Мӕздӕджы район: сӕйраг ӕргом — социалон объекттӕм

0
26

Знон Цӕгат Ирыстоны балцы уыд Уӕрӕсейы Федерацийы Президенты ӕххӕстбарджын минӕвар Цӕгат Кавказы федералон зылды Александр Матовников. Президенты минӕвар ӕмӕ РЦИ-Аланийы Сӕргълӕууӕг Битарты Вячеслав бабӕрӕг кодтой Мӕздӕджы район ӕмӕ бӕстон ӕркастысты, ахсджиаг социалон объекттӕ куыд арӕзт цӕуынц, уымӕ.

Фыццаджы-фыццагдӕр инспекцион балцы архайджытӕ сӕ фӕндаг акодтой станицӕ Луковскаямӕ. Уым ныртӕккӕ арӕзт цӕуы ног рӕвдауӕндон 150 сывӕллонӕн. Ног хъомыладон кусӕндон ӕрбынӕттон уыдзӕн дыууӕуӕладзыгон агъуысты — проекты хыгъд ӕрцыдысты ӕппӕт нырыккон домӕнтӕ дӕр.

Подрядон организацийы минӕвӕрттӕ куыд радзырдтой, афтӕмӕй ӕппӕт куыстытӕ дӕр цӕуынц пъланмӕ гӕсгӕ. Ацы бонты аразджытӕ кӕнынц мидӕггаг куыстытӕ. Ног рӕвдауӕндон хъуамӕ байгом уа ацы азы кӕрон. Проекты аргъ у 190 милуан сомы.

Президенты минӕварӕн куыд фехъусын кодтой, афтӕмӕй сывӕллӕтты рӕвдауӕндӕтты уӕлӕмхасӕн бынӕттӕ гом кӕныны фарст къӕпхӕнгай лыггонд цӕуы. Зӕгъӕм, мӕздӕггаг рӕвдауӕндӕтты ныртӕккӕ ноджыдӕр ма арӕзт цӕуынц ӕртӕ уӕлӕмхасӕн бӕстыхайы (95 бынатӕн). Уымӕй уӕлдай, цӕттӕгонд цӕуы иннӕ ног рӕвдауӕндоны проект дӕр (120 бынатӕн). Районы администрацийы минӕвӕртты ныхасмӕ гӕсгӕ, уӕд бынӕттон цӕрджыты сӕ сывӕллӕтты рӕвдауӕндонмӕ рады ӕвӕрын нал бахъӕудзӕн.

Цӕгат Ирыстон национ проекттӕ ӕмӕ иннӕ фыццаградон программӕтӕ ӕххӕст кӕныныл куыд кусы, ууыл дзургӕйӕ, Битарты Вячеслав Президенты минӕварӕн куыд радзырдта, афтӕмӕй республикӕйы цы 180 скъолайы ис, уыдонӕй 130 хъӕуы бындуронӕй сцалцӕг кӕнын. Зындгонд куыд у, афтӕмӕй ахуырады кусӕндӕтты цалцӕджы фарст Битарты Вячеслав ӕрӕджы сӕвӕрдта УФ-йы премьер-министр Дмитрий Медведевимӕ фембӕлды рӕстӕг дӕр. Уыцы куырдиатыл Хицауады Сӕрдар сразы ӕмӕ бӕлвырд амынддзинӕдтӕ радта федералон ведомствӕты разамонджытӕн. Уыцы уынаффӕты фӕрцы фидӕн азы Цӕгат Ирыстонӕн скъолатӕ цалцӕг кӕнынӕн федералон бюджетӕй дихгонд ӕрцӕудзӕн 200 милуан сомы бӕрц.

Фӕстӕдӕр Александр Матовников бабӕрӕг кодта Мӕздӕджы районы поликлиникӕ. Президенты минӕварӕн фенын кодтой хайӕдты медицинон ифтонгдзинад, радзырдтой йын, реабилитацийы ӕмӕ иннӕ хайӕдтӕ цавӕр фӕткмӕ гӕсгӕ кусынц, уый тыххӕй. Уазджытӕн фадат уыд, поликлиникӕйы лӕггӕдтӕй чи пайда кӕны, уыцы адӕмимӕ аныхас кӕнынӕн дӕр. Сӕрмагонд ӕргом аздӕхтӕуыд рынчын адӕмӕн хостӕ дӕттыны, дохтырмӕ рады лӕууын ӕмӕ ӕндӕр ахӕм фарстытӕм.

Цӕгат Ирыстоны ӕнӕниздзинад хъахъхъӕнынады министры фыццаг хӕдивӕг Цгъойты Светланӕ куыд фехъусын кодта, афтӕмӕй тагъд рӕстӕджы балхӕндзысты ангиограф. Уыцы ӕмӕ ӕндӕр ахӕм медицинон техникӕйы фӕрцы районы фӕзындзӕн вазыгджын операцитӕ кӕныны фадат. Уӕд рынчынты зынгӕ хай Дзӕуджыхъӕумӕ ӕрвитын нал бахъӕудзӕн. Министры хӕдивӕджы ныхасмӕ гӕсгӕ, ӕппӕт уыцы мадзӕлттӕ арӕзт цӕуынц национ проект «ӕнӕниздзинад хъахъхъӕнынад»-ы фӕлгӕты (куыстытӕн фыццаг къӕпхӕны радих кодтой 78 милуан сомы).

Президенты минӕварӕн фенын кодтой иннӕ ахсджиаг социалон объекттӕ дӕр, стӕй йын радзырдтой, хӕстӕгдӕр рӕстӕг цы куыстытӕм бавналдзысты, уый тыххӕй дӕр.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here