Нафийы номыл преми

0
137

Ирыстоны адӕмон фыссӕг, Хетӕгкаты Къостайы номыл премийы лауреат, филологон наукӕты доктор, профессор Джусойты Нафийы ном сӕнусон кӕныныл зӕрдиагӕй бацархайдтой не ‘мзӕххонтӕ — Самарӕйы кадджын гражданин, Самарӕйы облӕсты Адӕмты цӕдисы сӕрдар Хуыгаты Ростик ӕмӕ хӕрзаудӕн фонд «Амонд»-ы директор, зындгонд ӕхсӕнадон ӕмӕ политикон архайӕг, публицист, поэт ӕмӕ историк Челӕхсаты Хъазыбег. Уыдон Нафийы номыл национ литературон преми саразыны тыххӕй фехъусын кодтой 2015 азы, поэты 90 азы юбилейон изӕры.

Челӕхсаты Хъазыбег куыд загъта, афтӕмӕй преми саразыны сӕйраг нысан уыд, цӕмӕй ирон литературӕйы фӕзына ног нӕмттӕ, ног курдиӕттӕ. Уымӕ гӕсгӕ Фонды архайджытӕ сфӕнд кодтой, ӕрвылаз дӕр Нафийы номыл ӕртӕ премийы, иронау чи фыссы, уыцы автортӕн дӕттын. Уыимӕ, сӕрмагонд дипломтӕ ӕмӕ Нафийы хуызистимӕ майдантӕ.

Фонд конкурсы архайджыты хорзӕхджын кӕны ӕхцайы премитӕй дӕр. Раарфӕ кӕнын ӕмбӕлы Фонды директор Челӕхсаты Хъазыбегӕн йӕ хъӕппӕрисджын архайды тыххӕй, уымӕн ӕмӕ ныр цыппӕрӕм хатт преми радтыны бӕрӕгбонтӕ ацыдысты бӕрзонд ӕмвӕзадыл. Уӕдӕ цӕттӕгӕнӕн мадзӕлттӕ дӕр Хъазыбеджы разамындӕй уыдысты нывыл.

Нафийы номыл конкурс цыппӕрӕм хатт уыдис Хуссар Ирыстоны паддзахадон университеты ӕмбырдтӕ аразӕн залы. Ардӕм ӕрбацыдысты культурӕйы ӕмӕ сфӕлдыстадон интеллигенцийы минӕвӕрттӕ, Хуссар Ирыстоны разамонджытӕ, преми раздӕр чи райста, уыцы лауреаттӕ, уазджытӕ Цӕгат Ирыстонӕй, дзыллон-информацион фӕрӕзтӕ.

Бӕрӕгбоны раныхас кодта Хуссар Ирыстоны Президент Бибылты Анатоли. Уый зӕрдиаг арфӕ ракодта преми саразӕг, Самарӕйы кадджын гражданин, Самарӕйы облӕсты Адӕмты цӕдисы сӕрдар Хуыгаты Ростикӕн ӕмӕ литературон конкурсы ӕппӕт архайджытӕн.

Бибылты Анатоли загъта: «Джусойты Нафи у канд Джусойты мыггаджы кад ӕмӕ намыс нӕу, фӕлӕ ӕгас Ирыстоны дӕр. Йӕ куырыхон сфӕлдыстады фӕрцы, йӕ бавӕрӕн стыр у Фыдыбӕстӕйы наукӕ ӕмӕ филологимӕ. Йӕ иузӕрдион уарзондзинад йӕ райгуырӕн ирон зӕхмӕ. Нафийы ном ӕнустӕм баззайдзӕн нӕ республикӕйы историйы, бирӕ кӕй уарзта, уыцы адӕмы зӕрдӕты. Нафийы преми ныридӕгӕн стыр ӕвӕрӕн бахаста ирон литературӕйы рӕзтмӕ».

Уый фӕстӕ Бибылты Анатоли схорзӕхджын кодта фыццаг премийӕ зындгонд поэт ӕмӕ журналист Дыгъуызты Тенгизы. Уый загъта: «ӕз сӕрыстыр дӕн, мӕ фыццаг хӕрзиуӕг Нафийы номыл преми кӕй у, уымӕй. Бацархайдзынӕн, цӕмӕй уон ацы зынаргъ ӕмӕ кадджын  хӕрзиуӕджы аккаг, уый тыххӕй хӕрын ард. Нафи уыд, кӕстӕртыл зӕрдӕйӕ чи аудыдта ӕмӕ сын фидӕнмӕ ныфс ӕмӕ хъарутӕ чи лӕвӕрдта, ахӕм Хуыцауы сконд адӕймаг».

Конкурсы дыккаг преми Хуыгаты Ростик радта ирон зындгонд поэтессӕ, Хуссар Ирыстоны Фысджыты цӕдисы уӕнг, Хуссар Ирыстоны паддзахадон университеты ахуыргӕнӕг Годжыцаты Неляйӕн.

Ӕртыккаг преми та жюри саккаг кодта ӕрыгон курдиатджын поэтессӕ, Цӕгат Ирыстоны Культурӕйы министрады пресс-службӕйы кусӕг Баситы Зӕлинӕйӕн.

Хӕрзаудӕн фонд «Амонд» ма Плиты Грисы номыл сарӕзта конкурс хуыздӕр студентты ‘хсӕн. Конкурсы уӕлахиздзаутӕ систы Сиукъаты Виктория ӕмӕ Уанеты Викӕ. Уыдонӕн дӕр лӕвӕрд ӕрцыд ӕхцайы премитӕ ӕмӕ дипломтӕ Плиты Грисы хуызистимӕ.

Челӕхсаты Хъазыбег йӕ раныхасы фӕндон бахаста, цӕмӕй Нафийы номыл преми амӕй фӕстӕмӕ лӕвӕрд цӕуа ӕртӕ азы иу хатт. Уыимӕ, Челӕхсайы-фырт стыр бузныг загъта Хуыгаты Ростикӕн Ирыстоны цӕрджытӕн йӕ алывӕрсыг ӕххуысы тыххӕй.

Кадджын бӕрӕгбоны кӕронбӕттӕны преми саразджытӕ Хуыгаты Ростик ӕмӕ Челӕхсаты Хъазыбегӕн, Хуссар Ирыстоны Хицауадӕн, Президент Бибылты Анатолийӕн ӕмӕ конкурсы ӕппӕт архайджытӕн арфӕ ракодта Нафийы хо, ЦИПУ-йы доцент, филологон наукӕты кандидат Джусойты Клавдия.

Томайты Рохсанӕ, ӕхсӕнадон уацхӕссӕг

ОСТАВЬТЕ ОТВЕТ

Please enter your comment!
Please enter your name here