Къостайы номимӕ, Къостайы кадимӕ…

0
46

Нӕ цытджын поэт, Иры фарнхӕссӕг Хетӕгкаты Къостайы райгуырдыл сӕххӕст 160 азы. Уыцы стыр юбилейы кадӕн мадзӕлттӕ республикӕйы горӕттӕ ӕмӕ хъӕуты арӕзт цӕуынц азы райдайӕнӕй нырмӕ. Знон та — поэты райгуырӕн бон номарӕн мадзӕлттӕн уыдысты сӕ сӕйрагдӕр ӕмӕ дзыллондӕртӕ.

Райсомӕй Ирон аргъуаны кӕртмӕ — Хетӕджы-фырт йе ‘нусон бынат кӕм ссардта, уырдӕм ӕрбамбырд бирӕ адӕм.

Цӕгат Ирыстоны Сӕргълӕууӕг Битарты Вячеслав, республикӕйы Парламенты Сӕрдар Алексей Мачнев, Хицауады уӕнгтӕ ӕмӕ Дзӕуджыхъӕуы Минӕвӕртты ӕмбырды депутаттӕ, ӕхсӕнады минӕвӕрттӕ ӕмӕ ахуырдзау фӕсивӕд дидинджытӕ сӕвӕрдтой поэты ингӕныл, ӕрымысыдысты йын йе ‘нӕмӕлгӕ уацмыстӕ.

Фӕстӕдӕр Дзӕуджыхъӕу ӕмӕ Аланийы епископ Леонид уым сарӕзта номарӕн ракуывд.

Уыцы райсом ӕхсӕнады минӕвӕрттӕ дидинджытӕ сӕвӕрдтой Театралон фӕзы Къостайы цыртдзӕвӕны раз, стӕй поэты цардимӕ баст ӕндӕр бынӕтты.

Уый фӕстӕ поэты кадӕн мадзӕлттӕ адарддӕр сты Къостайы райгуырӕн хъӕу Нары. Уым арӕзт ӕрцыд поэзи ӕмӕ культурӕйы республикон стыр бӕрӕгбон. Иннӕ хӕттыты куыд вӕййы, афтӕ та ныр дӕр Цӕгат ӕмӕ Хуссар Ирыстоны цӕрджытӕ зӕрдиагӕй саккаг кодтой уыцы табуйаг бынатмӕ, ӕрзылдысты поэты хӕдзар-музейы бӕстыхӕйттыл, сӕ къухтӕ авӕрдтой Къостайы ӕдзард мад Марияйы ингӕныл, иу хатт ма дзаг риуӕй сулӕфыдысты, Хетӕджы-фырт кӕм хъомыл кодта, уыцы комы ӕрдхӕрӕны уӕлдӕфӕй…

Цӕгат ӕмӕ Хуссар Ирыстоны разамонджытӕ, Фысджыты цӕдис ӕмӕ ӕхсӕнады минӕвӕрттӕ зӕрдӕмӕхъаргӕ ныхӕстӕ загътой Къостайы цард ӕмӕ сфӕлдыстады тыххӕй, фӕнысан ын кодтой йе сфӕлдыстады хӕдбындурдзинад ӕмӕ ӕхсӕнадон архайды ахсджиаг нысаниуӕг.

Уый фӕстӕ бӕрӕгбон сӕ аивадӕй барӕсугъд кодтой бӕхты театр «Нарт»-ы актертӕ, зындгонд сфӕлдыстадон коллективтӕ ӕмӕ хицӕн зарӕггӕнджытӕ.

Нары хъӕуы цы стыр бӕрӕгбон уыд, уым архайдтой «Рӕстдзинад»-ы уацхӕсджытӕ дӕр. Сӕ репортаж сын кӕсут газеты иннӕ номыры.

Сланты Аслан

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here