Адӕммӕ — ӕввахсдӕр

0
28

Ацы азы райдайӕны РЦИ-Аланийы Сӕргълӕууӕг Битарты Вячеславы хъӕппӕрисӕй республикӕйы арӕзт ӕрцыд ӕхсӕнадон ӕххуысгӕнджыты совет ӕмӕ уӕдӕй фӕстӕмӕ ахсджиаг рахӕцӕн ссис адӕм ӕмӕ хицаудзинады ӕхсӕн ныхас банывыл кӕнынӕн. Уымӕй уӕлдай ныридӕгӕн йӕ архайд хорзӕрдӕм фӕзынд ӕхсӕнадон цардыл, ӕмӕ йӕ бӕрӕггӕнӕнтӕ цавӕр сты, ӕхсӕнадон институты куыст цы ӕууӕлты цӕуы, уыдӕтты фӕдыл нӕ ӕхсӕнадон уацхӕссӕг ныхас кӕны РЦИ-Аланийы Сӕргълӕууӕджы ӕхсӕнадон ӕххуысгӕнджыты советы уӕнг Хъантемыраты Олегимӕ:

— Нырма чысыл рӕстӕг кусут, фӕлӕ ныридӕгӕн цавӕр ӕнтыстдзинӕдтӕ бафтыд уӕ къухы?

— Ӕхсӕнадон ӕххуысгӕнджыты совет, йӕ сӕрдар Таучелаты Константины хъӕддых архайды руаджы, стыр куыст кӕны нӕ республикӕйы граждӕнты царды бирӕ къабӕзты. Зӕгъӕм, лыг кӕнын нӕ бахъуыд ӕнӕниздзинад хъахъхъӕнынады, царды хӕрзхъӕддзинад фӕхуыздӕр кӕныны, куысты лӕуды ӕмӕ ӕндӕр фарстытӕ. Иу ныхасӕй, советы куыст ӕрцахста республикӕйы ӕппӕт  фӕзуат. Фӕбӕрӕг кӕнын та мӕ фӕнды ӕхсӕнадон ӕххуысгӕнджыты советы сӕрдары хӕдивӕг ӕмӕ Дзӕуджыхъӕуы координатор Владимир Орловы ӕвӕллайгӕ фӕллой. Сӕ хайӕдты бӕрнонӕй кусынц Цӕгат Ирыстоны районты координатортӕ дӕр. Уыдон сты: Хъесаты Ирбег — Ӕрыдоны, Дзасохты Руслан — Алагиры, Бестауты Сослан — Рахизфарсы, Коцойты Владимир — Кировы, Бабочиты Мӕхӕмӕт — ӕрӕфы, Дӕгуты Лолитӕ — Дыгуры ӕмӕ Гуцаты Фридон — Мӕздӕджы районы.

— Олег, зӕгъ-ма, ӕхсӕнадон ӕххуысгӕнджыты советы ӕмархайд куыд цӕуы Дзӕуджыхъӕуы ӕмӕ районты цӕрджытимӕ?

— Республикӕйы ӕппӕт районты, стӕй горӕт Дзӕуджыхъӕуы дӕр граждӕнты ӕмбырдтӕ арӕзт ӕрцыдысты. Уыдон кӕнын бахъуыд куыд хибарӕй, афтӕ районты ӕмӕ Дзӕуджыхъӕуы бынӕттон хиуынаффӕйады администрацитимӕ дӕр. Ӕмбырдты арӕзт ӕрцыдысты кусӕг къордтӕ районты ӕмӕ цӕрӕнбынӕтты цӕрджытӕй, ӕмӕ уый руаджы гӕнӕн фӕцис граждӕнты ӕмархайдӕн ӕхсӕнадон ӕххуысгӕнджыты советимӕ. Уымӕй уӕлдай арӕзт ӕрцыдысты, горӕт ӕмӕ республикӕйы цӕрджытӕ цы фӕдзӕхстытӕ балӕвӕрдтой, уыдон сӕххӕст кӕныны мадзӕлтты пълантӕ дӕр.

Нӕ размӕ ӕвӕрд фарстытӕ алыг кӕныны тыххӕй ӕхсӕнадон ӕххуысгӕнджыты совет хъӕддых ӕмархайд кӕны Дзӕуджыхъӕуы, районты ӕмӕ цӕрӕнбынӕтты администрацитимӕ, стӕй ӕппӕт министрадтӕ ӕмӕ ведомствӕты разамындимӕ дӕр.

— Ӕхсӕнадон ӕххуысгӕнджыты совет ма цавӕр куысты хуызтӕй пайда кӕны цӕрджытимӕ?

— Граждӕнты ӕмбырдты цы фарстытӕ фӕзыны, уыдонӕй уӕлдай ӕхсӕнадон ӕххуысгӕнджыты совет фембӕлдтытӕ арӕзта граждӕнтимӕ, куыста, адӕм хицӕнӕй кӕнӕ та иумӕ цы фыст куырдиӕттӕ балӕвӕрдтой, уыдон алыг кӕныныл. Ӕдӕппӕт райстам 1000 хисӕрмагонд куырдиаты ӕмӕ граждӕнты 250 фыстӕджы. Адоны фӕдыл архайд цыдис, ӕмӕ нӕ ӕрвитын бахъуыд 150 сӕрмагонд фыстӕджы ӕмӕ домӕны, цӕмӕй закъонад хъуыдыгонд цӕуа ӕмӕ граждӕнты царды хӕрзхъӕддзинад хуыздӕр кӕна. Республикӕйы цӕрджытӕн совет цы ӕххуыс кодта, уый та уыд алывӕрсыг. Ӕмбӕлгӕ хуызы лыггонд цыдысты цӕрӕнуӕтты-коммуналон  хӕдзарады, ахуырады системӕйы, граждӕнты цардыуаджы, рухс ӕмӕ хъарм кӕныны, материалон ӕххуысы, социалон фӕрныгады, стӕй консультацион фарстытӕ закъонад ӕмӕ барадуагӕвӕрды къабазы.

Нӕ куысты нын ахъаззаджы ӕххуыс кӕны РЦИ-Аланийы Сӕргълӕууӕджы ӕмӕ Хицауады администрацийы мидполитикӕйы управлени. Уымӕй уӕлдай ӕппӕт министрадтӕ ӕмӕ ведомствӕтӕ, бынӕттон администрацитӕ кӕддӕриддӕр стыр ӕргом здӕхтой куырдиӕттӕм ӕмӕ ӕппӕт тыхтӕй дӕр архайдтой граждӕнты фарстытӕ лыг кӕныныл.

— Ӕхсӕнадон организацитимӕ ӕмгуыстад кӕнут?

— Граждӕнтимӕ куыстӕй уӕлдай ӕхсӕнадон ӕххуысгӕнджыты советӕн фӕдзӕхст ӕрцыд, цӕмӕй иумӕйаг мадзӕлттӕ аразӕм нӕ республикӕйы ӕхсӕнадон организацитимӕ, ӕмӕ нӕ уый дӕр рохуаты нӕ баззад. Хорз ахастдзинӕдтӕ нын ис ӕппӕтуӕрӕсеон адӕмон фронтимӕ, республикӕйы ӕхсӕнадон палатӕимӕ, ӕппӕтдунеон ӕхсӕнадон змӕлд «Иры Стыр Ныхас» ӕмӕ республикӕйы национ-культурон ӕхсӕнӕдтимӕ. Ацы организацитимӕ баныхас кодтам, цӕмӕй сӕ минӕвӕрттӕ хаст ӕрцӕуой ӕхсӕнадон ӕххуысгӕнджыты советы скондмӕ.

Нӕ советы уӕнгтӕ сты алы дӕсныйӕдты адӕм: фермертӕ, аразджытӕ, цӕрӕнуӕтты-коммуналон хӕдзарады специалисттӕ, ӕхсӕнадон архайджытӕ, ахуыргӕнджытӕ, барадхъахъхъӕнынадон оргӕнты раздӕры кусджытӕ ӕмӕ бизнес-ӕмӕхсӕнӕдты минӕвӕрттӕ. Фӕнды мӕ зӕгъын: советы скондмӕ бацӕуыны тыххӕй нӕм арӕхӕй-арӕхдӕр куырдиӕттӕ бадӕттынц разамонӕг кусджытӕ, культурӕйы архайджытӕ, интеллигенцийы ӕмӕ наукон ӕмӕхсӕнады минӕвӕрттӕ.

— Куыд зонӕм, афтӕмӕй ӕхсӕнадон ӕххуысгӕнджыты совет ӕнувыдӕй архайы республикӕйы ӕхсӕнадон царды дӕр.

— Республикӕйы ӕхсӕнадон палатӕ ӕмӕ Адӕмон фронтимӕ мах сӕрды мӕйты бӕрӕг кодтам, Цӕгат Ирыстоны иумӕйагахуырады 40 скъолайы ног ахуыры азмӕ куыд цӕттӕ уыдысты, уый. Уымӕй уӕлдай мӕ фӕбӕрӕг кӕнын фӕнды: нӕ республикӕйы Сӕргълӕууӕджы фӕдзӕхстмӕ гӕсгӕ ӕрӕджы цы ӕвзӕрстытӕ ацыд, уыдоны агъоммӕ мах бабӕрӕг кодтам 120 ӕвзарӕн хайады. Советы куысты ӕппӕт рӕстӕджы телеравдыстыты, газетты ӕрмӕджыты дзырдтам нӕ архайды тыххӕй. Ныртӕккӕ дӕр газет «Северная Осетия»-йы рӕстӕгӕй-рӕстӕгмӕ мыхуыргонд цӕуы нӕ комкоммӕ бастдзинады телефон. Димитровы уынджы 2-аг бӕстыхайы та нын цы офис ис, уым нӕ кусджытӕ ӕрвылбон ӕмбӕлынц граждӕнтимӕ.

— Цавӕр фыццаградон хӕстӕ лӕууы ныртӕккӕ советы размӕ?

— Граждӕнтӕ нӕм цы бирӕ фарстытимӕ ӕрхатынц, уыдон фылдӕр хатт бӕлвырд аххосӕгтӕм гӕсгӕ алыг кӕнӕн нӕ вӕййы, уӕлдайдӕр республикӕйы районты. Уымӕ гӕсгӕ мах фӕнды радон мадзӕлттӕ саразын республикӕйы Сӕргълӕууӕджы архайдӕй. Ацы хатт ныхас цӕудзӕн бынӕттон хиуынаффӕйады администрацитимӕ, стӕй министрадтӕ ӕмӕ ведомствӕтимӕ ӕмархайды хӕрзхъӕддзинад фӕхуыздӕр кӕныныл.

Кӕронбӕттӕны мӕ арфӕ ракӕнын фӕнды РЦИ-Аланийы Сӕргълӕууӕг Битарты Вячеславӕн йе ‘ууӕнк ӕмӕ ӕххуысы тыххӕй. Бузныг зӕгъын Мидполитикӕйы управленийы разамындӕн дӕр йӕ пайдайаг ӕмгуыстады фӕдыл. Ӕз фидарӕй зӕгъын: нырӕй фӕстӕмӕ дӕр ӕхсӕнадон ӕххуысгӕнджыты совет ӕппӕт тыхтӕй дӕр архайдзӕн нӕ республикӕйы цӕрджыты социалон фӕрныгад хуыздӕр кӕныныл.

Ныхас кодта Джиоты Аленӕ

ОСТАВЬТЕ ОТВЕТ

Please enter your comment!
Please enter your name here