Ныхас — Беслӕны экономикон рӕзтыл

0
28

Беслӕны социалон-экономикон рӕзты фарстытыл ныхас цыдис Мӕскуыйы Цӕгат Кавказы хъуыддӕгты фӕдыл министрады.

Цӕгат Ирыстонӕй ӕмбырды архайдтой     РЦИ-Аланийы Хицауады Сӕрдар Тускъаты Таймураз ӕмӕ экономикон рӕзты министр Томайты Хъазыбег. Ныхас цыдис Беслӕны генералон пъланмӕ хаст бакӕнинаг хъуыддӕгтӕ царды рауадзыныл, цы ӕхцайы гуырӕнтӕ сын бахъӕудзӕн, уыдоныл.

Кусӕг балцӕй ӕрыздӕхгӕйӕ, ӕппӕт ахсджиаг уынаффӕтыл ныхас рауад нӕ республикӕйы Хицауады сӕрмагонд ӕмбырды. Тускъаты Таймураз куыд бамбарын кодта, афтӕмӕй, рӕгъмӕ цы фарстытӕ рахастой, уыдонӕн сӕ фылдӕр федералон ӕмвӕзады ӕмбӕрстгонд ӕрцыдысты. «Ис, нӕхи ма бакусын цӕуыл хъӕуы, ахӕм хъуыддӕгтӕ, фӕлӕ, генералон пълан царды ӕххӕстгонд кӕй цӕудзӕн, уый дызӕрдыггаг нӕу. Ӕрмӕстдӕр нӕ хорз бакусын хъӕуы федералон центримӕ, уымӕ гӕсгӕ уӕ курын, цӕмӕй хӕрзцыбыр рӕстӕгмӕ Мӕскуымӕ ӕппӕт хъӕугӕ документтӕ арвитат», — бафӕдзӕхста Хицауады Сӕрдар.

Хъуамӕ министртӕ бӕстон равзарой генералон пъланмӕ хаст мадзӕлттӕ. Уыдонимӕ сты Менделеевы ӕмӕ Чкаловы уынгты скъолатӕ саразын, 120 бынаты кӕм уыдзӕн, ахӕм рӕвдауӕндоны, ӕвзонг техникты ӕмӕ ӕвзонг натуралистты станцӕты, сыгъдӕггӕнӕнты арӕзтӕдтӕ, сывӕллӕтты сфӕлдыстады хӕдзары бындурон рацарӕзт, парчы фӕлгонцад ӕмӕ ма ӕндӕр ахсджиаг объекттӕ. Сӕ алкӕмӕн дӕр хъуамӕ барӕвдз кӕной проектон-хӕрдзты документаци. Хицауады Сӕрдар фӕсидт ӕмбырды архайджытӕм, цӕмӕй цӕттӕ уынаффӕтӕм ма ӕнхъӕлмӕ кӕсой, фӕлӕ федералон структурӕты размӕ рахӕссой сӕхи барст, нымад, алцӕмӕй ӕххӕст документтӕ. Ӕрмӕстдӕр афтӕмӕй хъуыддӕгтӕ конд цӕудзысты ӕнӕкъуылымпытӕй.

Генералон пъланмӕ хицӕнӕй хаст ӕрцыдис, 2004 азы 1-3 сентябры фыдбӕллӕхы хъыгдардбаййафӕг адӕмӕн бӕрзонд технологон медицинон ӕххуыс ӕмӕ сӕ низты фӕстиуджытӕ иуварс кӕныны, санаторитӕм сӕ ӕрвитыны фарст. Экономикон рӕзты министр Томайты Хъазыбег куыд загъта, афтӕмӕй хъуамӕ бацӕттӕ кӕной ахӕм ӕххуысхъуаг адӕмы хыгъд. «Ныры онг террористон фыдбӕллӕхты хъыгдардбаййафӕг адӕмы тыххӕй хицӕн закъон нӕма ис, фӕлӕ уал нӕ кусын хъӕуы Цӕгат Кавказы хъуыддӕгты фӕдыл министрады фӕрцы. Хъуамӕ бацӕттӕ кӕнӕм фыстӕг, ӕмӕ ӕркӕсдзыстӕм, ацы хъуыддагӕн ӕхца кӕцӕй радих кӕндзысты, уымӕ. Чи зоны, фыццаг аз радих кӕндзысты Фӕстауӕрцы фондӕй», — загъта Томайы-фырт.

Беслӕны генералон пъланмӕ хаст ӕрцыд 19 пункты, документыл бакуыстӕуыд Уӕрӕсейы Федерацийы Хицауады уынаффӕ ӕххӕст кӕнгӕйӕ. Ӕххӕссы ӕнӕниздзинад хъахъхъӕнынадыл, культурӕ, ахуырад, спорт, коммуналон ӕмӕ транспортон инфраструктурӕ, доны хӕдзарады комплекс ӕмӕ социалон хъахъхъӕнынадыл. Ӕдӕппӕтӕй йын бахъӕудзӕн 9,4 миллиард сомы, уыдонӕй 8,8 миллиард сомы сты федералон бюджетӕй, республикон бюджет та радих кӕндзӕн 652 милуан сомы.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here