Паддзахадон корпорацитӕ дзуапп дӕтдзысты

0
26

«Ацы федералон закъоны проекты руаджы ныр нӕ бӕстӕйы Федералон ӕмбырды раз паддзахадон корпорацитӕ ӕмӕ хицӕн паддзахадон компанитӕ  хъуамӕ сӕ архайды тыххӕй дзуапп дӕттой. Уымӕй дарддӕр ма Уӕлдӕр палатӕйы ӕмбырдмӕ хуынды бындурыл цӕуой сӕ  разамонджытӕ. Уӕрӕсейы Федералон ӕмбырды раз нырӕй фӕстӕмӕ дзуапдӕттӕг уыдзысты «Банкты ӕфснайд ӕхца фӕдзӕхстады агентад», «Внешэкономбанк», «Ростехнологии», «Росатом», «Росавтодор», «Роскосмос». Ацы корпорацитӕ ӕмӕ компанитӕ федералон ӕмвӕзады ӕххӕст кӕнынц ахъаззагдӕр нысантӕ, хъуамӕ ӕхсӕнад зона, куыд ӕмӕ сын цы ӕнтысы, уыдӕттӕ», — знон парламентон советы ӕмбырды бюджеты, хъалонты, исбонад ӕмӕ кредитон организациты комитеты сӕрдар Баликъоты Валери ӕрныхас кодта ахадгӕ закъоны проектыл.

Ӕмбырд амыдта Парламенты Сӕрдар Алексей Мачнев.

Цард куыд равдыста, афтӕмӕй ныронг паддзахадон корпорацитӕ сӕ архайды тыххӕй бӕрӕггӕнӕнтӕ хӕццӕ кодтой ӕрмӕстдӕр Уӕрӕсейы Хицауадмӕ, фӕлӕ уый фаг нӕу. Нӕ бӕстӕйы Нымайӕн палатӕ, паддзахадон корпорациты ӕмӕ компаниты архайд бӕрӕггӕнгӕйӕ, раиртӕста, 2012-2014 азтӕн сын бюджетӕй цы ӕхца радих кодтой, уыдонӕй 607 миллиард сомы раст хардзгонд кӕй не ‘рцыдысты, уый. Ома, сӕ комкоммӕ нысантыл нӕ сӕмбӕлдысты. ӕрмӕст менеджменты кусджытӕн цы ӕнӕбындур егъау мыздтӕ фӕфыстой, уый кой куы нӕ кӕнӕм, уӕддӕр ма дзы рабӕрӕг бирӕ ӕнӕпайда инвестицион проекттӕ дӕр. Афтӕмӕй сын бахъуыд уӕлӕмхасӕн ӕхца — куыд паддзахадон ӕххуыс, ногӕй радих кӕнын. Уыдӕттӕ та ӕртыхстысты хъалонфидджыты уӕхсчытыл.

Закъоны проекты автортӕ куыд амонынц, афтӕмӕй нӕ бӕстӕйы экономикӕйы бирӕ къабӕзты паддзахадон корпорацитӕ ӕмӕ компанитӕн дихгонд цӕуы стыр бынат. Фӕлӕ, бюджетон фӕрӕзтӕй раст кӕй нӕ пайда кӕнынц, уыдӕттӕ домынц бӕрнондзинад сӕ закъоны бындурыл бадомын.

Парламенты Сӕрдары хӕдивӕг Кучиты Гари цы документтыл ӕрныхас кодта, уыдонимӕ уыдис куыстадон ӕппарӕццӕгты тыххӕй федералон закъонмӕ ивддзинӕдтӕ бахӕссыны фӕдыл акт дӕр. Ныхас дзы цӕуы ӕфсӕйнаджы сӕстӕгтӕ, хуызджын ӕмӕ сау ӕфсӕйнӕгты ӕппарӕццӕгтимӕ архайд банывыл кӕныныл. Уӕрӕсейы экономикӕйы ацы куыстадон ӕппарӕццӕгты къабаз ахсы хицӕн бынат, йемӕ баст у металлургийы хомаджы ӕдасдзинад. Фӕлӕ йӕ ахадгӕ рӕзтӕн ныртӕккӕ сӕвзӕрд бирӕ къуылымпыдзинӕдтӕ. Ӕфсӕйнаджы сӕстӕгтӕ, хуызджын ӕмӕ сау ӕфсӕйнӕгты ӕппарӕццӕгтӕ чи ӕмбырд кӕны, хомаджы хуызы сӕ ногӕй чи бакусы, уыдон уӕйгӕнджытӕн бафидыны охыл банктӕй сисынц стыр ӕхца.

Ӕхца къухӕй-къухмӕ кӕй фидынц, (уый къабазы бацахсы 95 проценты), уымӕй фылдӕр кӕны ӕнӕзакъон, аууоны архайд. Афтӕмӕй цӕстдарӕг службӕтӕн сӕ куыст вазыгджындӕр кӕны, уыцы базарады закъоны бындурыл чи кусы, ӕлхӕныны ӕмӕ уӕй кӕныны хъуыддӕгтӕ банкты хыгъдтӕм гӕсгӕ чи кӕны, уыдон ӕвзарынц зындзинӕдтӕ. Ацы закъонӕвӕрынадон ивддзинӕдты фӕрцы экономикон ахастдзинӕдты криминализаци фӕкъаддӕр уыдзӕн, ӕппӕт хъуыддӕгтӕ конд цӕудзысты ӕргомӕй, къабазы рӕстудӕй чи кусы, уыдоны уавӕр фӕхъӕддыхдӕр уыдзӕн.

Кучийы-фырт ма иннӕ закъоны проектты ӕмрӕнхъ фӕбӕрӕг кодта Уӕрӕсейы Зӕххы кодексмӕ ивддзинӕдтӕ бахӕссыны документ дӕр. Ныртӕккӕ зӕххы ахастдзинӕдтӕ куыд нывылгонд цӕуынц, уымӕ ӕрхӕссӕн ис фаутӕ. Бынӕттон хиуынаффӕйады ӕмӕ субъектты ӕххӕстгӕнӕг хицаудзинады оргӕнтӕ зӕххы хай раттыны тыххӕй уынаффӕ куы фӕхӕссынц, уӕд ӕй нӕ барвитынц культурон бынты объекттӕ хъахъхъӕнӕг ӕххӕстбарджын куыстуӕттӕм. Фӕстаг рӕстӕг тынг сарӕх сты, цӕрӕн хӕдзар, дачӕ саразыны нысанимӕ зӕххы хӕйттӕ, культурон бынты объекттӕ цы ран сты, уым радих кӕныны цаутӕ. Ныр Зӕххы кодексы 11-ӕм статья баххӕст уыдзӕн домӕнӕй, цӕмӕй ӕппӕт уыцы хъуыддӕгтӕ раздӕр ӕвзӕрст цӕуой культурон бынтӕ хъахъхъӕнӕг ӕххӕстбарджынтимӕ.

Социалон политикӕйы, ӕнӕниздзинад хъахъхъӕнынад ӕмӕ ветеранты хъуыддӕгты комитет дӕр ӕмбырдмӕ рахаста цалдӕр ахсджиаг закъоны проекты. Комитеты сӕрдар Реуазты Ларисӕ куыд радзырдта, афтӕмӕй ныронг федералон закъонӕй ӕмбарынад «бирӕсывӕллонджын бинонтӕ» фидаргонд нӕма уыд. ӕппӕт хъуыддӕгтӕ нывылгонд цӕуынц 1992 азы 5 майы ист Уӕрӕсейы Федерацийы Президенты Указӕй. Уый фӕрцы паддзахадон ӕххуыс лӕвӕрд цӕуы бирӕсывӕллонджын бинонтӕн. Закъонӕй йӕ куы сфидар кӕной, уӕд уымӕй ӕппӕт Уӕрӕсейы дӕр зынгӕ фӕхуыздӕр уыдзӕн иумӕйаг демографион уавӕр, бирӕсывӕллонджын бинонтӕ сӕхиуыл банкъардзысты паддзахадон ӕххуыс. Ныронг алы регион дӕр йӕ авналӕнтӕм гӕсгӕ ӕххуыс кодта ахӕм бинонтӕн.

Комитеты сӕрдар ма рӕгъмӕ рахаста, фыццаг къорды инвалидтӕм кӕсӕг куыстхъом адӕмӕн рагацау пенси снысан кӕнынимӕ баст закъоны проект. Уымӕй ивддзинӕдтӕ хаст цӕуынц «Фӕдзӕхстадон пенситы тыххӕй» федералон закъонмӕ. Уӕрӕсейы цӕрджытӕ рагӕй ӕвӕрынц домӕн, цӕмӕй фыццаг къорды инвалидтӕм, (ома, сӕ хиуӕттӕм, сӕ сывӕллӕттӕм) чи кӕсы куыстхъом уӕвгӕйӕ, уыдонӕн уыцы рӕстӕг нымад ӕрцӕуа фӕллойадон стажыл. Уымӕй сын уаид рагацау пенси снысан кӕныны фадат.

Советы уӕнгтӕ сразы сты ацы ӕмӕ иннӕ ахсджиаг закъоны проекттимӕ, сфидар сӕ кодтой. Ӕмбырды ма ӕрныхас кодтой ӕндӕр бакӕнинаг хъуыддӕгтыл дӕр.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here