Хъуыстгонд оркестр — Уӕрӕсейы

0
83

Сабырдзинады дунеон оркестр арӕзт ӕрцыд 1995 азы Женевӕйы. Йӕ саразӕг уыд зындгонд бритайнаг дирижер Георг ШОЛТИ. 1997 азӕй фӕстӕмӕ оркестры разамонӕг у ГЕРГИТЫ Валери. 2003 азы ацы хъуыстгонд коллектив концерттимӕ уыд Бетъырбухы 300 азы сӕххӕсты фӕдыл ӕмӕ Мӕскуыйы Куадзӕны фестивалы.

Ацы хатт оркестры концерттӕ уыдысты Бетъырбухы Марияйы номыл театры концертон залы ӕмӕ Мӕскуыйы ног концертон зал «Зарядье»-йы. 30 бӕстӕйы музыканттӕ ацагътой хъуыстгонддӕр музыкалон уацмыстӕ — Людвиг Ван Бетховены «ӕхсӕзӕм симфони» ӕмӕ Франц Шуберты «Фарӕстӕм симфони».

Ахӕм интернационалон коллективты иумӕйаг концерттӕн сӕ нысан у ӕппӕт дунейы цӕрӕг адӕмӕн, уӕлдайдӕр та политиктӕн равдисын, кӕрӕдзиимӕ хӕларӕй цӕрынӕй хуыздӕр кӕй ницы ис, уый.

Сабырдзинады дунеон оркестрӕн йӕ саразынӕн уыд ӕфсон — уыцы аз Иугонд Нациты Организацийыл ӕххӕст кодта 50 азы. Йӕ нысан та у музыкӕ, аивады фӕрцы адӕмы иу кӕнын, ахуыр сӕ кӕнын кӕрӕдзи хъусын ӕмӕ ӕмбарыныл, кӕрӕдзиимӕ ныхас кӕныныл. Йӕ ном дӕр уымӕн афтӕ у — «Сабырдзинады дунеон оркестр».

«Ӕппӕтдунейы дӕр политиктӕй музыкӕнттӕ сты фылдӕр сӕ нымӕцмӕ гӕсгӕ, ӕмӕ ӕххӕст кӕнынц ахсджиагдӕр ӕмӕ бӕрзонддӕр нысан — иу кӕнынц зӕххы къорийыл цӕрӕг адӕмы. Хорздзинад, фӕлмӕнзӕрдӕдзинад дунейыл тауынӕн музыкӕ у стыр ахъаз, — зӕгъы Гергиты Валери.

Сабырдзинады дунеон оркестры бындурӕвӕрӕг Шолти куы амард, уӕд коллективы сӕргъы ӕрлӕууыны куырдиатимӕ Гергиты Валеримӕ бахатыд оркестры директор, зындгонд музыкант Чарльз Кей. Уӕдӕй фӕстӕмӕ Гергийы-фырт коллективӕн у йӕ разамонӕг, ӕмӕ ӕрбамбырд кӕны музыкантты, дунеон ӕхсӕнады исты зындгонд цӕу куы ӕрцӕуы, уӕд.

Сабырдзинады дунеон оркестры уӕнгтӕ иудадзыгдӕр кӕнынц ивгӕ, оркестрӕн нӕй нӕдӕр йӕхи офис, нӕдӕр администраци. Дунейы алы бӕстӕты музыканттӕ — Вьетнамӕй Америкӕмӕ ног музыкалон проект сӕххӕст кӕныны фӕдыл баиу вӕййынц, саразынц репетицитӕ ӕмӕ адӕмы размӕ рацӕуынц ног программӕимӕ. Уыимӕ, сценӕйыл музыканттӕ ӕвдисынц ӕмхуызондзинады принцип: концерты рӕстӕг, алыхуызон партитурӕтӕ цӕгъдгӕйӕ, сӕ бынӕттӕ ивынц — дирижеры пультмӕ хӕстӕгдӕр уӕд сӕ иу ӕрбабады, уӕд — иннӕ. Гергиты Валери куыд зӕгъы, афтӕмӕй оркестрмӕ кӕй ӕрбахонынц, уыцы музыкантты ӕвзарынц ӕрмӕстдӕр иунӕг принципмӕ — сӕ дӕсныйадмӕ гӕсгӕ.

Мӕскуы ӕмӕ Бетъырбухы чи уыд, уыцы концертты архайдтой 30 бӕстӕйы музыканттӕ, уыдонӕй 18 — Уӕрӕсейӕ. «Бетховен кӕнӕ Шуберты ӕвзаг тӕлмац кӕнын нӕ хъӕуы, ацы генитӕ цы уацмыстӕ ныффыстой, уыдоны ис, ӕппӕт музыкантты дӕр иу чи кӕны, ахӕм егъау тых ӕмӕ хъару. Оркестримӕ ныр кусын 22-23 азы, ӕмӕ йӕ музыканттимӕ ӕрзылдыстӕм дунейы бирӕ бӕстӕтыл» — зӕгъы Гергиты Валери.

Ног аз та Сабырдзинады дунеон оркестр равдисдзӕн концерт Нью-Йорчы хъуыстгонддӕр зал Карнеги-холлы.

Иринӕ Муравьева

ОСТАВЬТЕ ОТВЕТ

Please enter your comment!
Please enter your name here