Къостайы бӕрӕгбон Нары

0
191

Ирыстон сбӕрӕг кодта Хетӕгкаты Къостайы райгуырды 160 азы юбилей. Бӕрӕгбоны сӕйраг мадзӕлттӕ цыдысты поэты райгуырӕн хӕххон хъӕу Нары.

Къостайы «Арфӕйы дзырд» та нӕ ӕрбамбырд кодта Нармӕ Цӕгатӕй-Хуссармӕ, цӕмӕй ӕрымысӕм цытджын поэты рухс ном рӕсугъдӕй ӕмӕ йын зӕгъӕм бузныг, цы удварны хӕзнатӕ нын ныууагъта, уыдоны тыххӕй.

Поты фӕзы Ирыстоны ӕппӕт районтӕ равӕрдтой сӕ хойраджы продукци ӕмӕ ӕрмми дзаумӕттӕ, Къостайы рӕстӕджы хӕххон адӕм сӕ царды цӕмӕй пайда кодтой, ахӕмтӕ, ирон хӕринӕгтӕ. Алы район дӕр сарӕзта хъазт, кафт ӕмӕ зардимӕ. Чиныгуадзӕн «Ир» бацӕттӕ кодта, ирон культурӕ, ирон ӕгъдӕуттӕ, истори, этнографи ӕмӕ Къостайы уацмыстӕ ног мыхуырӕй уагъд чингуыты равдыст.

Бӕрӕгбонмӕ ӕрбацыдысты РЦИ-Аланийы Сӕргълӕууӕг Битарты Вячеслав, Республикӕ Хуссар Ирыстоны Президент Бибылты Анатоли, нӕ республикӕйы культурӕйы министр Къубалты Эльбрус, Цӕгат Ирыстоны Фысджыты цӕдисы сӕрдар Агънаты Гӕстӕн ӕмӕ иннӕ бӕрнон адӕм. Кадджын уазджытӕ кӕрӕй-кӕронмӕ ӕрзылдысты Къостайы хӕдзар-музейы агъуыстытыл, цымыдисӕй кастысты, поэт рухс дунемӕ кӕм фӕзынд, уыцы хӕдзары къонамӕ, фыдӕлтыккон дзаумӕттӕм.

Уый фӕстӕ Битарты Вячеслав ӕмӕ Бибылты Анатоли бабӕрӕг кодтой районты «кӕртытӕ», сахуыстой сын сӕ хойрагӕй ӕмӕ бӕгӕныйы нуазӕнтӕй арфӕтӕ ракодтой бӕрӕгбоны архайджытӕн.

Юбилейон мадзӕлттӕ дарддӕр уыдысты сӕйраг сценӕйы. Хетӕгкаты Къоста канд ирон адӕмы нӕ, фӕлӕ ӕнӕхъӕн дунейы хъӕбул дӕр кӕй у, уый фӕдыл дзырдты Битарты Вячеслав. Уый загъта:

— Дунеон классикон литературӕйы Къостайы ном хуымӕтӕджы ӕвӕрд нӕу. ӕрмӕст Ирыстоны фырт нӕу, фӕлӕ ӕппӕт адӕмты дӕр. Мах сӕрыстыр стӕм Къостайӕ. Йӕ ном алы ирон адӕймагӕн дӕр у  табуйаг. Йӕ адӕмы фидӕныл, йӕ адӕмы хӕрзӕбон ӕмӕ сӕрибарыл йӕхи цард нывондӕн ӕрхаста. Ирон дзырды фарн бӕрзонд ӕмвӕзадмӕ систа. Къостайы «Ирон фӕндыр» ӕмсӕр у Нарты эпосимӕ, ӕмӕ сты ирон адӕмы царды энциклопеди, адӕмы куырыхондзинад ӕмӕ зонындзинӕдты бындур. Цытджын поэт нын фӕдзӕхста кӕрӕдзи уарзгӕйӕ цӕрын, ӕмӕ уыцы фӕдзӕхст махӕй нӕ уыдзӕн рох. Архайдзыстӕм Ирыстоны рӕсугъд ӕмӕ амондджын фидӕныл иумӕ, ӕнгомӕй кӕрӕдзийӕн аргъ кӕнгӕйӕ ӕмӕ кӕрӕдзи ӕмбаргӕйӕ кусыныл.

Бибылты Анатоли дӕр арфӕтӕ ракодта  бӕрӕгбоны архайджытӕн ӕмӕ загъта:

— Цалынмӕ Къостайы ном цӕра, Къостайы поэзи зӕла, уӕдмӕ цӕрдзӕн ирон ӕвзаг. Хетӕгкаты Къоста махӕн нӕ хӕзна у ӕмӕ йын  чысылӕй, стырӕй кад кӕнӕм ӕмӕ кӕндзыстӕм. Ирон адӕмы ӕмӕ Ирыстоны иудзинадмӕ иумӕ цӕуӕм сӕрбӕрзондӕй, Къоста нын куыд фӕдзӕхста, афтӕ. Йӕ кадӕй стӕм сӕрыстыр ӕмӕ архайдзыстӕм уыцы номы аккаг уӕвыныл. Къоста махӕн у нӕ сыгъзӕрин ӕмӕ ирд стъалы бӕрзонд арвыл, рухс нын кӕны нӕ цард, у нӕ фӕндагамонӕг тары, йе ‘взаг ӕмӕ йӕ уды фарн нӕ хъомысджындӕр кӕнынц, дӕттынц нын ныфс ӕмӕ хъару.

Агънаты Гӕстӕн та радзырдта, ирон ӕвзаджы рӕзтыл хуыздӕр чи архайа, уыдон фысджыты номӕй хорзӕхджын кӕй цӕудзысты Кады гӕххӕтт ӕмӕ хӕрзиуджытӕй, уый тыххӕй.

— Мах ардӕм ӕрбамбырд кодта не ‘взаг, нӕ литературӕ, ирон чиныг. Уыдон та нын, фыццаджыдӕр, радта Къоста. Цӕмӕй не ‘взаг, нӕ литературӕ  цӕра, уый нӕ алкӕмӕй дӕр аразгӕ у, ӕмӕ, уыцы хъуыддагыл чи куса, уыдон нӕ Фысджыты цӕдисы номӕй хорзӕхджын кӕндзыстӕм, — загъта Агънаты Гӕстӕн ӕмӕ нӕ республикӕйы Фысджыты цӕдисы номӕй Кады гӕххӕттытӕй схорзӕхджын кодта Битарты Вячеслав ӕмӕ Бибылты Анатолийы, ирон ӕвзаджы рӕзтыл зӕрдиагӕй кӕй кусынц ӕмӕ йӕ бахъахъхъӕнынӕн алы мадзӕлттӕй кӕй архайынц, уый тыххӕй.

Къостайы юбилейон мадзӕлттӕ, кӕй зӕгъын ӕй хъӕуы, нӕ ацыдысты ӕнӕ концертон программӕйӕ. Дзанайты Ольгӕйы разамындӕй Мариинаг театры цӕгатирыстойнаг филиалы нӕлгоймӕгты хор акодта «Балцы зарӕг». Бӕхты театр «Нарттӕ» та равдыста цымыдисаг программӕ «Бӕрӕгбон хӕхты». Архайдтой дзы Ирон театры артисттӕ, Аивӕдты колледжы ӕмӕ ЦИПУ-йы актерон факультеты студенттӕ. Къостайы фыст ӕмдзӕвгӕтӕ кастысты скъоладзаутӕ. Гуыбиаты Эльбрус, Дауыраты Эдуард, Бекъойты Вано, Хъӕбӕлоты Руслан азарыдысты ирон зарджытӕ. Паддзахадон ансамбль «Алан» та акафыд «Симд».

Саутӕты Тамилӕ

Къамтӕ систа Кӕбысты Харитон

 

ОСТАВЬТЕ ОТВЕТ

Please enter your comment!
Please enter your name here