Нӕ фидӕныл сагъӕс

0
39

Зӕрдӕ рисӕй куы нынкъуысы, уӕд, дам, куырм цӕстӕй дӕр цӕссыг ӕркӕлы. Зӕрдӕ та уыцы рисӕй хъӕдгом кӕны. Хъӕдгом сты, нӕ ирон адӕмы фидӕныл ма арф чи хъуыды кӕны ӕмӕ йыл кӕй уд риссы, уыдоны зӕрдӕтӕ. Нӕ уавӕрыл ма суанг ЮНЕСКО дӕр сагъӕс кӕны: ирон ӕвзаг банымадта, фесӕфынӕй тӕссаг кӕмӕн у, уыцы ӕвзӕгтимӕ, ӕмӕ архайы, цӕмӕй ма фесӕфа, ууыл: хъуыддагӕй ӕххуыс кӕны, сиды нӕм, уӕхи ӕрӕмбарут, зӕгъгӕ. Ӕмӕ ам, Ирыстоны, нӕ ахуыргӕндтӕ, разамонӕг оргӕнты кусджытӕ ӕмбырдтӕ аразынц: ирон ӕвзаджы хъысмӕтыл хъӕддых ӕмӕ разӕнгардӕй даргъ ӕмӕ уӕрӕх ныхас кӕнынц уырыссагау. Газетты мыхуырӕй цӕуынц егъау уацтӕ уырыссагау. О, уырыссагау! Кӕнӕ уырыссаг ӕвзагӕй ирон ӕвзагмӕ тӕлмацӕй. Уымӕн ӕмӕ сӕ зондджын ӕмӕ куырыхон хъуыдытӕ сӕ мадӕлон ӕвзагыл зӕгъын нӕ фӕразынц. Афтӕмӕй йын йӕ хъысмӕт лыг кӕнынц! Аллайаг ӕмӕ кӕуинаг! Бирӕгъы, дам, мӕрдгӕс баурӕдтой. Уый ирон ӕвзагӕн сусӕг-ӕргом, зонгӕ-нӕ зонгӕ, ӕмбаргӕ-ӕнӕмбаргӕ сӕ архайд ӕмӕ цардыуагӕй йӕ къубалыл чи хӕцы ӕмӕ йӕ хуыдуг чи кӕны, сӕхӕдӕг уыдонӕй куы сты. Уӕд ын йӕ хъысмӕт уыдоны бар чи бакодта, ӕмӕ йӕ куыд ӕмӕ кӕцырдӕм хъуамӕ алыг кӕной?

Нӕ телеуынынады алы каналтӕ дӕр уырыссагау тынг сагъӕс кӕнынц ирон ӕвзаджы хъысмӕтыл, нӕ ирон ӕгъдӕутты уавӕрыл. Ӕвзаг ӕмӕ ӕгъдӕуттӕ дӕр сты ирон адӕмы, ӕмӕ сын сӕ ахсджиаг фарстытӕ иннӕ адӕмты рӕгъмӕ цӕмӕн хӕссут? Цӕмӕн сӕ хъӕуынц? Ирон уӕвгӕйӕ, иронау чи нал дзуры, уыдоны дӕр нал хъӕуынц. Искуыдӕр ма бинонты лыггӕнинаг фарстытӕ сыхбӕстӕм, хъӕубӕстӕм хӕсгӕ уыдысты. Ирон ӕвзаджы            хъысмӕт, ӕгъдӕутты аивдзинад ис, иронау ма чи дзуры, уыдоны къухты. Ӕмӕ уыдоны базмӕлын хъӕуы, ЮНЕСКО-йы, стӕй ӕндӕр ӕххуыстӕ, фӕрӕзтӕ дӕр, зӕрдӕйӕ йыл чи риссы,  хъуыддаг чи сараздзӕн,  уыдонӕн хъуамӕ кӕниккой. Ӕндӕр ирон ӕмбисондау: куыдзы гуыбыны — хъуыррытт.

Телеуынынады дӕр фарстыл биноныг нӕ  ахъуыды кӕнынц ӕмӕ ныхас раст фӕндагыл нӕ саразынц. Абоны онг нӕма равзӕрстой, ЮНЕСКО ирон ӕвзаг сӕфтыл банымадта, ӕви йӕ, фесӕфынӕй тӕссаг кӕмӕн у, уыдоны номхыгъдмӕ бахаста. Ӕмӕ тутиау алы каналтыл фӕлхат кӕнынц: «ЮНЕСКО ирон ӕвзаг сӕфтыл банымадта». Тобӕ, тобӕ! Хуыцау бахизӕд! Нырма ирон адӕм иронау, дыгуронау, къуыдайрагау, чысайнагау дзурынц. Газеттӕ, журналтӕ, ахуыргӕнӕн ӕмӕ ӕндӕр чингуытӕ нӕм иронау цӕуы, скъолайы, уӕлдӕр ахуыргӕнӕндӕтты йӕ ахуыр кӕнынц. Ӕмӕ цӕмӕй йӕ уавӕр фӕхуыздӕр уа, ууыл кусын хъӕуы ӕппӕт хъарутӕ ӕмӕ фӕрӕзтӕй. Хъарӕг ыл кӕнын ныууадзӕм.

Цалдӕр азы размӕ «Рӕстдзинад»-ы мыхуыргонд ӕрцыд Ирыстоны адӕммӕ, ирон ныййарджытӕм Дзӕуджыхъӕуы 42-ӕм скъолайы разамонӕг Дзагуырты Фатимӕ ӕмӕ йӕ ахуыргӕнджыты сидт ирон ӕвзаджы хъысмӕты фӕдыл. Уыдон фӕдис хъӕр кӕнгӕ фыстой: «Ивгъуыд аз нӕ телеуынынадӕй дзырдтой ӕнахуыр ныхӕстӕ, зӕгъгӕ, дам, ЮНЕСКО-йы бӕрӕггӕнӕнтӕм гӕсгӕ, ирон ӕвзаг хауы, чи сӕфы, уыдонмӕ. Уый та куыд?! Ирыстон ис, наци ис, ирон ӕвзаг ис, уӕд хъуамӕ куыд фесӕфа?! ӕви, ирон ныййарджытӕн цы сывӕллӕттӕ гуыры, уыдон ирӕттӕ не сты ӕмӕ ирон ӕвзагыл нал дзурдзысты?!

Мах, скъолайы кусгӕйӕ, ахуыргӕнджытӕ уӕвгӕйӕ, ӕмбарӕм: уыцы ныхӕсты, хъыгагӕн, кӕй ис рӕстдзинад».

Ӕмӕ йын йӕ аххосӕгтӕ ӕргом кӕнынц. Фӕлӕ сидты фӕдыл газетмӕ иу ӕрмӕг дӕр не ‘рбацыд, раст ӕй цыма Ахуырад ӕмӕ наукӕйы министрады, горӕтты ӕмӕ районты ахуыры хайӕдты, ирон ӕвзаг ӕмӕ литературӕйы ахуыргӕнджытӕй ничи бакаст, уыйау. Кӕлӕнгонды хуызӕн стӕм, цы нӕ хъӕуы, уый дӕр нал хатӕм. Куыдфӕндыйы зӕрдӕйыуаг нӕ хӕры къуыдилыйау. Ӕнӕ уый дӕр куыдфӕндыйы зӕрдӕйыуаг рак-къуыдилы хонынц. Ӕндӕр ацы сидт йӕ фӕдыл хъуыдытӕ куыд нӕ расайдта, йӕ фарсмӕ куыд ничи балӕууыд.

Кӕсӕгты ӕхсӕн иу мыггаг ис, ӕмӕ йӕ лӕппынтыл хӕрынӕй нӕ ауӕрды. Ирӕттӕ йӕ хонынц хихор кӕсаг. Уырыссӕгтӕ та — щука. Мах, ирон адӕм, дӕр хихортӕ стӕм, ӕрмӕст ацы кӕсагау нӕ цотӕн сӕхи нӕ хӕрӕм, фӕлӕ сӕ фидӕн. Абоны куыдфӕндыйы зӕрдӕйыуаг афтӕ куы ахӕсса, ӕмӕ мах куы нал уӕм, уӕд нӕ фӕстагӕттӕн, чи сты, кӕмӕй, кӕцӕй сты, уый равдисын сӕ фадат нал амондзӕн. Уымӕн ӕмӕ иронау дзурын, кӕсын, фыссын нӕ зондзысты. Раст венгриаг ястау. Ӕмӕ сын  азимаг, ӕлгъыстаг фӕуыдзыстӕм, уыдонӕн сӕ фыдӕлтыл сӕ зӕрдӕ куыд худы, афтӕ. Уӕд та ацы хъуыддаджы нӕ  сыхӕгты уӕддӕр куы бафӕзмиккам. Уыдонау фидар куы фӕлӕууиккам не ‘взаджы, не ‘гъдауы ӕнцой, сӕфынӕй сын тӕссаг куыд нал уа, афтӕ.

Махӕн уӕлӕ англисаг къарол Артур дӕр ничи у. Уый у, стыр ӕмӕ фидар паддзахад кӕмӕн сарӕзта, уыдоны. Ничи нын сты, европӕйаг хъӕздыг паддзахӕдты цӕргӕйӕ, йӕ мадӕлон-скифаг, сӕрмӕтаг, алайнаг ӕвзаг чи ферох кодта, уыдон дӕр. Махӕн хъуамӕ зӕдау табуйаг уой, синтой Тимуры фыдгӕнды фӕстӕ ма хӕхты цъассыты фыдцарды уавӕрты нӕ ариаг-алайнаг-ирон рӕсугъд ӕмӕ фӕрӕзджын ӕвзаг, Нарты кадджытӕ, Даредзанты таурӕгътӕ, Царциаты диссӕгтӕ, алӕмӕты аргъӕуттӕ, цардзонӕн ӕмӕ дунембарӕн ӕмбисӕндтӕ фидӕны фӕлтӕртӕн чи бахъахъхъӕдта ӕмӕ сӕ мах онг радӕттын чи базыдта, уыцы хистӕр фӕлтӕртӕ. Уыдоны фарны раз стыр хӕс ӕвӕрд ис махыл: уыдоны сӕр хъуыды кӕнгӕйӕ, мах дӕр хъӕуы ахӕм лӕгдзинад ӕмӕ фидар зондахаст равдисын, хӕзнайау нӕм цыдӕриддӕр ралӕвӕрдтой, уый, нӕ фӕстӕ цы фӕлтӕртӕ цӕуы, уыдонмӕ адӕттын.

Кӕддӕр журнал «Знание — сила»-йы бакастӕн иу ахуыргонды уац. Уый куыд фыста, афтӕмӕй азербайджайнӕгтӕ дӕр ирайнаг адӕм уыдысты, фӕлӕ семӕ тюркаг адӕм ӕрцардысты, ӕмӕ, уыдоны уӕрдоны бадгӕйӕ, уыдоны зарӕг кӕнгӕйӕ, сӕхи та рох кодтой. Ӕмӕ, дам, ӕрцыд ахӕм рӕстӕг, хистӕртӕ ӕмӕ цоты цот кӕрӕдзи куы нал ӕмбӕрстой: хистӕртӕ сӕ фыдӕлты ӕвзаг — ирайнаг ӕвзагыл дзырдтой, цоты цот та — ӕрбайсгӕ тюркаг ӕвзагыл. Ӕмӕ сӕ цы рауад, уый абон нӕхи цӕстӕй уынӕм.

Уымӕ цӕуӕм, уымӕ тырнӕм мах дӕр! Абон горӕтты цӕрӕг ирӕтты кӕстӕртӕй бирӕтӕн иронау иу хъуыдыйад зӕгъын сӕ бон нӕу. Ӕмӕ хистӕртӕ семӕ ныхас кӕнынц цъӕррӕмыхст уырыссаг ӕвзагыл.

Зӕрдӕ риссы, зӕрдӕ хъӕдгом кӕны уыцы уавӕрӕй. Ӕвзаг зонын хорз у. Нӕ фыдӕлтӕ куы дзырдтой: «Адӕймаг цал ӕвзаджы зоны, уал лӕджы у». Фӕлӕ, фыццаджыдӕр, йӕхи ӕвзаг хъуамӕ зона, йӕ фыдӕлты раз ыл уыцы хӕс ӕвӕрд ис. Уыдоны фарнӕй фӕрнджын уӕд кӕны. Дӕ мадӕлон ӕвзаг, дӕ фыдӕлты аив ӕмӕ рӕсугъд ӕгъдӕуттӕй дӕхи, дӕ кӕстӕрты куы фӕиппӕрд кӕнай, уӕд ды чи дӕ, чи сты дӕ кӕстӕртӕ? Ничи. Ничи дӕ банымайдзӕн йӕхионыл. Иунӕг та мӕгуыр ӕмӕ ӕдых у.

Къӕбӕрыл, гуыбыныл ма ивӕм нӕ мадӕлон ӕвзаг, нӕ фыдӕлты фарн. Хӕдзӕрттӕ, заводтӕ, хи кусӕнуӕттӕ, галуантӕ ӕмӕ ӕндӕр ахӕм царды хъӕугӕ исбон, мулк ӕмӕ цӕрӕн фӕрӕзтӕ, титултӕ, хӕрзиуджытӕ абон нӕ къухтӕй куы ахауой, куы нал уой, уӕддӕр та сӕ адӕймаг йӕ зонд ӕмӕ хъаруйы фӕрцы ссардзӕн, сараздзӕн, скусын кӕндзӕн. Хуыцау бахизӕд, фӕлӕ, зӕгъӕм, ирон ӕвзаг нал ис, уӕд уымӕн ссарӕн, раздахӕн нал уыдзӕн. Историйы фӕлмы бын фӕуыдзӕн ӕвзаг, ӕмӕ йыл мингай азты цы адӕм дзырдтой, уыдон дӕр. Стыр хӕс ӕвӕрд ис абоны ирӕттыл, ӕмӕ сӕм уыцы хӕсы раз бӕрнондзинадмӕ сиды ЮНЕСКО. Махӕн нӕ фӕсонӕрхӕджы дӕр нӕй, не ‘взаджы, не ‘гъдӕутты ӕмӕ нӕ царды фӕткы Ираны, Таджикистаны ӕмӕ иннӕ бӕстӕты ирайнаг адӕмты ахуыргӕндтӕ сӕхи историон фӕд кӕй уынынц. Алы дин дӕр йӕхи кӕнонтӕ кӕны: пысылмон дин сын се ‘взаджы бирӕ дзырдтӕ, сӕ фыдӕлты царды  ӕгъдӕуттӕ ферох кӕнын кодта. Ӕмӕ сӕ махмӕ арынц.

Ирон ӕвзаг куы нӕ уаид, уӕд ирон адӕмӕн Фӕскавказы паддзахад нӕ уаид, Цӕгат Кавказы та — республикӕ. Нӕ уаид Хуссары Президент, Цӕгаты — республикӕйы Сӕргълӕууӕг, парламенттӕ, хицауӕдты министрадтӕ. Цӕгат Ирыстоны зӕхх ӕмӕ цӕрӕг адӕм  Стъараполы крайы иу егъау районы бӕрц сты, ӕмӕ мах дӕр район уаиккам. Ӕмӕ  ууыл дӕр арф нӕ хъуыды кӕнынц, бынатмӕ чи бахауы, уыцы чиновниктӕ. Уыцы бӕрнон бынӕттӕ сӕм цы адӕмы, ӕвзаджы фӕрцы ӕрхаудтой, уыдонӕн фаг аргъ нӕ кӕнынц. Цы къалиуыл бады, уый лыг кӕны, зонгӕ-зонын. Раст цыма афтӕ хъуыды кӕны, мӕ фӕстӕ Ирыстоны кӕрдӕг дӕр мауал зайӕд.

Ирон ӕвзаг сидзӕр сӕныччы уавӕры ис. Дзыгы-дзыгыгӕнджытӕ йын бирӕ ис, гӕды узӕлдтытӕ йыл кӕнынц. Уый та хъӕуы мады ӕхсыр, цӕмӕй йе уӕнгты ахъара ӕмӕ сӕ фӕйнӕрдӕм аиваза. Ӕхсырӕй та йӕ кӕнӕм ӕрмӕст хъуыртхъом. Афтӕмӕй йӕ къӕхтыл никуы слӕудзӕн, ӕмӕ уалдзыгон стурау хаудӕй хуысдзӕн.

Раст зӕгъгӕйӕ, афӕстаг рӕстӕг зӕрдӕмӕ цыдӕр ныфсы рухсы цъыртт ныккӕсы, республикӕйы ныры Сӕргълӕууӕг Битарты Вячеслав ирон ӕвзаджы хъысмӕтмӕ йе ‘ргом куыд аздӕхта, уымӕй. Ӕрмӕст Алайнаг гимназы байгом дӕр кӕуылты у! Уӕдӕ телеуынынад «Осетия-Ирыстон»-ы фӕрцы ирон телеравдыстытӕ кӕй фӕфылдӕр сты, ӕхсӕнадон змӕлд «Иудзинад» Мӕрзойты Тамерланы разамындӕй ӕрвылаз районты, стӕй та республикӕйы рӕзгӕ фӕлтӕрӕн — скъоладзаутӕн — ирон ӕвзаг, литературӕ, ӕгъдӕуттӕ ӕмӕ культурӕ зонынӕй цы ӕркаст-конкурс расиды, уый «Ирон дӕн ӕз»-ӕй зӕрдӕ куыд нӕ райа. Ӕркаст-конкурсы ӕрмӕст скъоладзаутӕ нӕ фӕархайынц, фӕлӕ ма фӕсаууонмӕ сӕ ахуыргӕнджытӕ ӕмӕ сӕ ныййарджытӕ дӕр. Уый йын йӕ нысан кӕны парахатдӕр ӕмӕ ахадгӕдӕр.

Хъӕугӕ хъуыддаг у ирон ӕвзаг ӕмӕ литературӕйы ахуыргӕнджыты республикон ӕрвылазон ӕркаст-конкурс дӕр. Уым сбӕрӕг вӕййынц хуыздӕртӕ. Уый пайдайаг у, чи дзы фӕархайы ӕрмӕст уыдоны дӕсныйад фӕхуыздӕр, фӕхъомысджындӕр кӕнынӕн нӕ, фӕлӕ сӕ алыварс иннӕ ахуыргӕнджытӕн дӕр. Фӕлӕ, хъыгагӕн, нырма се ‘хсӕн ис ирон ӕвзаг ӕмӕ литературӕйы уроктӕй «родной-пустой» чи аразы, ирон ӕвзаг рӕзгӕ фӕлтӕрӕн ӕнад чи кӕны, сӕ цӕсты сын ӕй чи ӕфтауы, куыдфӕндыйы зӕрдӕйыуагыл сӕ чи ахуыр кӕны. Ахӕмтӕ, стӕй йӕ цотмӕ иронау цы ирон мадӕлтӕ нӕ дзурынц, уыдон сты ирон ӕвзаджы цыфыддӕр знӕгтӕ. Ахӕмты тыххӕй хатт ирон ӕвзаг мадӕлон ӕвзаг рахонын дӕр зӕрдӕ нал фӕкомы.

Уырыс махӕн бирӕ цӕмӕйдӕрты бафӕзминаг сты. Уыдонӕн Уӕрӕсейы сӕ сылгоймӕгтӕ уырыссагмӕ нӕ, фӕлӕ цыфӕнды нацийӕ дӕр мой куы скӕнынц, уӕддӕр сӕ цотмӕ дзурынц уырыссагау. Махмӕ та… Махмӕ та фыд ӕмӕ мад дӕр — ирӕттӕ, афтӕмӕй сӕ цот, Ирыстоны цӕргӕйӕ, иронау дзурын дӕр нӕ зонынц. Мӕрдырох ӕфтауынц ирон ӕвзагыл сӕ мадӕлтӕ. Уымӕй стырдӕр фыдгӕнд ма цы уа дӕ раттӕг адӕмы историйы?!

Цгъойты Хазби

ОСТАВЬТЕ ОТВЕТ

Please enter your comment!
Please enter your name here