«Уӕрӕсейы хуссайраг дуӕрттӕ» — Дзӕуджыхъӕуы

0
19

Ныр фӕндзӕм хатт Ирыстон суазӕг кодта ӕппӕтадӕмон форум «Уӕрӕсейы хуссайраг дуӕрттӕ»-йы архайджыты. Форумы сӕйраг нысан у Астӕуккаг хурыскӕсӕн ӕмӕ Хуссар Кавказы паддзахӕдты, стӕй Уӕрӕсейы хуссайраг амалхъомты ‘хсӕн базарадон-экономикон ӕмгуыстад рапарахат кӕнын.

Йӕ саразджытӕ сты Уӕрӕсейы ӕмӕ РЦИ-Аланийы Экономикон райрӕзты министрадтӕ, Цӕгат Ирыстоны Базарадон-промышленнон палатӕ ӕмӕ Евроэкономикон цӕдис.

Азӕй-азмӕ фылдӕр кӕнынц форумы архайджытӕ. Ацы хатт нӕм саккаг кодтой делегацитӕ Иранӕй, Азербайджанӕй, Хуссар Ирыстонӕй, Цӕцӕн ӕмӕ Кӕсӕг-Балхъары республикӕтӕй, Хъӕрӕсе-Черкесийӕ ӕмӕ Дагестанӕй, Стъараполы крайӕ ӕмӕ Белоруссийӕ. Алкӕмӕн дӕр дзы уыдис ирыстойнаг амалхъом куыстуӕтты продукциимӕ базонгӕ уӕвыны фадат. Национ наукон библиотекӕйы бацӕуӕны ӕвдыст цыдысты хиконд хойраджы продукттӕ, уӕлӕдарӕс, сувениртӕ, арӕзтадон ӕмӕ бирӕ ӕндӕр ӕрмӕджытӕ. РЦИ-Аланийы Базарадон-промышленнон палатӕйы сӕрдар Тугъанты Хъазыбег ӕндӕр регионты минӕвӕрттимӕ ӕрзылд равдыстыл ӕмӕ цыбырӕй радзырдта алы куыстуаты тыххӕй дӕр.

Уазджытӕ йӕм цымыдисӕй байхъуыстой, стӕй ӕхсызгонӕй сахуыстой “Мастер-Прайм. Березка»-йы ӕхсыры продукцийӕ. Сӕ конд хойраг равдыстмӕ ӕрбаластой «Алания-продукт», «Фат-Агро», агрофирмӕ «Бавария». Ирыстон хъӕздыг у суардӕттӕй, фенӕн дзы уыд «Бухар-Дон», «Тиб» ӕмӕ ӕндӕртӕ.

Университеты ахуыргӕндтӕ наукӕйы бындурыл цы дзӕбӕхгӕнӕн ӕмӕ цайы кӕрдӕджытӕ цӕттӕ кӕнынц, уыдоныл дӕр уазджытӕ сӕ цӕст ӕрӕвӕрдтой.

Ирыстойнаг ӕрмдӕснытӕ аразынц аив куклатӕ, хӕцӕнгӕрзтӕ, хӕдзары дзаумӕттӕ. Алы ирд хуызтӕй ахуырст нымӕтӕй конд уӕлӕдарӕс кӕй зӕрдӕмӕ нӕ фӕцыд, ахӕм дзы нӕ разынд. Косметикӕ, хъармгӕнӕн системӕ ӕмӕ ӕндӕр цымыдисаг продукци фенӕн уыд равдысты.

Ӕмбырд байгом кодта ӕмӕ уазджытӕн арфӕ ракодта Тугъанты Хъазыбег.

— Абоны фембӕлдӕн стыр ахадындзинад ис, бизнесы куыст чи кӕны, уыдонӕн. Ног фембӕлдтытӕ ӕмӕ кӕрӕдзийы фӕлтӕрддзинад ахъаз уыдзысты ӕнтыстджын къахдзӕфтӕн. Цы бадзырдтӕ бафыссой, уыдон хорзӕрдӕм фӕзындзысты ӕндӕр паддзахӕдтимӕ базарадон-экономикон ахастдзинӕдтыл, — загъта Тугъаны-фырт.

— Арфӕ кӕнын нӕ кадджын уазджытӕн республикӕйы Сӕргълӕууӕг ӕмӕ Хицауады номӕй. Ӕхсызгон нын у, уӕ фембӕлды фӕзӕн Дзӕуджыхъӕу кӕй равзӕрстат, уый, — загъта РЦИ-Аланийы Хицауады Сӕрдары хӕдивӕг Фадзайты Ӕхсарбег. — Куыстхъом адӕм сӕ зонындзинӕдтӕ, сӕ арӕхстдзинад равдисдзысты, бирӕ республикӕты минӕвӕрттӕ ӕрныхас кӕндзысты хъуыддагыл, ног бастдзинӕдтӕ фӕзындзӕн уе ‘хсӕн. Хӕлар ахастдзинӕдтӕ та сты экономикон рӕзты бындур, фӕзындзӕн ног проекттӕ ӕмӕ уӕлӕмхасӕн куысты бынӕттӕ. Республикӕйы разамынд алывӕрсыг ӕххуыс кӕны амалхъом адӕмӕн, — загъта Фадзайты Ӕхсарбег.

РЦИ-Аланийы экономикӕйы министр Томайты Хъазыбег куыд загъта, афтӕмӕй ирыстойнаг делегаци ӕрӕджы хъуыддаджы фӕдыл бабӕрӕг кодта Ираны республикӕ, тынг сӕ сбуц кодтой ӕмӕ сын уый тыххӕй арфӕ ракодта.

— Аргъ кӕмӕн кӕныс, зӕрдӕмӕ хӕстӕг чи у, базар дӕр уыдонимӕ хуыздӕр уайы. Уымӕ гӕсгӕ, культурон ахастдзинӕдтӕй пайда кӕнгӕйӕ, нӕ кӕрӕдзимӕ фӕхӕстӕгдӕр уыдзыстӕм. Республикӕйы разамынд ӕмӕ нӕ министрад аразӕм ӕппӕт мадзӕлттӕ дӕр, цӕмӕй фидардӕр кӕной экономикон бастдзинӕдтӕ ӕндӕр регионтимӕ, саразӕм фембӕлдтытӕ, бизнес-мисситӕ, ӕндӕр бӕстӕтӕм ацӕуынӕн бастдзинӕдтӕ. Ӕнгом ӕмгуыстад нын ис экспорты уӕрӕсейаг центримӕ, — загъта министр.

Уазджытӕ бакастысты чысыл кинонывмӕ Ирыстоны тыххӕй.

Ӕмбырды ма раныхас кодтой Уӕрӕсейы Федерацийы Базарадон-промышленнон палатӕйы президенты уынаффӕгӕнӕг Георгий Петров, Цӕгат Ирыстоны таможняйы хицау Сергей Троцко, Цӕгат Кавказы, Ираны республикӕйы делегацийы сӕргълӕууӕг Фарнуш Мозафари ӕмӕ иннӕтӕ.

Фӕстӕдӕр форумы архайджытӕн сарӕзтой хицӕн ӕмбырдтӕ. Ныхас дзы цыд туризмы рӕзтыл, агропромышленнон нырыккон технологитыл ӕмӕ ӕндӕр фарстытыл.

Форумы архайджытӕ хатдзӕгтӕ скодтой сӕ куыстӕн, рахастой уынаффӕтӕ, бадзырдтӕ бафыстой сӕ фидӕны ӕмгуыстадӕн.

Гугкаты Жаннӕ

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here