы кӕдӕм бацыд, уыцы ирон адӕмы монон рӕзты ирддӕр сыфтӕй иуыл. Уымӕ гӕсгӕ иу кӕнӕ иннӕ ӕмбарынадӕй аразгӕ уыдзӕн, поэты сфӕлдыстадимӕ баст зонадон-иртасӕн ӕмӕ литературон-критикон фарстытӕ алыг кӕнын чи сфӕнд кӕна, уымӕн йӕ хъуыддаг. Уымӕй бацамонӕн ис, ирон литературӕйы размӕцыдмӕ фӕстаг 100 азы цы цымыдисыл ӕмбӕлӕм, уый. Кӕд 1939 азы А.А.Фадеев йӕ развӕлгъау ныхасы бацамыдта, зӕгъгӕ, «Къоста-поэты ном бацӕудзӕн Зӕххы къорийы ӕппӕты бӕрзонддӕр нӕмтты рӕгъмӕ», уӕд, 20 азы фӕстӕ та Н.С.Тихонов фидарӕй скодта ахӕм хатдзӕг: «Уый (Къоста — Х.Б.) ныридӕгӕн бацыд дунеон классикты цытджын бинонты ӕхсӕнмӕ». Бафиппайыны аккаг у, уыцы цымыдис канд йӕ поэтикон уацмыстӕ кӕй не ‘взӕрын кӕнынц, фӕлӕ йӕ литературон-публицистон бынтӕ дӕр, уый.

Къоста йӕ «Ирон фӕндыр»-ы схызт аивадон ныхасӕй архайыны бӕрзонддӕр ӕфцӕгмӕ. Ӕндӕр ран афтӕ тӕхгӕ-нӕргӕ ирдӕй йӕхи нӕ равдыста генион поэты монон ӕххӕстад. Уый уымӕн афтӕ рауад, ӕмӕ Хетӕджы-фыртмӕ уыдис йӕ адӕмы судзгӕ историйы стӕм симфонион ӕнкъарынад. Гъе ахӕм уавӕртӕ ӕркӕнынц адӕймаджы искӕцы поэты ӕмбудынад уидӕгты рухсы онг банкъарынмӕ. Къостайы «фӕндыры» симфонион ӕнкъарынад та ма уымӕй уӕлдай адӕймаджы иннӕрдӕм ахизы, йӕ буары чырӕгты афтӕ ӕрфидар вӕййы, ӕмӕ сӕ райсы уацары. Уый фӕрцы поэты хъисын фӕндырӕй цы зӕлтӕ азӕлы, уыдонӕй алчидӕр райсы арвӕрдыны хуызтӕ ӕмӕ нӕ баппары алӕмӕтаг ӕххӕстады. Бынтон диссаг та уый вӕййы, ӕмӕ, ӕмиуадон ӕгъдауӕй куыд рӕсугъдӕй азӕлынц, афтӕ хицӕнтӕй дӕр. Къоста уыцы ӕвидигӕ фӕзындӕн цардхъомыс тыхтӕ куы лӕвӕрдта, уӕд дзы ныуулӕфыди йӕ удварны уӕлтӕмӕнад, ӕмӕ дзы райгуырди ӕмбисонды чиныг, ирон ӕцӕгдзинад ӕххӕстӕй кӕм бацыд, ахӕм ӕрвон фӕзынд.

Ирон поэттӕй Хетӕджы-фырты уды симфони фыццагдӕр чи банкъардта, уыдонӕй иу уыдис Малиты Георги. Йӕ рӕстдзӕвин хъуыды «Йе ‘мдзӕвгӕ — уды цӕхӕркалды» — уырнинагӕй равдыста «кавказаг поэзийы зынгхъахъхъӕнӕджы» (Расул Гамзатов) бӕрзонд нысаниуӕг ӕмӕ йе сфӕлдыстады сӕйраг миниуӕг. Уыцы цӕхӕркалды рухс ссардта бузныгады ӕнкъарӕнтӕ йе ‘мдугонты ‘хсӕн, ирон зӕрдӕты та  судзгӕ ацыд. Цас карздӕр уыди йӕ иубӕстон адӕмы ӕфхӕрд, уый бӕрц тыхджындӕр ӕмӕ ӕнӕсӕттондӕрӕй хъуыстис йӕ ныхас тыхбарады ныхмӕ. Гоген нын уый тыххӕй ныууагъта ӕмбисонды метафорӕ: «Хӕдхӕцӕгады ныхмӕ тохӕй гуырынц генитӕ». Йӕ программон ӕмдзӕвгӕ «Ныстуан» ӕмӕ йӕ иннӕ уацмысты поэт-патриот, поэт-гражданин, поэт-гуманист хъусын кодта, фӕстаг улӕфты онг адӕмӕн лӕггад кӕнынмӕ цӕттӕ кӕй у, уый. Дзыллӕйӕн удуӕлдайӕ лӕггад кӕнын поэтӕн уыдис йӕ царды сӕйраг мидис — йӕ уды цӕхӕркалд.

Уыцы ныхӕстӕ Къостайӕн цы нысан кодтой, уый тыххӕй ӕппӕты растдӕр загъта поэт йӕхӕдӕг: «Кувын ӕмӕ уарзын, уарзгӕйӕ хъизӕмар кӕнын алкӕй тыххӕй… О, алкӕй тыххӕй! Уый сӕвӕрдтон ӕз мӕхицӕн царды нысанӕн. Мӕ разӕнгарддзинадӕн арӕнтӕ нӕ уыдис». Ацы ныхӕстӕ ма нын иу хатт куыд равдыстой, афтӕмӕй Хетӕджы-фырты сфӕлдыстады фӕлдзусады ӕххӕстад, фыццаджыдӕр, агурын хъӕуы йӕ «Ирон фӕндыр»-ы мидӕг. Уыцы генион ӕмдзӕвгӕты ӕмбырдгонды автор, уыцы-иу рӕстӕг, цы поэтикон сгуыхт ӕмӕ рухсхӕссӕджы удварн равдыста, уымӕн нырма фаг аргъгонд нӕма ӕрцыд. Поэты зӕрдӕйы тӕгты ӕвидигӕ уӕлтӕмӕнад сфӕлдыста  диссаджы нывӕст уацмыстӕ. Йӕ алы рӕнхъы дӕр ирон уды хъӕздыг мидис кӕмӕн бацыд, уыдон Леуаны фыртӕн ӕрхастой ӕппӕтадӕмон бузныгад ӕмӕ дун-дунеон номы кад.

Къоста йӕ дзыллӕйы дунембарынады аивта сӕ ахаст поэзимӕ, ӕнӕсбаргӕ йын фӕуӕрӕхдӕр кодта йӕ хъусдард ӕнӕцӕугӕ хӕзнатӕм. Йӕ алыварс уӕвынады ӕцӕгдзинады ӕнкъард фарстытӕ поэт ахӕм сатӕг цӕстытӕй федта, адӕмы ӕфхӕрд йӕ зӕрдӕмӕ афтӕ хӕстӕг райста, раст цыма фидӕнӕй ӕрбацӕуӕг адӕймаг уыдис, ӕмӕ, ӕцӕг цард фенгӕйӕ, дисы бацыд. Йӕ аивадон уацмысты ӕнӕфӕлхатгӕнгӕ нывты уый схызт Шекспиры трагизмы, Дантейы ӕнкъарынады, Тютчевы уынынады, Гоголы худынады ӕмӕ Пушкины ирдады ӕмвӕзадмӕ. Ӕмӕ уым ис «Ирон фӕндыр»-ы ӕнусон кад ӕмӕ рад, фарн ӕмӕ ӕгъдау.

Хозиты Барис

ОСТАВЬТЕ ОТВЕТ

Please enter your comment!
Please enter your name here