Ирон ӕвзаджы ахуыргӕнджыты конференци

0
71

Хетӕгкаты Къостайы 160 азы юбилейы фӕдыл Цӕгат Ирыстоны Ахуырады кусджыты дӕсныдзинад уӕлдӕргӕнӕн институты уыд ӕппӕтадӕмон наукон-практикон конференци ахӕм темӕйыл: «Нырыккон ахуырады бастдзинад Къостаимӕ». Арӕзт ӕрцыд РЦИ-Аланийы Ахуырад ӕмӕ наукӕйы министрады ӕмӕ уӕлдӕр амынд институты хъӕппӕрисӕй.

Конференцийы архайдтой нӕ республикӕйы ӕмӕ Хуссар Ирыстоны ирон ӕвзаг ӕмӕ литературӕйы ахуыргӕнджытӕ. Хуынд ӕм ӕрцыд историон наукӕты доктор, профессор, академик Мӕхӕмӕтты Ахуырбег.

Конференци байгом кодта ӕмӕ ӕппӕт архайджытӕн дӕр ӕнтыстджын куысты фӕдыл арфӕ ракодта институты проректор Дзӕхойты Ларисӕ.

Мӕхӕмӕтты Ахуырбег дзы доклад скодта Къостайы публицистикӕйы фӕдыл.

— Къостайы цард канд сфӕлдыстадон куыстыл не ‘нцад, фӕлӕ уыдис ӕхсӕнадон политикон архайӕг дӕр. Йӕ публицистикӕйы ирдӕй зыны, мӕгуыр ӕфхӕрд ӕмӕ ссӕст адӕмы сӕрыл йӕ тохы «хъӕр». Йӕ «цыргъ» уайдзӕфтӕ хъӕздыг ӕмӕ бонджын хицауады ныхмӕ топпы  цӕфӕй карздӕр уыдысты. Периодикон мыхуыры Къостайы архайд райдыдта 1893 азы Стъараполы. Ацы ран бацыд ӕхсӕнадон куысты гуылфӕны ӕмӕ уыцы-иу рӕстӕг ссис, газет «Северный Кавказ»-ы редакцийы нымӕрдар. Къоста газетты цы ӕрмӕджытӕ мыхуыр кодта, уыдоны фӕдыл фыста: «Я никогда своим словом не торговал, и не для того пишу, чтоб печатать, мне не нужны писания, ни выгоды от него. Я пишу то, что уже не в силах бываю сдерживать в своем изболевшем сердце».

Къоста нӕ тарст, уыцы дуджы мӕгуыр адӕмӕн зындзинӕдтӕ чи ӕвзарын кодта, уыцы зындгонд чиновникты ныхмӕ ӕргом дзурынӕй, нӕ тарстис цензурӕйӕ ӕмӕ цӕттӕ уыдис кӕддӕриддӕр уавӕр хуыздӕрӕрдӕм саразыны хъуыддагыл бацархайынмӕ. Къостайы публицистон куыст ахсджиаг у абон дӕр, — загъта Мӕхӕмӕтты Ахуырбег.

Пленарон ӕмбырды, Къоста ӕмӕ ирон национ ахуырады темӕйыл доклад скодта Майрӕмыхъуаты Фатимӕ.

Конференцийы Дзӕуджыхъӕуы 30-ӕм скъолайы ахуырдзаутӕ сӕ аивадон разамонӕг, Цӕгат Ирыстоны сгуыхт артисткӕ Мелыккаты Замирӕимӕ аив бакастысты Къостайы ӕмдзӕвгӕтӕ, акодтой зарӕг «ӕнӕ хай». Уый фӕстӕ конференцийы куыст райдыдта секцитӕм гӕсгӕ. Секцион куысты ахуыргӕнджытӕ ныхас кодтой Къоста ӕмӕ национ ахуырады фарстытыл, поэты сфӕлдыстад скъолаты ӕмӕ институтты, скъолайы агъоммӕйы сывӕллӕтты хъомыладон-ахуырадон куысты.

Саутӕты Тамилӕ

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here