Фӕндараст, фӕсивӕд!

0
179

Алы фӕззыгон ӕрсидты куыд вӕййы, афтӕ та ныр дӕр Уӕрӕсейы Гӕрзифтонг тыхты службӕ кӕнынмӕ цы лӕппутӕм ӕрсидтысты, уыцы фыццаг къорды, ӕдӕппӕт 52 сидтоны, знон кадджын уавӕры афӕндараст кодтой Уӕрӕсейы ӕфсадмӕ.

Уый фӕдыл республикӕйы ӕфсӕддон комиссарады кӕрты уыдис кадджын митинг, байгом ӕй кодта ӕфсӕддон комиссары хӕдивӕг Габеты Алан. Йӕ раныхасы фӕстӕ уый дзырды бар радта РЦИ-Аланийы Ветеранты советы сӕрдары фыццаг хӕдивӕг, авиацийы инӕлар-майор Бедойты Русланӕн.

— Абон сымах цӕут Райгуырӕн бӕстӕйы раз уӕ хӕс фидынмӕ, — загъта уый. — Уӕ зӕрдыл уын ӕрлӕууын кӕндзынӕн, ацы бон зӕрдылдарӕн бон кӕй у, уый: сӕдӕ азы сӕххӕст Советон Цӕдисы Хъӕбатыр, инӕлар-лейтенант Билаонты Павелы райгуырдыл. Уый 1943 азы 23-аздзыдӕй командӕ кодта полкъӕн. Ӕмӕ ахӕм ӕрыгон ӕфсадхонтӕ иу ӕмӕ дыууӕ нӕ рантыст Ирыстонӕй. Уыдоны ном хъуыды кӕнгӕйӕ, хъуамӕ сымах бӕрзонд хӕссат уӕ мыггӕгты кад ӕмӕ Ирыстоны намысы тырыса. Уырны мӕ, хорз кӕй баслужбӕ кӕндзыстут ӕмӕ нӕм афӕдзы фӕстӕ ӕцӕг лӕгтӕй кӕй сыздӕхдзыстут, уый. Ӕнтыстджын ут!

Республикӕйы ӕфсӕддон комиссары бардзырдмӕ гӕсгӕ, службӕмӕ цӕуӕг лӕппутӕн лӕвӕрд ӕрцыд рӕнхъоны цин.

Кадджын митинджы ма раныхас кодтой ӕмӕ ӕфсадмӕ цӕуӕг лӕппутӕн фӕндарасты ныхас загътой республикӕйы фӕсивӕды хъуыддӕгты фӕдыл комитеты сӕрдар Джусойты Руслан, Фыдыбӕстӕ хъахъхъӕнгӕйӕ чи фӕмард, уыдоны бинонты ӕппӕтуӕрӕсеон ӕхсӕнадон организацийы цӕгатирыстойнаг регионалон хайады сӕрдар Татьянӕ Днепровская ӕмӕ РЦИ-Аланийы ӕфсӕддон комиссар, булкъон Марат Пашаев.

Ӕфсӕддон службӕмӕ кӕй афӕндараст кодтой, уыдоны номӕй ард бахордта рӕнхъон Беройты Рустам.

«Ард хӕрӕм! Ард хӕрӕм! Ард хӕрӕм!” — Ӕртӕ хатты анӕрыд ӕфсӕддон комиссарады кӕрты ӕфсадмӕ цӕуӕг лӕппуты фидар ардбахӕрд.

Фӕндараст, лӕппутӕ!

Багаты Аврам

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here