Хид арӕзт ӕрцӕудзӕн

0
41

Ныртӕккӕ нӕ республикӕйы цы бирӕ арӕзтӕдтӕ цӕуы, уыдонӕн сӕ ахсджиагдӕртӕй иу у хиды арӕзтад ӕрыдоны цӕугӕдоны сӕрты Алагирмӕ бацӕуӕны. Уый райдыдта ацы аз 20 июны ӕмӕ хъуамӕ йӕ арӕзтадон куыстытӕ кӕронмӕ ахӕццӕ уой 2021 азы ноябры фӕстаг бонты. Хъӕугӕ та нӕ уымӕн бакодта, ӕмӕ ныртӕккӕ транспортон фӕрӕзтӕ кӕуылты цӕуынц, уыцы хид ӕрыдоны доны сӕрты базӕронд, стӕй нарӕг кӕй у, уымӕй уӕлдай дзуапп нал дӕтты хидты арӕзтады абоны домӕнтӕн дӕр.

Уымӕ гӕсгӕ ӕнӕххӕст бӕрнондзинады ӕхсӕнад «Роспроект»-ы кусджытӕ ног хиды арӕзтад сбӕрӕг кодтой зӕронд хидӕй чысыл уӕлдӕр, ӕмӕ йӕ дӕргъ фӕндагуадзӕнимӕ (путепровод) уыдзӕн 1 километр ӕмӕ 55 метры.

Мах фыццагдӕр бабӕрӕг кодтам, ацы объекты арӕзтад федералон фӕндаг «Дзӕуджыхъӕу-Алагир»-ы 33 километры ӕмӕ 500 метрыл куыд цӕуы, уый, ӕмӕ нӕ аразджыты ӕнӕкъуылымпы куыст дисы ӕфтыдта. Рӕстӕгӕй-рӕстӕгмӕ-иу «КамАЗ»-тӕ фӕзындысты ардӕм хуырӕйдзаг гуыффӕтимӕ. Куы-иу сӕ ӕркалдтой, уӕд та сӕ бульдозертӕ пырх кодтой фӕйнӕрдӕм, катоктӕй та ӕфсӕрст цыдысты метры бӕзнӕнӕй.

«Афтӕ фӕндагуадзӕн арӕзт цӕуы фӕлтӕрӕй-фӕлтӕрмӕ, цӕмӕй фидар уа ӕмӕ ма фефсӕра, арӕзт куы фӕуа, уӕд, — загъта ӕнӕххӕст бӕрнондзинады ӕхсӕнад «Хуссайраг арӕзтадон компани»-йы хайады хицау Безанты Тамерлан, стӕй бафиппайдта: — Ныронг нӕма бавнӕлдтам ацы объекты райдайӕны арӕзтадмӕ, ауылты Уӕллаг Бирӕгъзӕнгмӕ электронтыхдӕттӕн лини кӕй цӕуы, уый тыххӕй. Ӕндӕр ранмӕ хаст куы ‘рцӕуа, уӕд бавналдзыстӕм ацы куыстмӕ дӕр. Цӕугӕдон ӕрыдоны рахизфарс ногӕй аразын бахъуыд донуадзӕнты ӕмӕ газы хӕтӕлты хызтӕ дӕр, ӕмӕ нӕ куыст ницӕмӕй бакъуылымпы.

Дарддӕр мах уыдыстӕм, Алагирӕй Уӕллаг Бирӕгъзӕнгмӕ цы фӕндаг цӕуы, уый сӕрты цы фӕндагуадзӕн арӕзт цӕуы, уым. Ныр дӕр мах хъусӕм Безанты Тамерланы бӕлвырд ныхасмӕ. Куыд радзырдта, афтӕмӕй фӕндагуадзӕн кӕуыл ӕнцайы, уыцы ӕфсӕн-бетон цӕджындзтӕ 12 метры сты зӕххы бын, сӕ бӕрзӕнд та у 5 метры. Хайады хицау куыд загъта, афтӕмӕй кӕрӕтты ӕхгӕд ӕрцӕудзысты, сӕ дӕргъ 12 метры кӕмӕн у, ахӕм ӕфсӕн-бетон къӕйтӕй, астӕуӕй та уыдон уыдзысты 24 метры. Ам бетонгӕнӕн ӕмӕ ӕндӕр куыстытӕ кӕнгӕ кӕй баййӕфтам, уыдон та уыдысты Виталий Неведомый, Андрей Степанов, Денис Гришко ӕмӕ Вадим Бондаренко.

Ныртӕккӕ рапарахат сты хиды арӕзтады ӕндӕр хицӕн куыстытӕ дӕр. Зӕгъӕм, дзыхъхъытӕ къахт цӕуы ацы объекты могортӕн. Хъуамӕ ӕнцайӕн цӕджындзтӕ донвӕды фидаргонд ӕрцӕуой 20 метры ӕрфӕн, сӕ алыварс та уыдзӕн арматурӕ ӕмӕ сӕ цыфӕнды донивылдтытӕ дӕр нӕ бахъыгдардзысты.

Ацы куыстытӕ ӕххӕст кӕны ӕндӕр дзӕуджыхъӕуккаг фирмӕ — ӕнӕххӕст бӕрнондзинады ӕхсӕнад «Ирстройинвест»-ы аразджытӕ. Йӕ сӕйраг инженер Тыбылты Леуан куыд радзырдта, афтӕмӕй хицӕн бынаты аразын бахъуыд, хиды арӕзтадӕн каркастӕ, ӕндӕр ӕфсӕйнаг хӕйттӕ чи араздзӕн, ахӕм цех. Арӕзтадон фӕзы алыхуызон архайдыл хӕст сты кусӕг дӕсныйӕдты дӕсгай минӕвӕрттӕ, ӕмӕ сӕ иумӕйаг фӕнд куыд у, афтӕмӕй хиды арӕзтад ӕрыдоны доны сӕрты кӕронмӕ ахӕццӕ кӕндзысты пълангонд ӕмгъуыдтӕй раздӕр.

Тохсырты Къоста

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here