Дунеон чемпионатӕй — хӕрзиуджытимӕ

0
26

Будапешты къуырийы размӕ ахицӕн уӕгъдибар хъӕбысхӕстӕй фӕсивӕды (23 азы онг) дунеон чемпионат.

Уӕрӕсейы иугонд командӕйы цы дӕс богалы хӕцыди, уыдонӕй цыппар уыдысты ирыстойнӕгтӕ.

Нӕ бӕстӕйы богӕлтты командӕ рамбылдта авд хӕрзиуӕджы. Уыдонӕй иу уыди сыгъзӕрин, цыппар — ӕвзист, дыууӕ та бронзӕ майдантӕ.

Уӕрӕсейы богӕлттӕй дунейы чемпион ссис Разамбек Жамалов. Уый иттӕг хорз рахӕцыд 74 кг онг уӕзы ӕмӕ фӕуӕлахиз йе ‘ппӕт ныхмӕлӕуджытыл дӕр.

Ӕвзист майдантӕй хорзӕхджын систы Уалыты Чермен (70 кг), Цӕкулаты Батырбег (92 кг), Шамиль Мусаев (97 кг) ӕмӕ Голоты Витали (125 кг). Ӕртыккаг бынӕттӕм рацыдысты  Динислав Тахтаров (61 кг) ӕмӕ Уалыты Радик (79 кг).

Командӕты ‘хсӕн Уӕрӕсе бацахста 1-аг бынат, 2-аг ссис Ираны командӕ, 3-аг бынатмӕ та рацыдысты Азербайджаны богӕлттӕ.

Нӕ  богӕлттӕ куыд рахӕцыдысты, уый тыххӕй командӕйы сӕргълӕууӕг, Уӕрӕсейы сгуыхт тренер Мӕргъиты Анатоли зӕгъы: «Нӕ лӕппутӕ сӕхи равдыстой хъомысджынӕй. Командӕты ‘хсӕн фыццаг кӕй уыдыстӕм, уый дӕр ууыл дзурӕг у, фӕлӕ уӕддӕр, мӕнмӕ гӕсгӕ, 1-аг бынӕттӕ хъуамӕ фылдӕр рамбылдтаиккам. Фыццаджыдӕр, уый хауы Уалыты Чермен ӕмӕ Цӕкулаты Батырбегмӕ. Чермен кӕронбӕттӕнмӕ фӕндагыл йӕ цалдӕр тыхджын ныхмӕлӕууӕгыл фӕуӕлахиз 10:0 хыгъдӕй. Кӕронбӕттӕны дӕр хъуамӕ рамбылдтаид йӕ гуырдзиаг ныхмӕлӕууӕг Мирза Шхулухияйӕ, фӕлӕ сӕ тох 5:5-ӕй ахицӕн йӕ ныхмӕлӕууӕджы пайдайӕн. Спорты афтӕ дӕр рауайы; уый размӕ кӕуыл фӕуӕлахиз, уыдонӕй дыууӕ, мӕнмӕ гӕсгӕ, уыдысты Шхулухияйӕ тыхджындӕртӕ.

Чермен у курдиатджын лӕппу, ӕмӕ мӕ уырны, нырма йӕхи иу ӕмӕ дыууӕ хатты кӕй нӕ равдисдзӕн стыр ерысты уӕлахиздзауӕй. Иу чысыл нӕ фӕцарӕхст Цӕкулаты Батырбег дӕр, ӕндӕр уый дӕр      1-аг бынатмӕ рацӕуыны аккаг уыд. Ӕмткӕй райсгӕйӕ, ирыстойнаг богӕлттӕ цыппарӕй дӕр призон бынӕттӕ кӕй бацахстой, уый банымайын хъӕуы хорз ӕнтыстыл, фӕлӕ дарддӕр кусын хъӕудзӕн ноджы лӕмбынӕгдӕр, цӕмӕй, Будапешты цы чысыл рӕдыдтытӕ ӕруагътой, уыдон фидӕны ерысты мауал ӕрцӕуой”.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here