Бӕрӕгбоны кадӕн — паддзахадон хӕрзиуджытӕ

0
22

Адӕмы иудзинады бӕрӕгбоны кадӕн Цӕгат Ирыстоны зындгонддӕр ӕмӕ фӕлтӕрдджындӕр адӕймӕгтӕ республикӕйы Сӕргълӕууӕг Битарты Вячеславы къухӕй райстой паддзахадон хӕрзиуджытӕ.

Национ музеймӕ уыцы бон цы кадджын уазджытӕ ӕрӕмбырд, уыдонӕн арфӕ кӕнгӕйӕ, Битарты Вячеслав куыд загъта, афтӕмӕй, ардӕм ӕрбацыдысты, ӕцӕгӕйдӕр, адӕмы иудзинад цы у, уый чи зоны, сӕ зонд, сӕ быхсондзинад, сӕ рӕстаг фӕллойы фӕрцы нӕ паддзахад фидар кӕнынмӕ стыр бавӕрӕн чи хӕссы, ахӕмтӕ. «Ахсджиаг паддзахадон бӕрӕгбоны фӕдыл уын арфӕ кӕнын, уый ӕрмӕст нӕ бирӕнацион бӕстӕйы историйы кады нысан нӕу, фӕлӕ ма нӕ иумӕйаг разыдзинад, кӕрӕдзи ӕмбарыны ӕмӕ ӕмуд уӕвыны фӕрӕз дӕр. Стыр бузныг уын уӕд, уӕ фӕллой, уӕ архайды тыххӕй, ӕнӕниз, амондджын ӕмӕ фӕрнджын ут!» — загъта республикӕйы Сӕргълӕууӕг.

Политикон ӕфхӕрдбаййафджыты цӕгатирыстойнаг ӕхсӕнадон хӕрзаудӕн ассоциаци «Номарӕн»-ы сӕрдар Зураты Ауызби Уӕрӕсейы Федерацийы Президенты Указӕй хорзӕхджын ӕрцыд «Фыдыбӕстӕйы раз сгуыхтдзинӕдты тыххӕй» дыккаг къӕпхӕны ордены майданӕй. Ветеранты змӕлды сгуыхтдзинӕдты, хӕстон-патриотон хъомыладмӕ стыр бавӕрӕны тыххӕй ма уыцы хӕрзиуӕг лӕвӕрд ӕрцыд ӕппӕтуӕрӕсеон ӕхсӕнадон организаци «Боевое братство»-йы разамонӕг Дзгойты Валери, Кӕсӕбиты Хъазыбег, Тыбылты Таймураз, Афганистаны ветеранты регионалон хайады сӕрдар Пхалӕгаты Сергейӕн.

Хъӕууон хӕдзарады рӕзты сгуыхтдзинӕдты ӕмӕ бирӕазыккон рӕстуд куысты тыххӕй «Уӕрӕсейы Федерацийы хъӕууон хӕдзарады сгуыхт кусӕджы» кадджын ном лӕвӕрд ӕрцыд холдинг «Мастер-Прайм. «Березка»-йы генералон директор Беккуызарты Ларисӕйӕн. Наукӕйы ахъаззаг архайды тыххӕй «Уӕрӕсейы Федерацийы сгуыхт ӕрхъуыдыгӕнӕджы» кадджын ном лӕвӕрд ӕрцыд Уӕрӕсейы наукӕты академийы дзӕуджыхъӕуккаг наукон центры кусӕг Владислав Заалишвилийӕн.

РЦИ-Аланийы Сӕргълӕууӕджы Указӕй нӕ республикӕйы раз сгуыхтдзинӕдты ӕмӕ Фыдыбӕстӕйы Стыр хӕсты Уӕлахизмӕ бавӕрӕны тыххӕй орден «Ирыстоны Намысӕн» лӕвӕрд ӕрцыд Гулуты Хизирӕн. Майдан «Ирыстоны Намысӕн»-ӕй хорзӕхджын ӕрцыдысты завод «Радуга»-йы кусӕг Юрий Василенко, кооператив «Заря»-йы комбайнер Анатолий Волошин, Буроны посты хайады постхӕссӕг Дзалаты Екатеринӕ, фысымуат «Амран Отель»-ы хицау Мӕрзойты Тамерлан ӕмӕ сӕдӕаздзыд педагогон фӕллойы ветеран Фидараты ӕхсар.

Журналистикӕйы стыр сгуыхтдзинӕдты ӕмӕ бирӕазыккон ӕнтыстджын архайды тыххӕй «РЦИ-Аланийы сгуыхт журналисты» кадджын ном лӕвӕрд ӕрцыд Хетӕгкаты Къостайы номыл паддзахадон университеты президент, академик Мӕхӕмӕтты Ахуырбегӕн.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here