Зӕххы фарст. Сӕнӕфсиры куыст. Социалон къабаз

0
17
????????????????????????????????????

«Хъӕууонхӕдзарадон нысаниуӕджы зӕххытӕ агропромышленнон комплексӕн сты йӕ сӕйраг фӕрӕзтӕ, раст ӕмӕ сӕ хуызӕнӕн пайдагонд куы нӕ цӕуа, уӕд хъӕууон хӕдзарад нӕ рӕздзӕн. Уӕрӕсейы Хъӕууон хӕдзарады министрады бӕрӕггӕнӕнтӕм гӕсгӕ, раздӕры колхозтӕ ӕмӕ совхозты зӕххытӕй Хуссайраг федералон зылды пайдагонд нӕ цӕуы 1,147 милуан гектарӕй», — Парламенты аграрон ӕмӕ зӕххы политикӕйы, экологи ӕмӕ ӕрдзон комитеты сӕрдар Тетцойты Георги знон, советы ӕмбырды, фӕбӕрӕг кодта цалдӕр ахсджиаг закъоны проекты.

Ӕмбырд амыдта Парламенты Сӕрдар Алексей Мачнев.

Тетцойы-фырт куыд бамбарын кодта, афтӕмӕй Астраханы облӕсты Думӕ нӕ бӕстӕйы уӕлдӕр закъонӕвӕрынадон оргӕнмӕ арвыста сидт — сӕ зӕрды ис хъӕууонхӕдзарадон нысаниуӕджы зӕххыты зилдухы тыххӕй закъон баххӕст кӕнын. Депутаттӕ куыд фыссынц, афтӕмӕй облӕсты 2019 азы райдайӕнӕй пайдагонд нӕ цӕуы 116,8 мин гектарӕй. Зӕхх куыстгонд кӕй нӕ цӕуы, уымӕй хӕмпӕлгӕрдӕджы бын фӕцис, йӕ хӕрзхъӕддзинад февзӕрдӕр ӕмӕ йӕ фӕстӕмӕ схъӕздыг кӕнын уыдзӕн зын.

Уӕрӕсейы Федерацийы «Хъӕууонхӕдзарадон нысаниуӕджы зӕххы зилдухы тыххӕй» закъон амоны, ӕнӕкуыстгонд зӕххы хӕйттимӕ куыд архайын хъӕуы, уый, ноджы цы цӕрӕнбынӕтты арӕнты сты, уыдоны ӕххӕстбартӕ дӕр. Фӕлӕ куыстгонд цы зӕхх нӕ цӕуы, уыдонӕй зӕххы ног хӕйттӕ саразыны хъуыддаг хорз не ‘нтысы, уымӕн ис алыхуызон аххосӕгтӕ. Депутаттӕ курынц, цӕмӕй уавӕр банывыл кӕныны ӕххӕстбартӕ хъӕуты разамындӕй раивой муниципалон районты ӕмвӕзадмӕ.

Советы уӕнгтӕ ацы хъӕппӕрисмӕ акастысты алыхуызон цӕстӕй, куыд райхъуыст, афтӕмӕй зӕххы фарст кӕддӕриддӕр тынг зын лыггӕнӕн уыдис. Уынаффӕ рахӕссыны, ома, астрахайнаг депутатты фарс рахӕцыны размӕ, сфӕнд кодтой ӕмбырд скӕнын, уырдӕм хъӕуты, районты разамонджыты, фермерты ӕрбахонын ӕмӕ сидтыл бӕстон ӕрныхас кӕнын.

Тетцойты Георги ма цы закъоны проекттыл ӕрныхас кодта, уыдонӕй уыд «Уӕрӕсейы Федерацийы сӕнӕфсиры куыст кӕныны ӕмӕ сӕнуадзыны тыххӕй» закъоны проект. Уый фӕрцы хъуамӕ сфидар уой сӕнӕфсиры куыст кӕныны ӕмӕ сӕнуадзыны барадон, технологон, экономикон хъуыддаг саразыны бындуртӕ.

Уымӕй дарддӕр, бӕрӕггонд ӕрцӕудзысты ацы къабазӕн паддзахадон ӕххуысы хуызтӕ, уавӕртӕ ӕмӕ фӕтк. Паддзахадон ӕмӕ бынӕттон хицауады оргӕнтӕм цавӕр бартӕ, цӕстдарды хӕстӕ хауы — ӕппӕт ацы фӕзилӕнтӕ хаст ӕрцыдысты закъоны проектмӕ. Ӕмбырды куыд райхъуыст, афтӕмӕй ныронг ацы къабазы ахастдзинӕдтӕ нывыл кӕнынӕн нормативон-барадон фӕтк нӕй. Закъоны проекты нысан у, сӕнӕфсиры куыст кӕныны ӕмӕ сӕнуадзыны къабазы архайд экономикон ӕгъдауӕй фӕахадгӕдӕр кӕнын, продукцийы бӕрц фӕфылдӕр кӕнын, ерысхъом ӕй скӕнын.

Цыдӕриддӕр къабазы рӕзтимӕ баст ис, уыцы домӕнтӕ закъоны проекты нымад ӕрцыдысты, суанг мӕнг продукцийӕн гӕрӕнтӕ сӕвӕрыны онг. Советы уӕнгтӕ сразы сты ацы документимӕ.

Наукӕ, ахуырад, культурӕ ӕмӕ информацион политикӕйы комитет ӕмбырдмӕ рахаста цалдӕр закъоны проекты. Комитеты сӕрдар Еленӕ Князева куыд радзырдта, афтӕмӕй «Уӕрӕсейы Федерацийы ахуырады тыххӕй» закъоны проектмӕ ивддзинӕдтӕ бахӕссыны фӕдыл» проект нывыл кӕны Иумӕйаг паддзахадон фӕлварӕны, кӕронбӕттӕн аттестацийы чи фӕархайы, уыцы ахуыргӕнджытӕн сӕ куысты тыххӕй фидыны фӕтк. Зындгонд куыд у, афтӕмӕй скъолаты, иннӕ ахуыргӕнӕндӕтты кусджытӕ фӕархайынц паддзахадон фӕлварӕнты, кӕд сын закъонмӕ гӕсгӕ уый ныхмӕ фидын фӕхъӕуы, уӕд сӕ арӕх хӕсджынӕй баззайынц.

Уыдӕттӕ ӕрцӕуынц, закъоны хъуагдзинӕдтӕ ӕмӕ лӕмӕгъдзинӕдтӕ кӕй ис, уый аххосӕй. Ацы ивддзинӕдты фӕрцы ӕппӕт уыцы аиппытӕ иуварсгонд ӕрцӕудзысты, ахуыргӕнӕгӕн йӕ куысты иу сахатӕн цас фидынц, уый йын, фӕлварӕнты архайгӕйӕ, хъуамӕ дыууӕ хатты фылдӕр фидой. Ӕппӕт хъуыддӕгтӕ хъуамӕ конд цӕуой бадзырды бындурыл, фыст дзы уой ахуыргӕнӕг ӕмӕ паддзахадон хицаудзинады оргӕны ‘хсӕн ӕппӕт хӕстӕ.

Социалон политикӕйы, ӕнӕниздзинад хъахъхъӕнынад ӕмӕ ветеранты хъуыддӕгты комитеты сӕрдар Реуазты Ларисӕ ӕмбырды архайджыты базонгӕ кодта Уӕрӕсейы Федерацийы хицӕн закъонӕвӕрынадон актты хицӕн уагӕвӕрдты архайд бауромыны документимӕ. Уыдон ахӕм уавӕр сӕвзӕрын кодтой, ӕмӕ ӕвджидад ӕххӕстгӕнӕг пенсиисджыты социалон фиддонтӕ нымад ӕрцӕуынц ӕфтиӕгтыл, уымӕй сӕм пенсийы индексаци нал фӕхауы. Цард куыд равдыста, афтӕмӕй сывӕллон райсыны тыххӕй бадзырдӕн цы ӕхцайы ӕххуыс ӕмбӕлы, уый нымайынц мыздыл, уырдыгӕй ма пенсион фӕдзӕхстадмӕ дӕр фиддонтӕ цӕуынц.

Ацы закъоны проект та уавӕр нывыл кӕны, цӕмӕй социалон ӕххуысы ӕхца мыздыл ма нымайой ӕмӕ пенсиисӕгӕн йӕ пенсийы индексаци дӕр ӕххӕстгонд цӕуа.

Советы ӕмбырды ма равзӕрстой цӕрӕнуӕтты коммуналон хӕдзарадимӕ, хъалонӕвӕрынадимӕ, промышленностимӕ баст закъоны проекттӕ. Ӕрныхас ма кодтой ӕндӕр ахсджиаг хъуыддӕгтыл дӕр.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here