Бындурон цалцӕгмӕ бавнӕлдтой

0
72

Дзӕуджыхъӕуы Миллеры уынджы бындуронӕй цалцӕг кӕнын райдыдтой цыппар бирӕуӕладзыгон хӕдзары. Уыдон хӕстӕг сты Цӕгат Ирыстоны паддзахадон филармонимӕ, уый та хауы культурон бынтӕм. Ахӕм объектмӕ хӕстӕг цалцӕггӕнӕн куыстытӕн хъуамӕ разыйы уынаффӕ рахӕсса архитектурон службӕ.

Цыппар бирӕуӕладзыгон хӕдзары цалцӕджы проект ӕвзӕрста Дзӕуджыхъӕуы сӕйраг архитектор Хъараты Аслан. Уый ма сфидар кодта, хӕдзӕртты ӕддаг къултӕ цавӕр хуызӕй ахуырст ӕрцӕудзысты, уый дӕр.

Цӕрӕнуӕтты-коммуналон хӕдзарады, артаг ӕмӕ энергетикӕйы хайады разамонӕг Надгериты Батрадз куыд радзырдта, афтӕмӕй хӕдзӕрттӕн ивдзысты сӕ сӕртӕ, базилдзысты сын се ‘ддаг къултӕм. Уымӕй дарддӕр, фендӕрхуызон уыдзӕн балкъонты фӕлгонц, хӕдзӕрттӕм бахизӕнты рудзгуытӕ дӕр ивд ӕрцӕудзысты. Иумӕйагӕй сын бахъӕудзӕн 15 милуан сомы.

Цӕрджытӕй иу, Валентинӕ Первых, куыд бафиппайдта, афтӕмӕй хӕдзӕртты ӕддаг къултӕ уыдысты заууат уавӕры, сӕ сӕрстытӕ згъӕлдысты. «Горӕты историон хайы хӕдзӕрттыл ахӕм бакаст нӕ фидауы. Тынг ӕхсызгон мын у, нӕ цӕстыты раз ахӕм ивддзинӕдтӕ кӕй цӕуы, нӕ хӕдзӕрттӕ цӕхӕр кӕй акалдзысты, уый», — цингӕнгӕйӕ загъта сылгоймаг.

Куыстыты хӕрзхъӕддзинадмӕ къӕрцхъус у бирӕуӕладзыгон хӕдзӕртты бындурон цалцӕджы фонды техникон цӕстдарды службӕ. Уарынтӕ куы райдайой, уӕд аразджытӕ хӕдзӕртты сӕрты байтындзысты сӕрмагонд егъау ӕмбӕрзӕн. Уымӕй фатертӕ хызт ӕрцӕудзысты уарынтӕй. Ӕдӕппӕтӕй ацы аз бындурон цалцӕджы куыстытӕ нысангонд ӕрцыдысты 40 бирӕуӕладзыгон хӕдзары.

Иринӕ Горбунова

ОСТАВЬТЕ ОТВЕТ

Please enter your comment!
Please enter your name here