Лыггӕнинаг фарстытӕм — бӕстон цӕстдард

0
35

Цӕгат Ирыстоны Хицауады Сӕрдар Тускъаты Таймуразӕн фембӕлд уыд республикӕйы цӕрджыты къордимӕ. Уӕрӕсейы Президенты ӕхсӕнадон исӕн уаты цы фембӕлд уыд, уырдӕм сӕ тыхстаг фарстытимӕ ӕрбацыдысты 8 адӕймаджы.

Уыдонӕй алкӕимӕ дӕр премьер-министр бӕстон аныхас кодта, сбӕлвырд ын кодта йе ‘рбацыды нысан.

Зӕгъӕм, хъӕууонхӕдзарадон-куыстадон кооператив «Ӕнтыстдзинад»-ы минӕвар Дж. Тугъан куыд радзырдта, афтӕмӕй фӕнд кӕны Мӕздӕджы районы фосдарӕн хӕдзарад саразын ӕмӕ уыцы хъуыддагӕн ракуырдта финансон ӕххуыс. Фермеры ныхасмӕ гӕсгӕ, йӕ зӕрды ис дыууӕ азмӕ фысты нымӕц цыппар минмӕ схӕццӕ кӕнын, уыимӕ, дарынвӕнд кӕны хӕрзмыггаг фос. Йӕ дарддӕры архайды пълантӕ ныридӕгӕн бӕлвырд сты, Волгограды селекцион центримӕ бадзырд дӕр бафыста — уым балхӕндзӕн 1700 хӕрзмыггаг фысы. Тугъан куыд радзырдта, афтӕмӕй йе ‘ргом здахы социалон хъуыддӕгтӕм дӕр. Йӕ нысантӕй иу у полилингвалон (ома, ахуырад уырыссаг ӕмӕ ирон ӕвзагыл кӕм цӕудзӕн, ахӕм) скъола байгом кӕнын.

— Республикӕйы Хъӕууон хӕдзарад ӕмӕ хойраджы министрады разамындӕн бахӕс кӕндзынӕн, цӕмӕй дын дӕ проекттӕм ӕркӕсой. Кӕд сӕ экономикон ӕгъдауӕй пайдайагыл банымайой, уӕд дын, кӕй зӕгъын ӕй хъӕуы, ӕхцайы ӕххуыс дӕр уыдзӕн. Министрад фермертӕн зынгӕ фӕрӕзтӕ радих кӕны ӕмӕ хъуыддагыл хорзӕрдӕм сахадынц. Фермертӕ ӕмӕ иннӕ амалхъомты хӕс та у уыцы фӕрӕзтӕй хӕдзардзинӕй спайда кӕнын ӕмӕ саразын, уӕлӕмхасӕн кусӕн бынӕттӕ кӕм фӕзына, ахӕм хӕдзарӕдтӕ, — бафиппайдта Тускъаты Таймураз.

Т. Таймураз та куыд радзырдта, афтӕмӕй 10 азӕй фылдӕр рады лӕууы цӕрӕнуатон сертификат райсынмӕ. Йӕ раздӕры цӕрӕнбынат ӕнӕбары кӕй ныууагъта, уыцы ӕууӕл хынцгӕйӕ йӕ сӕвӕрдтой сӕрмагонд рады. Уымӕй уӕлдай, нӕлгоймаг у фыццӕгӕм къорды инвалид. Уый Хицауады Сӕрдарӕй ӕххуыс ракуырдта, цӕмӕй йын цӕрӕнуатон сертификат раттыны хъуыддаг фӕтагъддӕр кӕной. Тускъайы-фырт нӕлгоймагӕн зӕрдӕ бавӕрдта, йӕ тыхстаг фарст цыбыр ӕмгъуыдмӕ лыггонд кӕй ӕрцӕудзӕн, ӕмӕ бӕлвырд амынддзинӕдтӕ радта Арӕзтад ӕмӕ архитектурӕйы министрады разамындӕн.

Уыцы бон ӕххуысагур ӕрбацыд К. Зӕлинӕ дӕр. Сылгоймаджы бинонтӕ зын уавӕры сты, йӕхӕдӕг у дыккӕгӕм къорды инвалид, йе ‘нӕниздзинады уавӕрмӕ гӕсгӕ йын кусӕн нӕй. Уыимӕ, йӕ дыууӕ чызджы коммерцион фӕткы бындурыл ахуыр кӕнынц институтты. Бинонтӕ банчы кредиттӕ кӕй фидынц, уымӕ гӕсгӕ тыхстдзинӕдтӕ ӕвзарынц, сӕ коммуналон лӕггӕдты хӕстӕ дӕр бабирӕ сты. Республикӕйы премьер-министр куыд фӕнысан кодта, афтӕмӕй Зӕлинӕйы бинонтӕн уыдзӕн ӕххуыс.

Афтӕ бӕстон Тускъаты Таймураз аныхас кодта фембӕлдмӕ ӕрбацӕуӕг ӕппӕт адӕмимӕ дӕр. Алкӕцы куырдиаты фӕдыл дӕр профилон ведомствӕтӕ ӕмӕ министрадты разамонджытӕн лӕвӕрд ӕрцыд бӕлвырд амынддзинӕдтӕ. Уыимӕ, фарстытӕ лыггонд куыд цӕудзысты, уымӕ уыдзӕн Хицауады Сӕрдары цӕстдард.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here